यहेजकेल 43
43
मन्दर, परमेशरो रे रणे री जगा
1फेर दशणे वाल़ा माणूं माखे तेस बड़े द्वारो गे लईगा, जेतेरा मूरा मन्दरो रे पूर्बो रिया तरफा खे था। 2तेबे इस्राएलो रे परमेशरो रे ऊणे रा तेज पूर्ब दिशा ते आया ओर तेसरी बाणी बऊत सारे पाणिए रे शादो जेड़ी ऊई ओर तेसरे तेजो ते सारी तरतिया दे प्रयासा ऊईगा।#43:2 प्रका. 19:6 3ये दर्शण तेस दर्शणो जेड़ा था, जो मैं यरूशलेम शईरो रे नाश ऊणे खे परमेशर आऊँदे बखते देखेया था ओर तेस दर्शणो जेड़ा, जो मैं कबार नदिया रे कनारे देखेया था। तेबे मैं आपणा मूँ जमीना रिया तरफा खे थाले करिता। 4तेबे यहोवे रा तेज तेस बड़े द्वारो दे ते ऊई की जो पूर्बो रिया तरफा खे था, मन्दरो दे आई गा। 5तेबे यहोवे रे आत्मे आऊँ चकी की मन्दरो रे पीतरले आँगणो दे पऊँचाया ओर यहोवे रा तेज मन्दरो दे परीगा था। 6तेबे मैं एक माणूंए री आवाज सुणी, जो मन्दरो ते माखे बोलणे लगी रा था ओर दशणे वाल़ा माणूं मेरे एकी कनारे खड़ी रा था। 7तिने माखे बोलेया, “ओ नाश ऊणे वाल़े माणूंआ, यहोवे री ये बाणी ए कि ये तो मेरे सिंहासनो री जगा ओर मेरे पैर राखणे री जगा ए, जेती मां इस्राएलो बीचे सदा वास करी की रणा ओर ना तो इस्राएलो रे कराने ओर ना तेसरे राजे आपणे व्याभिचारो ते या आपणी ऊच्ची जगा रे आपणे राजेया री लाशा खे दबाई की मेरा नाओं फेर अशुद्ध करना। 8इस्राएलो रे राजा आपणी देऊल़ी मेरिया देऊल़ी रे नेड़े ओर आपणे द्वारो रे खम्बे मेरे द्वारो रे खम्बेया रे नेड़े बणाओ थे ओर मां ओर तिना बीचे बस कांद ई थी ओर तिने आपणे घिनौने कामो साथे मेरा पवित्र नाओं अशुद्ध ठराया था; इजी री खातर मैं रोषो रे आई की सेयो नाश करीते।” 9एबे सेयो आपणे मूर्तिया री पूजा रे जरीये व्याभिचार ओर आपणे राजेया री लाशा मेरे सामणे ते दूर करी देयो, तेबे मां तिना बीचे सदा वास करी की राखणा। 10ओर यहोवे आगे बोलेया, “ओ नाश ऊणे वाल़े माणूंआ, ताखे इस्राएलो रे लोका खे एस मन्दरो रे बारे दे बताणा चाईयो। इजी ते तिना खे आपणे पापा पाँदे शर्म आऊणी चाईयो। तिना मन्दरो रे नमूने रे बारे दे खोजबीन करनी चाईयो। 11जे सेयो आपणे सारे कामो ते शर्मिंदा ओ ओर तिना खे एस मन्दरो रा आकार, रूप ओर एतेरे बारे-पीतरे आऊणे जाणे री बाट ओर एतेरे सारे आकार, बिदिया, नियम बताणा ओर तिना सामणे लिखी की राखणा; जेते कि सेयो इजी रा सारा आकार ओर तिना बिधिया रा ईमानदारिया ते पालण करो। 12मन्दरो रा बिधान ये कि पाह्ड़ो री चूँडिया रे चऊँ कनारे सारी जगा बऊत पवित्र मानणी ए। देख, मन्दरो रा येई बिधान ए।”
बेदिया री बणावट
13बेदिया रा नाप ये ए: बेदिया रे चऊँ कनारे इक्की ईंच डूगी ओर इक्की ईंच चौड़ी नाल़ी ए, जेते रे कनारे पाँदे नौ ईंच चौड़ी एक पट्टी ए। ओर ये बेदिया री ऊचाई ए, 14नाल़िया ते बेदी साडे तीन फुट ऊबे उठी की एक ऊँदले कनारे पाँदे पऊँचोई जो बेदिया खे केरी राखोई ओर इक्की ईंच चौड़ा ए। ऊँदले कनारा ते बेदी सात फुट ऊबे उठी की उबले कनारे पाँदे पऊँचोई से बी इक्की ईंच चौड़ा ए, 15से उबला इस्सा, बेदिया री चूल, जेते पाँदे बलि फुकी जाओ थी सात फुट ऊच्ची ओई, जेतेरे चारो कूणेया ते एक-एक सींग निकल़ोआ। 16बेदिया री चूँडी चौरस ए, जेतेरा नाप इक्की फुट लाम्बा ओर इक्की फुट चौड़ा ए।#43:16 यहे. 27:1 17उबला कनारा बी चौरस आकारो रा बणोआ, जेतेरा नाप साडे चौबी फुट लाम्बा ओर साडे चौबी फुट चौड़ा ए, जेतेरे कनारे पाँदे इक्की ईंचो रा गटर ओर साडे दस ईंचो रा मोड़ ए। बेदिया रे पूर्बो रे इस्से दे ऊबे जाणे खे पैड़िया ए।
बेदिया रा अर्पण
18तेबे यहोवे माखे बोलेया, “ओ नाश ऊणे वाल़े माणूंआ, परमेशर यहोवा ईंयाँ बोलोआ, जेस दिने होमबलि चढ़ाणे ओर खून छिड़कणे खे बेदी बणाओ, तेस दिनो रिया बिधिया यो ऊणिया चाईयो। 19मतलब लेवी गोत्रो रे सेयो पुरोईत जो सादोको रे वंशो ते ए, सिर्फ तिना ई मेरे नेड़े आई की मेरी सेवा-टईल करेया करनी, तिना खे तैं पापबलिया खे एक बाच्छू देणा, परमेशर यहोवे री येई बाणी ए। 20तेबे तैं तेसरे खूनो बीचा ते थोड़ा जा लई की बेदिया रे चारो सींगा पाँदे ओर कुर्सिया रे चारो कूणेया ओर चारो फटिया रे लगाई देणा; ईंयाँ बेदिया रिया तँईं प्राश्चित करी की से पवित्र करनी। 21तेबे पापबलिया रा बाच्छू लई की, मन्दरो री पवित्र जगा ते बारे ठराई री जगा रे फूकी देणा। 22दूजे दिने एक निर्दोष बाकरा पापबलि करी की चढ़ाणा ओर जिंयाँ बाच्छूए रे जरीये बेदी पवित्र करनी, तिंयाँ ई से एस बाकरे रे जरीये बी पवित्र करनी।#43:22 दूजा दिन तेस दिनो खे बताओआ जेबे यहेजकेल बेदिया खे पवित्र करना शुरू करोआ 23जेबे तूँ तेसा खे पवित्र करी देओ, तेबे तैं एक निर्दोष बाच्छू ओर एक निर्दोष खाडू चढ़ाणा। 24तैं बल़द ओर खाड्डू मन्दरो दे पेंटा रे रूपो दे चढ़ाणे ओर यहोवे रे सामणे ल्याऊणे ओर पुरोईत लोक तिना दे लूण पायी की तिना खे यहोवे खे होमबलि करी की चढ़ाओ। 25फेर साता दिना तक हर दिन पुरोईतो गे एक बाकरा पापबलिया खे बलि करी की चढ़ाणा, ताकि से बेदिया खे मेरिया तँईं ग्रहण करने जोगी बणाओ। ओर एक बाच्छू ओर एक खाडू बी बलि करने, जो निर्दोष ओ। 26साता दिना तक पुरोईत लोक बेदिया खे प्राश्चित करी की शुद्ध करदे रओ; ईंयाँ तेसा रा संस्कार ओ। 27जेबे पुरोईत बेदिया री शुद्धिया रे तिना साता दिना खे पूरा करी लो, तेबे आठुए दिनो ते बादो ते पुरोईत लोक तुसा रे होमबलि ओर मेलबलि बेदिया पाँदे चढ़ाया करो; तेबे आऊँ तुसा ते खुश ऊणा, परमेशर यहोवे री येई बाणी ए।”
اکنون انتخاب شده:
यहेजकेल 43: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.