आमोस 1
1
परमेशरो रा इस्राएलो रे नेड़े-तेड़े रे देशा खे सजा देणा
1आमोस तकोआ शईरो रा एक ग्वाल़ा था। एती से दर्शण ए जो तिने इस्राएलो रे बारे दे देखेया था। ये दर्शण तेसखे भूकम्पो ते दो साल पईले मिलेया था। तेस बखते यहूदा रा राजा उज्जियाह था। योआशो रा पाऊ यारोबाम इस्राएलो रा राजा था। यो आमोसे रे शब्द ए; 2तिने बोलोआ, “परमेशर सिय्योनो ते शेरो जेड़े गरजोआ। तेसरी आवाज यरूशलेमो ते गरजणे जेड़ी आओई। ग्वाल़ेया री चराईया सूकी जाओईया। कर्मेल पाह्ड़ो री चूँडी सूकी जाओई।”
यहोवा सामरिया खे सजा देओआ
3यहोवा बोलोआ, “दमिश्को रे लोके बार-बार पाप करी राखे, इजी बजा ते मां तिना खे सजा देणी। कऊँकि तिना गिलाद लोए रे अल़े की केसणा। 4इजी री खातर मां राजा हजाएलो रे मईलो खे नाश करने खे आग पेजणी। एसा आगी तेसरे पाऊ बेन्हददो रा कीला फूकी देणा। 5मां दमिश्को रे फाटक बी तोड़ी देणे ओर ओवन नाओं री काअटिया दे रणे वाल़े ओर बेतादेनो रे कअरे रणे वाल़े राजदण्डधारी नाश करने ओर अरामो रे लोक बन्दी ऊई की कीर शईरो खे जाणे, परमेशरो रा येई वचन ए।” 6परमेशर ईंयाँ बी बोलोआ, “गाजा शईरो रे लोके बार-बार पाप करी राखेया ए। ओर मां सेयो बिना सजा दित्ते नि छाडणे! तिने सारे गाँवो खाली कराईते दे ए, ओर सेयो एदोमो रे लोका खे गुलाम बणाई की बेचीते दे ए। 7इजी बजा ते मां गाजा री दवाला दे आग लगाणी ओर तिजी ते तेथो रे मईल फूखी जाणे। 8मां अशदोद रे रणे वाल़े ओर अश्कलोन रे राजदण्डाधिकारी बी नाश करने, मां एक्रोनो खे सजा देणी ओर बाकी सब पलिश्ती लोक मरी जाणे” परमेशर यहोवे रा येई वचन ए।
9परमेशर ईंयाँ बी बोलोआ, “सोरो रे लोके बार-बार पाप करी राखेया ए। इजी री खातर मां तिना रा न्याय करना। तिने सबी जातिया पाँदे कब्जा करी ला दा ए। तिने सेयो एदोमो खे बेचीते दे। तिने आपणा वादा याद नि कित्तेया। 10इजी बजा ते मां सोरो री दवाला दे आग लगाणी ओर तिजी ते तेथो रे मईल फूखी जाणे।”#1:10 मत्ती 11:21-22, लूक. 10:13-14
11परमेशर फेर बोलोआ, “एदोमो रे लोके बार-बार पाप करी राखेया। इजी री खातर मां तिना रा न्याय करना। तिने तलवारा लई की इस्राएलो रा पीछा कित्तेया जो तिना खे काणे खे त्यार थिया। तिने देशो री जवाणसा काई तिया। सेयो हर बखत गुस्से दे रओ थे। तिना रा गुस्सा एक एड़िया आगी जेड़ा था जो पड़की जाओ थी। एतेखे रोकी नि सको थे। 12इजी बजा ते मां तेमान शईरो री दवाला दे आग लगाणी ओर तिजी ते बोस्रा रे मईल फूखी जाणे।”
13परमेशर फेर बोलोआ, “अम्मोनो रे लोके बार-बार पाप करी राखेया ए। इजी री खातर मां तिना रा न्याय करना। तिने गिलादो दे गर्भवती जवाणसा चीरी तिया। सेयो तेसा जगा खे आपणे इस्से दे जोड़ना चाओ थे। 14इजी बजा ते मां रब्बा री दवाल रे आग लगाणी ओर तिजी ते तेथो रे मईल फूखी जाणे। लड़ाईया रे तेस दिने लड़ाईया री आवाज सुणनी। से दिन तेज पऊण-चूखाने वाल़ा ऊणा। 15ओर तिना रा राजा आपणे परदाना समेत गुलामिया दे जाणा, परमेशरो रा येई वचन ए।”
اکنون انتخاب شده:
आमोस 1: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.