निर्गमन 3
3
मूसा ओर बल़ेया रा जाड़
1एकी दिने मूसा आपणे सऊरे यित्रो जेसरा नाओं रूएल ए ओर जो मिद्यानो रा पुरोईत था तेसरिया पेडा-बाकरिया चराणे लगी रा था ओर से तिना खे सुनसाण जगा री पच्छमा री तरफा खे होरेब नाओं रे परमेशरो रे सीनै नाओं रे पाह्ड़ो रे नेड़े लईगा। 2तेबे यहोवे रे दूते मूसे खे एक कांडे वाल़े फुखदे ऊए जाड़ो बीचे आगी री लूपिया रे दर्शण दित्तेया ओर तिने नजर करी की देखेया कि जाड़ फूखणे लगी रा, पर स्वा नि ऊणे लगी रा।#3:2 मरक 12:26, लूक 20:37 3तेबे मूसे सोचेया, “मां तेती जाई कि ये अचम्बे रा काम देखणा कि एते कांडे वाल़े जाड़ो रे आग तो लगी री पर ये जाड़ फूखणे कऊँ नि लगी रा।”#3:3 प्रेरित 7:30,31
4जेबे यहोवे देखेया कि मूसा मुड़ी की देखणे आऊणे लगी रा, तेबे परमेशरे तेसखे कांडे वाल़े जाड़ो बीचा ते आका पाईया, “ओ मूसा, ओ मूसा!” मूसे बोलेया, “हाँजी, आँऊ एती ए।”
5तेबे परमेशरे बोलेया, “एते नेड़े नि आओ ओर आपणे पैरा ते जोड़े खोली दे, कऊँकि जेते जगा रे तूँ खड़ी रा, से पवित्र जगा ए।”#3:5 प्रेरित 7:33 6फेर परमेशरे बोलेया, “आऊँ तेरे बाओ-दादे, अब्राहम, इसहाक ओर याकूबो रा परमेशर ए।” तेबे मूसा जो परमेशरो रिया तरफा खे देखणे ते डरने लगी रा था, तिने आपणा मूँ टखी ता।#3:6 मत्ती 22:32, मरक 12:26, लूक 20:37
7फेर यहोवे बोलेया, “मैं आपणी प्रजा रे लोक, जो मिस्रो रे ए, तिना रे दु:ख पक्का देखी राखे ओर तिना रा चींगणा जो मईणत करवाणे वाल़े रिया बजअ ते ओआ, से बी मैं सुणी राखेया ओर तिना रे दु:खो पाँदे मैं त्यान लगाई राखेया। 8इजी री खातर एबे आऊँ उतरी की आईगा रा ताकि तिना खे मिस्रिया रे वशो ते छुड़ाऊँ ओर तेते देशो ते निकयाल़ी की केसी तुरे ओर बड़े देशो रे जो सच्चो खेई बऊत ई पजणे वाल़ा देश ए, मतलब कनानी, हित्ती, एमोरी, परिज्जी, हिब्बी ओर यबूसी लोका रिया जगा रे पऊँचाई देऊँआ। 9इजी रिया तँईं एबे सुण, इस्राएलिया रा चींगणा माखे सुणी रा ओर मिस्रिया रा तिना पाँदे अन्देर करना बी माखे दिशी रा। 10इजी री खातर आओ, आऊँ ताखे फिरौनो गे पेजुँआ, ताकि तूँ मेरे इस्राएली लोका खे मिस्रो ते निकयाल़ी की ल्याओ।”#3:10 प्रेरित 7:34
11तेबे मूसे परमेशरो खे बोलेया, “आऊँ कुण ए जो फिरौनो गे जाऊँ ओर इस्राएलिया खे मिस्र देशो ते निकयाल़ी की ल्याऊँ?” 12तेबे परमेशरे बोलेया, “पक्का मां तां साथे रणा ओर इजी गल्ला रा कि ताखे पेजणे वाल़ा आऊँ ए, एक चिह्न ऊणा, जेबे तूँ तिना लोका खे मिस्रो ते निकयाल़ी चुकोगा तेबे तुसा एस ई पाह्ड़ो पाँदे परमेशरो री पूजा करनी।”#3:12 प्रेरित 7:7 13मूसे परमेशरो खे बोलेया, “जेबे आऊँ इस्राएलिया गे जाई की तिना खे ये बोलूँ कि तुसा रे पितरा रे परमेशरे आऊँ तुसा गे पेजी राखेया, तेबे जे सेयो मांते पूछो कि तेसरा नाओं क्या ए, तेबे आऊँ तिना खे क्या बताऊँगा?” 14परमेशरे मूसे खे बोलेया, “आऊँ जो अए से अए।” दुबारा ते परमेशरे तेसखे बोलेया, तैं इस्राएलिया खे ये बोलणा कि जेसरा नाओं आऊँ ए तिने ई आऊँ तुसा गे पेजी राखेया।#3:14 प्रकाशित 1:4,8, प्रकाशित 4:8, प्रकाशित 11:17 15परमेशरे मूसे खे ये बी बोलेया, “तैं इस्राएलिया खे ये बोलणा कि तुसा रे पितरा रा परमेशर मतलब अब्राहम, इसहाक ओर याकूबो रा परमेशर यहोवा ए, तिने ई आऊँ तुसा गे पेजी राखेया। देख, सदा तक मेरा नाओं येई रणा ओर पीढ़िया ते पीढ़िया तक मेरी याद इजी नाओं तेई ऊणी।#3:15 मत्ती 22:32, मरक 12:26 16इजी री खातर एबे जाई की इस्राएलिया रे स्याणेया खे कट्ठा कर ओर तिना खे बोल कि तुसा रे बुजुर्ग अब्राहम, इसहाक, ओर याकूबो रे परमेशर यहोवा माखे दर्शण देई की ये बोली राखेया कि मैं तुसा पाँदे ओर तुसा साथे जो बर्ताव मिस्रो रे कित्तेया जाओआ तेते पाँदे बी त्यान लगाई राखेया 17ओर मैं ठाणी ला रा कि मां तुसे मिस्रो रे दु:खो ते निकयाल़ी की कनानी, हित्ती, एमोरी, परिज्जी, हिब्बी ओर यबूसी देशो रे लोका बीचे लई चलणे, जो एड़ा देश ए जो सच्चो खेई बऊत ई पजणे वाल़ा ए। 18तेबे तिना तेरी ई गल्ल सुणनी ओर तैं इस्राएलिया रे स्याणेया खे साथे लई की मिस्रो रे राजे गे जाई की तेसखे एड़ा बोलणा कि इब्रिया रे परमेशर यहोवे साथे म्हारी मुलाकात ऊई री, इजी री खातर आसा खे एबे तिंऊँ दिना रिया बाटा दे सुनसाण जगा दे जाणे दे, ताकि आसे आपणे परमेशर यहोवे खे बलिदान चढ़ाऊँ। 19आऊँ जाणूंआ कि मिस्रो रे राजे तुसे नि पेजणे बल्कि बड़े जोरो साथे दबाव पाई की पनि जाणे देणे।#3:19 निर्ग. 5:2 20इजी री खातर मां आपणा आथ बढ़ाई की मिस्र देशो रे सारे अचम्बे रे काम करने ओर तिना खे सजा देणी तेबे तिजी ते बाद तेस तुसे जाणे देणे। 21तेबे मां मिस्रिया ते आपणी एसा प्रजा पाँदे दया करवाणी ओर जेबे तुसे निकल़ने तेबे खाली आथ नि निकल़ने। 22बल्कि तुसा रिया सबी जवाणसा आपणियां-आपणियां मिस्री पड़ोसणी ते सूईने चाँदिए रे गईणे ओर टाल्ले मांगी लणे ओर तुसे सेयो आपणे माठे-बेटिया खे पन्याणे ओर ईंयाँ तुसा मिस्री लुटणे।”
اکنون انتخاب شده:
निर्गमन 3: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.