प्रेरिता रे काम 17
17
पौलुस थिस्सलुनीके नगरो रे
1तेबे पौलुस और सीलास अम्फिपुलिस और अपुल्लोनिया नगरो रिये ऊई की थिस्सलुनीके नगरो खे आए, जेती यहूदिया रा एक प्रार्थना रा कअर था। 2तेबे पौलुस आपणी रवाजा रे मुताबिक तिना गे गया और तिना रे रामो रे दिने पवित्र शास्त्रो बीचा ते तिना साथे बईस कित्ती 3और से तिना रा मतलब तिना रा उदारण देई-देई की समजयाओ था कि मसीह रा दु:ख उठाणा और मरे रेया बीचा ते जिऊँदा ऊणा जरूरी था, “येई यीशु, जेसरी आऊँ तुसा खे कथा सुणाऊँआ, मसीह ए।” 4तिना बीचा ते कुछ यहूदिये और कई यूनानी भक्ते और बऊत सारी तर्मी जवाणसे मानी ला और पौलुस और सीलासो साथे, मिली गे। 5पर यहूदिया खे जल़न ऊईगी और तिने बजारू माणूंआ बीचा ते कई दुष्ट माणूं आपू साथे मलाई ते और पीड़ (भीड़) लगाई की नगरो रे शोर-शराबा करने लगे और यासोनो रे कअरो रे चढ़ाई करी की पौलुस और सीलास लोका सामणे ल्याऊणा चाए।
6तेबे तिना रे तेती ना मिलणे ते बाद सेयो जोरे-जोरे साथे ये बोली की यासोन और कई ओर विश्वासी पाईया खे नगरो रे हाकिमो सामणे खिंजी की ली आए, “यो लोक, जिने दुनिया बी उल्ट-पुल्ट करी ती री, एती बी आईगे रे 7और यासोने यो आपणे कअरे राखी राखे और यो सब के सब बोलोए कि यीशु राजा ए और महाराजा कैसरो री आज्ञा रा बिरोद करोए।” 8तिने लोका खे और नगरो रे हाकिमो खे ये सुणाई की सेयो डराईते। 9तेबे तिने यासोन और बाकि लोका ते जमानत लयी की सेयो छाडी ते।
पौलुस और सीलास बिरिया रे
10विश्वासी पाईए रातो-रात पौलुस और सीलास बिरिया नगरो खे पेजी ते और सेयो तेती पऊँची की यहूदिया रे प्रार्थना रे कअरो रे गये। 11यो लोक तो थिस्सलुनीके नगरो रे यहूदिया ते ठीक थे और तिने बड़ी लालसा साथे वचन ग्रहण कित्तेया और हर रोज पवित्र शास्त्रो रे जांच करदे रये कि यो गल्ला सच्चिया कि नई। 12तेबे तिना बीचा ते कई जणे और यूनानी दमदार जवाणसा बीचा ते और मर्दा बीचा ते बी कई जणे विश्वास कित्तेया। 13पर जेबे थिस्सलुनीके रे यहूदी जाणी गे कि पौलुस बिरिया नगरो रे बी परमेशरो रा सुसमाचार सुनाणे लगी रा, तेबे सेयो तेती बी आईगे और लोका खे उकसाणे लगे और आल्ला-गोल्ला करने लगे। 14तेबे विश्वासी पाईए पौलुस फटाफट बिदा कित्तेया कि समुद्रो रे कनारे चली जा, पर सीलास और तीमुथियुस बिरिया रेई रईगे। 15पौलुसो खे पऊँचाणे वाल़े तेसखे एथेंस नगरो तक लयी गे और सीलास और तीमुथियुसो खे ये आज्ञा लयी की बिदा ऊआ कि मांगे फटाफट आयी जाओ।
पौलुस एथेंस नगरो रे
16जेबे पौलुस एथेंस नगरो रे सीलास और तीमुथियुसो खे न्याल़ने लगी रा था, तेबे नगरो खे मूर्तिया साथे परे रा देखी की तेसरा जिऊ बऊत दु:खी ऊईगा। 17तेबे से प्रार्थना रे कअरो रे यहूदिया खे और भक्ता खे और चौको रे जो बी लोक मिलो थे, तिना साथे हर रोज बईस करो था। 18तेबे इपिकूरी और स्तोईकी ज्ञानिया बीचा ते कई जणे तेस साथे बईस करने लगे और बऊत जणेया बोलेया, “ये बकवासी क्या बोलणा चाओआ?” पर ओरी बोलेया, “ये ओरी देवतेया रा प्रचार करने वाल़ा लगोआ, कऊँकि ये यीशुए रा और दुबारा जिऊँदा ऊणे रा सुसमाचार सुणाओआ।” 19तेबे सेयो तेसखे आपू साथे अरियुपगुस नाओं रे प्रार्थना रे कअरो रे लयी गे और पूछेया, “क्या आसे जाणी सकूँए कि ये जो नौखी गल्ला, जो तूँ सुणाएया, क्या ए? 20कऊँकि तूँ आसा खे नऊखिया ई गल्ला सुणाएया, इजी री खातर आसे जाणना चाऊँए कि इना रा मतलब क्या ए?” 21(कऊँकि बऊत सारे एथेंस रे लोक और परदेशी जो तेती रओ थे, नईया-नईया गल्ला बोलणे और सुणने ते अलावा ओर कोई बी कामो रे आपणा बखत नि बिताओ थे।)
अरियुपगुस री सभा रे पौलुसो रा पाषण
22तेबे पौलुसे अरियुपगुस प्रार्थना रे कअरो रे खड़े ऊई की बोलेया, “ओ एथेंस नगरो रे लोको! आऊँ देखूँआ कि तुसे हर गल्ला रे देवतेया खे बड़ा मानणे वाल़े ए। 23कऊँकि जेबे आऊँ कूमदे-फिरदे ऊए तुसा री पूजणे रिया चीजा खे देखणे लगी रा था, तेबे एक एड़ी बेदी बी देखी, जेतेरे लिखी राखेया रा था, अणजाणे ईश्वरो खे। तो जेसखे तुसे बिना जाणे पूजोए, आऊँ तुसा खे तेसरा समाचार सुणाऊँआ।
24“जिने परमेशरे तरती और तिजी री हर चीज बणाई, से स्वर्ग और तरतिया रा स्वामी ऊई की आथो रे बणाए रे मन्दरो रे नि रंदा 25और ना ई किजी बी चीजा ते मतलब राखी की माणूंआ रे आथो री सेवा लओआ, कऊँकि से आपू ई सबी खे जीवन, श्वास और सब कुछ देओआ। 26तिने एक ई मूल़ो ते माणूंआ री सब जातिया, सारी तरतिया रे रणे खे बणाई राखिया और तिना रे बणाए रे बखत और रणे री सीमा इजी री खातर बानी राखिया। 27परमेशरे एड़ा तेबे कित्तेया ताकि लोक तेसखे टोल़ो, उम्मीद राखो कि तेसखे टटोल़ी की पायी सकोए, तेबे बी से आसा बीचा ते केसी ते बी दूर निए। 28कऊँकि आसे तेसदे ई जिऊँदे, चलदे-फिरदे और खड़े रऊँए, जेड़ा तुसा रे कितणे कविये बी बोली राखेया कि, आसे तो तेसरे ई वंश ए। 29तेबे परमेशरो रा वंश ऊई की आसा खे ये समजणा ठीक निए कि ईश्वर, सूईना, रूपा या पात्थरो जेड़ा ए, जो माणूंआ री कारीगरिया ते और सोच-विचारा ते गढ़ी राखे।
30“तेबेई परमेशरे लोका री अज्ञानता रे बखतो खे त्यान नि दित्तेया, पर एबे हर जगा रे सबी माणूंआ खे मन फिराणे री आज्ञा देओआ। 31कऊँकि तिने एक दिन बणाई राखेया, जिदे तेस, तेस माणूंए रे जरिए तर्मो साथे एसा दुनिया रा न्याय करना, जो तिने बणाई राखी और तेसखे मरे रेया बीचा ते जिऊँदा करी की ये गल्ल सबी पाँदे परमाणित करी ती री।” 32मरे रेया दुबारा जिऊँदा ऊणे री गल्ल सुणी की बऊत जणे तेसरा मजाक करने लगे और बऊत जणे बोलणे लगे, “ये गल्ल आसे तांते फेर कदी सुणुंगे।” 33तेबे पौलुस तिना बीचा ते निकल़ी गा। 34पर कई सारे माणूं तेस साथे मिली गे और तिने प्रभु यीशुए पाँदे विश्वास कित्तेया, जिना बीचा ते दियुनुसियुस अरियुपगुस था और दमरिस नाओं री एक जवाणस थी और तिना साथे ओर बी बऊत माणूं थे।
اکنون انتخاب شده:
प्रेरिता रे काम 17: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.
