लेवी बिधान 19
19
पवित्रता ओर न्याय रे नियम
1यहोवे मूसे खे बोलेया, 2“इस्राएलिया री सारी मण्डल़िया रे लोका खे बोल कि तुसे पवित्र बणे रे रओ; कऊँकि आऊँ यहोवा तुसा रा परमेशर पवित्र ए। 3तुसे आपणे-आपणे माया बाओ रा आदर करना, ओर मेरे रामो रे दिनो खे मानणा आऊँ तुसा रा परमेशर यहोवा ए। 4तुसे मूर्तिया रिया तरफा खे नि फिरना, ओर तिना री पूजा करने खे देवतेया रिया कड़ी की मूर्तिया नि बनाणियां; आऊँ तुसा रा परमेशर यहोवा ए।”
5जेबे तुसे यहोवे खे मेलबलि डांगर बलि करो, तेबे एड़ा बलिदान करना जेते कि आऊँ तुसा ते खुश ऊई जाऊँ। 6जेस दिने तुसे बलि करो तेस दिने ओर दूजे दिने तेसरा मास खाया जाओ, पर तीजे दिनो रा बचेया रा मास आगी रे फूकी देणा। 7जे तुसे बचेया रा मास तीजे दिने बी खाओगे, तो ये घृणित ठईरना, ओर तिजी ते माखे खुशी नि ऊणी। 8ओर तिजी खे खाणे वाल़ा यहोवे री पवित्र चीजा खे अपवित्र ठराओआ, इजी री खातर तेसखे आपणे पापो री सजा मिलणी; ओर से प्राणी आपणे लोका बीचा ते नाश करेया जाणा।
9फेर जेबे तुसे आपणे डोरूआ री फसल बाडो, तेबे आपणे डोरूआ री फसल पूरी-पूरी नि बाडणी, ओर बाडे रे डोरूआ रे जो पड़े रे सिल्ले रई जाओ सेयो नि चकणे। 10ओर आपणे अंगूरा रे बगीचे रा दाणा-दाणा नि तोड़ना ओर आपणे बगीचे रे अल़े रे अंगूर कट्ठे नि करने; सेयो गरीब ओर परदेशी लोका खे छाडी देणे; आऊँ तुसा रा परमेशर यहोवा ए।
11तुसे चोरी नि करनी, ओर एकी-दूजे साथे, ना ई कपट करना, ओर ना ई चूठ बोलणा। 12तुसे मेरे नाओं री चूठी कसम खाई की आपणे परमेशरो रा नाओं अपवित्र नि ठराणा; आऊँ तुसा रा यहोवा ए।#19:12 मत्ती 5:33
13एकी-दूजे पाँदे अन्देर नि करना, ओर ना ई एकी-दूजे खे लूटणा। मजदूरो री मजदूरी तांगे सारी रात प्यागा तक नि रणी चाईयो।#19:13 मत्ती 20:8, 1 तीमुथि 5:18, याकूब 5:4 14टऊणे खे स्राप नि देणा, ना अन्दे रे आगे ठोकर राखणी ओर आपणे परमेशरो रा डर मानणा; आऊँ तुसा रा यहोवा ए।
15तुसे न्याय करदे बखते बईमानी नि करनी; ओर ना ई गरीब माणूंए रा पक्ष करना ओर ना ई अमीर माणूंए रा मूँ देखी की बिचार करना; एकी-दूजे रा न्याय तर्मो साथे करना। 16जादा बोलणे वाल़ा बणी की आपणे लोका बीचे नि फिरेया करना, ओर एकी-दूजे रा खून करने रे बारे दे नि सोचणा; आऊँ तुसा रा यहोवा ए।
17तुसे आपणे मनो रे एकी-दूजे रे खलाफ बैर नि राखणा; आपणे पड़ोसिये खे जरूर समजेया कर, नई तो तेसरे पापो री सजा ताखे मिलणी।#19:17 मत्ती 18:15 18बदला नि लणा, ओर ना ई केसी साथे बैर राखणा, पर एकी-दूजे साथे आपू जेड़ा प्यार राखणा; आऊँ तुसा रा यहोवा ए।#19:18 मत्ती 5:43, मत्ती 19:19, मत्ती 22:39, मरक 12:31,33, लूक 10:27, रोमी 12:19, रोमी 13:9, गलाति 5:14, याकूब 2:8
19तुसे मेरी रवाजा सदा मानणियां। तुसे आपणे डांगरा खे लग जातिया रे डांगरा साथे मेल नि करवाणा; आपणे डोरूआ रे दूई प्रकारा रे बिऊ कट्ठे नि बाणे ओर लीलण ओर ऊना री मलाऊटा साथे बणेया रे टाल्ले नि पईनणे।
20तेबे जे कोई जवाणस दासी ओ ओर तेसा री मंगणी केसी मर्दो साथे ऊई जाओ, पर से ना तो दासिया ते छुड़ाई राखी ओर ना ई आजाद करी राखी ओ; तेसा साथे जे कोई गल़त काम करोगा, तो तिना दुँईं खे सजा तो मिलो, पर तेसा जवाणसा रे आजाद ना ऊणे रिया बजअ ते सेयो दोनो काणे नि। 21पर से मर्द मिलणे वाल़े तम्बूए रे द्धारो पाँदे यहोवे गे एक खाडू दोषबलिया खे ली आओ। 22ओर पुरोईत तेसरे कित्ते रे पापो रिया बजअ ते दोषबलिया रे खाडूए रे जरीये तेसरिया तँईं यहोवे रे सामणे प्राश्चित करो; तेबे तेसरा कित्तेया रा पाप माफ ऊई जाणा।
23फेर जेबे तुसे कनान प्रदेशो रे पऊँची की केसी बी किस्मा रे फल़ो वाल़े डाल़ लगाओ, तो तिना रे फल़ तीन साला तक तुसा खे वर्जित रओ, इजी बजअ ते तुसे सेयो नि खाणा। 24ओर चऊथे साले तिना रे सारे फल़ यहोवे री स्तुति करने रिया तँईं पवित्र ठईरो। 25तेबे पाँजुए साले तुसे तिना रे फल खाणे, ताकि तिना ते तुसा खे जादा फल मिलो; आऊँ तुसा रा परमेशर यहोवा ए।
26तुसे खून लगेया रा कुछ बी मास नि खाणा ओर ना जादू टोणा मानणा, ओर ना ई शुभ या अशुभ मुर्ह्त मानणे। 27आपणे सिरो रे बाल़ केरा राखी की नि कटवाणे ओर ना ई आपणी दाड़िया रे बाल़ कटवाणे। 28केसी माणूंए री मौता रिया बजअ ते आपणा शरीर बिल्कुल नि चीरना, ओर ना ई तिदे छाप लगाणी; आऊँ तुसा रा यहोवा ए जो तुसा खे आज्ञा देऊँआ।
29आपणियां बेटिया वेश्या बणाई की अपवित्र नि करनिया, एड़ा नि ओ कि देश व्याभिचारो रिया बजअ ते महापापो ते परी जाओ। 30मेरे रामो रे दिना खे मानेया करना, ओर मेरी पवित्र जगा रा डर लगातार मानणा; आँऊ तुसा रा यहोवा ए।
31डाऊआ या पितर जगाणे वाल़ेया रिया तरफा खे नि फिरना, ओर एड़ेया री टोल़ करी की तिना रिया बजअ ते अशुद्ध नि ऊणा; आऊँ तुसा रा परमेशर यहोवा ए।
32तुसे आपू ते बड़ेया सामणे उठी की खड़े ऊणा, ओर बुजुर्गा रा आदर करना, ओर आपणे परमेशरो रा आदर करना; आऊँ तुसा रा यहोवा ए।#19:32 1 तीमुथि 5:1
33जे कोई परदेशी तुसा रे प्रदेशो रे तुसा साथे रओ, तो तेसखे दु:ख नि देणा। 34जो परदेशी तुसा साथे रओ से तुसा खे आपणे प्रदेशो रे पाई या बईणा जेड़ा ऊणा चाईयो, ओर तेस साथे आपू जेड़ा ई प्यार राखणा; कऊँकि तुसे बी मिस्र प्रदेशो रे परदेशी थे; आऊँ तुसा रा परमेशर यहोवा ए।
35तुसे न्याय दे ओर परमाणो दे ओर तोलणे दे ओर नापणे दे बईमानी नि करनी। 36तुसा री ताकड़ी, बट्टे, किलो ओर लीटर सब ठीक-ठीक ओ; आऊँ तुसा रा परमेशर यहोवा ए जिने तुसे मिस्र प्रदेशो ते निकयाल़ी की ल्याये। 37इजी री खातर तुसे मेरी सारी रवाज ओर नियम मानदे ऊए सदा पालण करो; आऊँ तुसा रा यहोवा ए।
اکنون انتخاب شده:
लेवी बिधान 19: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.