निर्गमन 1
1
मिस्रो रे इस्राएलिया री दुर्दशा
1इस्राएलो रे पाऊआ रे नाओं, जो आपणे-आपणे कराने खे लई की याकूबो साथे मिस्र देशो रे आए, यो ए 2मतलब रूबेन, शिमोन, लेवी, यहूदा, 3इस्साकार, जबूलून, बिन्यामीन, 4दान, नप्ताली, गाद ओर आशेर। 5यूसुफ तो मिस्र देशो रे पईले ई आईगा था। याकूबो रे आपणे वंशो रे जो पैदा ऊए सेयो सारे 70 लोक थे।#1:5 प्रेरित 7:14
6यूसुफ ओर तेसरे सब पाई ओर तेसा पीढ़िया रे सब माणूं मरीगे।#1:6 प्रेरित 7:15 7पर इस्राएलो री ल्वाद बढ़ने लगी ओर सेयो बऊत सामर्थी ऊँदे गये ओर सेयो इतना बढ़ीगे कि तिना साथे सारा देश परी गा।
8बऊत साला ते बाद मिस्रो रे दूजा राजा गद्दिया पाँदे राज करने खे बैठेया जो यूसुफो खे नि जाणो था।#1:8 प्रेरित 7:15 9ओर राजे आपणी प्रजा रे लोका खे बोलेया, “देखो, इस्राएली लोक आसा ते गिणतिया रे बऊत जादा ओर सामर्था रे तागतबर ऊईगे रे। 10इजी खे आओ, आसे चलाकिया साथे तिना साथे बर्ताव करिए केथी एड़ा नि ओ कि सेयो बऊत बढ़ी जाओ ओर युद्धो रे बखते आसा रे खलाफ आसा रेया दुश्मणा ते मिली की आसा ते लड़ो ओर एस देशो ते निकल़ी जाओ।” 11इजी री खातर तिने तिना पाँदे मजदूरी कराणे वाल़े परदान ठराए, ताकि सेयो तिना पाँदे कामो रा बोज पाई-पाई की तिना खे दु:ख देया करो। तेबे तिने फिरौनो खे पितोम ओर रामसेस नाओं रे पण्डार वाल़े शईर बणाए। 12पर जिंयाँ-जिंयाँ सेयो मिस्रो रे लोक इस्राएलिया खे दु:ख देंदे गये, तिंयाँ-तिंयाँ सेयो बढ़दे ओर फैलदे गये, इजी री खातर सेयो इस्राएलिया ते बऊत डरीगे। 13तेबे बी मिस्रिए इस्राएलिया ते सख्तिया साथे काम करवाया 14ओर तिना री जिन्दगी गारे, ईट ओर जिम्मीदारे रे कई प्रकारा रे कामो री कठण सेवा साथे दु:खी करवाई ती; जेस केसी कामो रे सेयो तिना ते सेवा करवाओ थे, सेयो तिना साथे सख्त बर्ताव करो थे।
15शिप्रा ओर पूआ नाओं रिया दो इब्री दाईया खे मिस्रो रे राजे आज्ञा दित्ती, 16“जेबे तुसे इब्री जवाणसा खे बच्चा पैदा करदे बखते जमाणे रे पात्थरो पाँदे बैठी रिया देखो, तेबे जे पाऊ ओ तो से कायी देणा ओर जे बेटी ओ तो जिऊँदी राखी देणी।” 17पर सेयो दाईया परमेशरो रा डर मानो थिया ओर सेयो मिस्रो रे राजे री आज्ञा ना मानी की माठेया खे बी जिऊँदा राखी देओ थिया। 18तेबे मिस्रो रे राजे तिना खे बुलाई की पूछेया, “तुसे जो तिना पाऊआ खे जिऊँदा छाडी देओईया, तो एड़ा कऊँ करोईया?”#1:18 प्रेरित 7:19 19दाईये फिरौनो खे जबाब दित्तेया, “इब्रिया रिया जवाणसा मिस्रिया रिया जवाणसा जेड़िया निए, सेयो एड़िया फुर्तिलिया ए कि दाईया रे पऊँचणे ते पईले ई तिना रे बच्चा पैदा ऊई जाओआ।” 20इजी री खातर परमेशरे दाईया साथे पलाई कित्ती ओर सेयो इस्राएली लोक गिणतिया रे बढ़ी की बऊत सामर्थी ऊईगे। 21कऊँकि सेयो दाईया परमेशरो रा डर मानो थिया, इजी खे परमेशरे तिना खे ल्वाद दित्ती ओर तिना रे कअर बसाए#1:21 कअर बसाए मतलब तिने दाईये ईब्री मर्दा साथे ब्या कित्तेया ओर इस्राएलो री आम्मा बणिया। 22तेबे फिरौने आपणी सारी प्रजा रे लोका खे आज्ञा दित्ती, “इब्रिया रे जितणे पाऊ पैदा ओ, तिना सबी खे तुसे नील नदिया रे सेटी देओ पर सब बेटिया जिऊँदिया छाडी देणियां।”#1:22 प्रेरित 7:19
اکنون انتخاب شده:
निर्गमन 1: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.