MATIU 24
24
Yesu Lɔ Ngewɔ Wɛlei Wolola Hugɛma
(Mak 13.1-2; Luk 21.5-6)
1Kia Yesu i gbuani Ngewɔ Wɛlei bu i yɛ lima, ngi gaalopoisia ti wailɔ ngi gama, ta pɛlei nasia gɛ a ngie ti looni. 2Yesu i kpɛmboilɔ yɛ, “Tɔnya le, kungɔi wu jisia kpɛlɛɛ gbe; kɛɛ gbɛɛ ngi hugɛ a wue, kɔtu yakpe bɛɛ ɛɛ lo mbei laani ngi mbaa maahu, ta ti kpɛlɛɛ wololɔ ti ti gula.”
Kpundɛi Kɛɛ Juwuya Nyamui
(Mak 13.3-13; Luk 21.7-19)
3Kia Yesu i yɛ heini ɔlivi Yiyei wumba, ngi gaalopoisia ti wɛilɔ ngi gama, tia lekee, tɛɛ, “Hugɛ a mue migbe lɔ ji a wie tawao gbɔɔ a wie kɛva kɛ bi wa-gbelei i hitinga kɛɛ haa-hindeisia ti gbɔyɔlei.”
4Yesu kpɛmboilɔ yɛ, “A wu mahugbe numu gbi aa wu yaka. 5Gbamaile numu gboto ta walɔ ta nya biyei wumbu, ta nde tɛɛ, ‘Ngewɔ Maha Heingɔi lɔ a nge!’ tawao ta numu gboto yakalɔ. 6Wa kɔisia gɔwoi mɛnilɔ wu gblanga kɛɛ kɔisia ti malɔwɔi kuhama; kɛɛ wu lii aa hɛlɛ; ajifa hindei jisia nyɔkɔ ta wielɔ huɛɛŋ kɛɛ tɛɛ kɛ kɛ kɛlɛmɛi i hitinga ma. 7Kɛnyɛisia ta gɔlɔ a ti nyɔunyɔ, ndɔleisia ta lapi a ti nyɔunyɔ. Ndɔleisia ta walɔ tawao ndɔɔlei a gbɛlilɔ hu gbi; 8Hindei jisia kpɛlɛɛ ta wielɔ kia ndo-le-goohu-gbalei lɔtomɛi i na.
9“Yeewatii na, wu juwuisia ta wu houlɔ ti wu ve mahubleisia wɛ kpalɛ lava wu ma kɛɛ wu waava. Nuuvui gbi ta lololɔ a wue jifa wu langɔ a nge. 10Nya woomablaa gboto ta gbelɔ a lala a nge; ta ti nyɔunyɔ velɔ, ti lolo a ti nyɔunyɔ. 11Ndɛɛ Yewɔ lutui gboto ta gbɔkulɔ tawao ta numu gboto yakalɔ. 12Jifa hinda nyamu wielei a gulɔ hu gbi, ndomɛi na numu gboto ti piengɔ a ti nyɔunyɔ, hu a haalɔ. 13Kɛɛ numui na a liilo i to yeekɛlɛmɛi a bawolɔ. 14Tawao Ngowili Yekpei ji kɔlooni Ngewɔ Mahayɛi ma a lelɔ dunyei hu gbi aako numui gbi ti mɛni; na wooma kɛ haa-hindeisia ti gɛlɛmɛi i hitinga.
Hunyani Maluwangɔ Wa A Wielɔ
(Mak 13.14-23; Luk 21.20-24)
15 #
Dan 9.27; 11.31; 12.11 “Wu hunyanimɔ maluwangɔi na lɔngalɔ Ngewɔ lutui Daniɛl i ngi yɛpɛ leni, i looni Ngewɔ Wɛlei Wai bu (kɔlɛi ji gaamɔi i ji yeembui gɔɔ), 16nungei nasia ta yɛ Judia lɔlei hu ti wila ti lɛ ngiyeisia hu. 17Numui na a yɛ ngi wɛlei wumba, aa hitɛ ngi mahaakeisia wumbuva pɛlei bu. 18Numui na a yɛ kpalɛi hu aa yaama ngi lomɛi wooma. 19A yɛ nyamuni kpa foloi nasia ma koonyahangɛisia va kɛɛ koimɛisia! 20A Ngewɔ vɛli wu wilalɛi aa yɛ a haamɛi ɔɔ Ndɛvu Volei. 21#Dan 12.1 Ajifa watii na yeendimɔnɛi nyɔkɔ ii yaa yɛni wɔɔ na, i hiye dunyei lɔto-gbelei ma i to kiahuna ma, tawao ɛɛ yɛ na kunafɔ. 22Kɛɛ Ngewɔ i yeelɔwɔi maahu gbuanga; ina na ii le numu gbi ii yɛ bawo. Kɛɛ nasia va i loko longa ti ma ti bawova, a yeelɔwɔi maahu gbualɔ.
23“A watii na, numu gbi i ndengaa wu ma yɛ, ‘A wote, Ngewɔ Maha Heingɔi gbe mbei!’ ɔɔ ‘Ta gbe mia!’ waa la a ngie. 24Gbamaile ndɛɛ Yewɔ Maha Heingɔisia kɛɛ ndɛɛ Yewɔ lutuisia ta gbɔkulɔ tawao ta kabande hinda waawaangaa wielɔ aako nasia vulii bɛɛ Ngewɔ i loko longa ti ma ti bawova ti ti yaka, ina ti guilɔ. 25A wolo! I longa kulɔ ngi ji hugɛnga a wue.
26“Faale, nungaa ti ndengaa tɛɛ, ‘A wote, taa ndɔgbɔ lambɛi ma!’ waa li na; ti ndengaa tɛɛ, ‘Taa pɛlei ji bu!’ waa la la. 27Ajifa nya nya Nuuvu Hindoloi nga walɔ kia ngelei a baahugbua ngelei ma i hiye ngejahu i foo gɔwɔhu.
28“Hinda gbi lekee pomɛi i na, na lɔ yibɛisia ta gbɔtɔ na.
Nuuvu Hindoloi Walei
(Mak 13.24-27; Luk 21.25-28)
29 #
Ais 13.10; Joe 2.10,31; 3.15; Ɛji 32.7 “Foloi nasia yeendimɔnɛi i lewengaa lekee, foloi a gbindilɔ, ngalui ɛɛ voo; tumbekeisia ta gbualɔ ngelei ma ti gula tawao kpayei nasia ti ngelei ma ta gbɛlilɔ ti gbua ti jia-weleisia ma. 30#Dan 7.13; Sak 12.10-14 A watii na, Nuuvu Hindoloi walei yeetɔmaseli a gɛlɔ ngelei ma tawao kɛnyɛi gbi dunyei hu ta wɔlɔ ji ta nya nya Numu Hindoloi lɔ nga wa njagbili hu ngelei ma a kpaya waa kɛɛ temaya. 31Bulu wai a yialɔ kɛ i ngi malikeisia vayanga hu tawao ta nasia lɛlɔ ma i loko longa ti ma ti bawova ta gbua dunyei luwuma gbi.
Kaai Na Figi Wulii I Kɛni
(Mak 13.28-31; Luk 21.29-33)
32“A kaa wumbu figi wulii ma; ngi bekeisia ti wundungaa, i tɔtoo a ndawa gbuala kɛ wu kɔɔnga kɛ haamɛi lɔ wama. 33Hii lɔɔ hindei na wieyii i na, wu hindei jisia kpɛlɛɛ lɔnga ti wiema, wa kɔɔlɔ kɛ ngi fongɔ jɔngɔ le pɛlei laama. 34Gbɛɛ ngi nde wu ma a tɔnya kɛ hindei jisia kpɛlɛɛ ta wie pɛiŋ nuuvui nasia ti na kiahuna ti yaa gbɔyɔ a haala. 35Ngelegoohu tia dunyei ta gbɔyɔlɔ kɛɛ nya layie ɛɛ nyani.
Numu Gbi Ii Lɔwɔi Na Gɔɔ
(Mak 13.32-37; Luk 17.26-30,34-36)
36“Kɛɛ numu gbi ii kɔɔ migbe lɔ lɔwɔi na a hiti ma, malikeisia vulii bɛɛ ti ngelegoohu tii kɔɔ; nya nya Ngewɔ Hindoloi ngii kɔɔ, mu Kɛkɛ Ngewɔ yakpe mia i kɔɔngɔ. 37#Jɛn 6.5-8 Kia i wieni Noa watii hu, hii a wie Nuuvu Hindoloi wa-gbelei ma. 38Ajifa pɛiŋ wɔɔ njavei i yaa waa, nungaa ti yɛlɔ a mɛhɛɛ mɛ, ta ndɔ gboli, ta nyahangaa jɔɔ, ta nyahangaa ve hiingaa wɛ, i to foloi na ma Noa i wuaani ndɛndɛi hu. 39#Jɛn 7.6-24 Tii yɛ magɔni gbɔɔ i wiema i lohu njavei i wa i ti gbi waa. Hii mia a wie a nya nya Nuuvu Hindoloi nya wa-gbelei. 40Yeewatii na, numu fele ta yɛlɔ yengema kpalɛi hu; nya Nuuvu Hindoloi nya malikeisia ta yeengila wumbulɔ, yeena i lo. 41Nyaha fele ta yɛlɔ mbei hiyama; ta yeengila wumbulɔ, yeena i lo. 42Faale, wu valangɔ i yɛla, gbamaile wuii foloi na gɔɔ nya wu Lemɔi a nge nga wa. 43Kɛɛ a ji gɔɔ, ina pɛlɛmɔi i yɛ kɔɛilɔ kpindi yeemigbe lɔ humamɔi i wama, ii yɛ yii tawao ii yɛ luma humamɔi aa wili pɛlei bu. 44Faale wu valangɔ i yɛla kpele gbi, ajifa nya nya Nuuvu Hindoloi nga wa a watii na lɔ wu lii gbi ii ma.
Bɔilopo Golongɔi
(Luk 12.41-48)
45“Ye lɔ hɔɔ bɔilopo golongɔ nɛmahulewengɔi le, na ngi lemɔi i ngi loni bɔilopo wekeisia maahu ti mɛhɛɛ veva ti wɛ yeewatii ma. 46Bɔilopoi na lubangɔe ngi lemɔi a wa i male i piema hii. 47A tɔnya, ngi hugɛ a wue, ndemɔi na a ngi yeyahani gbi loko wuaalɔ bɔilopoi na yeya. 48Kɛɛ ina bɔilopo nyamu mia a ngie, a ndelɔ ta yekpe ma yɛ, ‘Nya lemɔi ii humbuma a wa,’ 49tawao a tɔtolɔ a ngi mbaa bɔilopoisia lewela, a mɛhɛɛ mɛ, a ndɔ gboli tia ndɔhoubleisia. 50Kɛɛ yeebɔilopoi ji ngi lemɔi a walɔ folo yila ma ngi lii gbi ɛɛ yɛ ngi walaa ma kɛɛ hawei ma ii kɔɔ. 51Ngi lemɔi a kpalɛ waa lalɔ ngi ma, i ngi wili baayablɛisia lia. Na lɔ a yɛ na a wɔɔ, a ngi yɔngɔlii yaamɛ.
اکنون انتخاب شده:
MATIU 24: MENNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mende New Testament © The Bible Society of Sierra Leone, 2002.
