योना 3
3
आज्ञा खे मानणा
1तेबे परमेशरो रा वचन दूजी बार योना गे पऊँचेया, 2“उठी की तेस बड़े शईर नीनवे खे जा ओर जो गल्ल मां ताखे बोलणी, तिजी रा तिदे प्रचार कर।” 3एस बारी योने यहोवे री आज्ञा खे मानी की नीनवे शईरो खे गया, जो इतणा बड़ा था कि तेस पूरा देखणे खे तीन दिन लगी गे। 4योने शईरो दे जाई की पईले दिनो री यात्रा पूरी कित्ती ओर ये प्रचार करदा गया, “आजो ते चाल़ी दिन बाद नीनवे खत्म करी देणा।” 5तेबे नीनवे रे माणूंए परमेशरो री चतौणिया पाँदे परोसा कित्तेया। इजी री खातर तिने बअरतो रा प्रचार कित्तेया। ओर तिने सबी टाट टखी जो लोक दु:खी ऊणे पाँदे टखो थे। बड़ेया ते लई की छोटेया तक सबी एड़ा ई कित्तेया।
6योने री चतौणी नीनवे रे राजे गे पऊँची। से आपणे सिंहासनो ते उठी की खड़ा ऊईगा। तिने आपणे राजे रे टाल्ले खोली ते। तिने बी आपणे दु:खो री टाट टखी ली। ओर तेबे से स्वाई पाँदे बैठी गा। 7तेबे राजे नीनवे रे लोका खे ये सन्देश देणे खे दूत पेजे; “मैं ओर मेरे सला देणे वाल़ेया ये आज्ञा देई राखी कि कोई बी माणूं कुछ नि खाओ ओर ना ई पियो। एथो तक कि आपणे डांगरा खे बी खाणे-पीणे नि देयो। 8माणूं ओर डांगरा खे एक जेड़ा ई दु:खो रा टाल्ला टखणा चाईयो। तुसा सबी खे पूरे दिलो ते परमेशरो खे पुकारना चाईयो। बुराई करना बन्द करो। दूजेया रा नुकशाण नि करो। 9ऊई सको परमेशर दया करो ओर आपणी इच्छा बदली देयो ओर तेसरा पड़केया रा रोष शान्त ऊई जाओ ओर आसे नाश ऊणे ते बची जाऊँ।” 10जेबे परमेशरे तिना रे काम देखे कि सेयो बुरी बाटा ते फिरने लगी रे, तेबे परमेशरे आपणी इच्छा बदली ती ओर तिना रा जो नुकशाण करने री तिने ठाणी राखी थी, से नि कित्तेया।
اکنون انتخاب شده:
योना 3: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.