होशे 11
11
इस्राएलो रिया तँईं परमेशरो रा प्यार
1यहोवा बोलोआ, “इस्राएली लोका रे एक देश बणने ते पईले मैं तिना ते तिंयाँ ई प्यार कित्तेया था जेड़े एक माणूं आपणे माठे ते करोआ, ओर मैं सेयो मिस्रो ते बारे बुलाए थे। 2पर इस्राएली लोक मैं जितणे ज्यादा बुलाए सेयो मांते तिथणे ई दूर ऊए थे, इस्राएलो रे लोक बाल देवतेया खे बलिदान करो थे ओर कअड़ी री मूर्तिया खे तूप बाल़ो थे। 3एप्रैमो खे मैं ई चलणा सिखाया था इस्राएलो खे आऊँ गोदा रे लई की फिरूँ था, पर सेयो नि जाणो थे कि तिना रा त्यान राखणे वाल़ा आऊँ ई ए।” 4आऊँ तिना खे माणूं समजी की प्यारो री डोरिया साथे खींजू था। ओर जेड़ा कोई किसान आपणे बल़दो रे गल़ो रा जूँगड़ा खोली की तेस सामणे काआ राखी देयोआ, तेड़ा ई मैं तिना साथे कित्तेया। 5सेयो मिस्र देशो खे वापस नि जाणे, पर अश्शूर तिना रा राजा ऊणा, कऊँकि तिने मेरी तरफा खे आऊणे खे ना करी ती री।
6तिना रे शईरो दे तलवार चलणी, तिना रे दुश्मणा तिना रे द्वार तोड़ी की पीतरे कूसी जाणे। सेयो तिना नाश करी देणे, सेयो आपणी ई बुरी योजना दे फसी जाणे। 7मेरी प्रजा मांते दूर ऊणे खे लगी दी रओई, सेयो बोलोए कि आऊँ महान सर्वशक्तिमान परमेशर ए, पर सेयो मेरा बिलकुल बी आदर नि करदे।
8ओ एप्रैम, आऊँ ताखे कऊँ छाडूं? ओ इस्राएल, आऊँ ताखे दुश्मणा रे आथो दे किंयाँ करी देऊँ? आऊँ ताखे अदमो जेड़ा कऊँ छाडूं ओर सबोयीमो जेड़ा करुँ? मेरे दिलो माखे एड़ा नि करने देणा! तुसा रिया तँईं मेरा प्यार बऊत मजबूत ए। 9मां आपणा रोष पड़कणे नि देणा ओर ना मां एप्रैम फेर नाश करना, कऊँकि आऊँ माणूं नि परमेशर ए, आऊँ तां बीचे रणे वाल़ा पवित्र ए, मां गुस्सा करी कि नि आऊणा। 10कऊँकि एक दिन सेयो लोक मेरे पीछे-पीछे आऊणे। मां यहोवे शेरो रे जेड़े गरजणा। ओर जेबे मां गरजणा, तो मेरे लोक पच्छमा रिया दिशा ते थरथरांदे ऊए वापस आऊणे। 11सेयो मिस्रो ते पंछिया रे चूण्डो जेड़े आऊणे। सेयो कबूतरा जेड़े छोड़ अश्शूर देशो ते आऊणे। ओर मां सेयो वापस कअरे लई आऊणे, यहोवे री येई बाणी ए। 12एप्रैमो रे लोक मांते चूठो ते अलावा कुछ नि बोलदे। इस्राएल माखे तोखा देओआ। ओर यहूदा परमेशरो ते दूर पटकदा रओआ। तिने विश्वासो जोगा पवित्र परमेशर छाडीता दा ए।
اکنون انتخاب شده:
होशे 11: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.