Ko-Dabirɛnu 39
39
Yusufu anubɛ Pɔtifala Musi Wara-Koe
1Yilanu tara Yusufu la Iyipiti nyamanɛ rɔ tumɛ min, anu ya a mayira Iyipiti mansa-makandanna-kun-tigi ma min tɔgɛ Pɔtifa.
2 #
Kɛwɔlɛnu 7.9
Mari tora Yusufu fɛ ka ata duwɛ layigi a kuma. A wara-koe tora tala yarɔ. A tora sigini a tigi Pɔtifa warɛ bɔn la Iyipiti nyamanɛ rɔ. 3A tigi wo ya a yen ko Mari ye Yusufu fɛ koe bɛɛ rɔ bawo Yusufu wa a bole don fenfen tɔ, Mari si wo lasabati. 4Yusufu wara-koe ya Pɔtifa hɛnɛ woletɔ a ya a ma ala wɔli-kɛla-kun-tigi la. Pɔtifa ya a bolo-fan bɛɛsi latenbi a ma fanan. 5-6Pɔtifa banta Yusufu mala kun-tigi la ala wɔli-kɛlɛ anubɛ a bolo-fannu kun na tumɛ min, Marita duwɛ tora Pɔtifa kuma ka a bolo-fan bɛɛsi lasabati Yusufula ko la. Pɔtifa bolo ma taran fenfen na, fɔ a ye min dɔnna dɔrɔn!
Yusufu so-gban anubɛ a yakɔrɛ kin. 7Wati do, Pɔtifala musi yɛ bɔra Yusufu la. A ya a fɔ Yusufu ye ko, “Na, ma ni ma sa.”
8Kɔnɔ a ya a ban a tigila musi bolo ka a fɔ a ye ko, “Ila kei ara a bolo-fan bɛɛsi latenbi n ma. Ala ko-wo-ko sa a bolo-fannu bara-koe rɔ. A ara wo lanayɛ di n ma. 9Ila kei ara a ma, ma ra ara kɛnya bɔn kɛ la. A ma fenfen namara a nyɛrɛ ye, fɔ ile. Nde si nfen ko-yogomɛ ma n tigi wola musi la? Ni nde ya wo ma, n bara bila Alla la.” 10Hali wo, tele-wo-tele, musi wo tora Yusufu madiyala sɔn-yogoya kɛ-koe la. Kɔnɔ Yusufu ma sɔn a bolo mumɛ!
11Lunyɛ do, Yusufu tanɛ bɔn la ata wɔli-kɛ-tinɛ, a ma wɔli-kɛlɛ fenfen taran nyɔ. 12Pɔtifala musi wo ya ala duruki bira a ma warata! A ko, “Na, i sa n fɛ.” Yusufu ya ala duruki to a bole la. A burimatoe bɔra a kuma bɔn la.
13Musi ya a yen min kɛ, a ara ala duruki to a bole la, a burimatoe ara bɔ, 14a worondora ka wɔli-kɛlɛnu takele. Wɔli-kɛlɛ wonu nanɛ, a ya a fɔ wonu ye ko, “Wo ni duruki kɛ mafɛlɛn. Nna kei ara na Hiburu keminɛ min na kɛ la, wo le wara na n nafɛya tinɛ kɛ la. A ara don n kuma. A ko a ni digin nde ma. Woletɔ n fanan gbele-gbelenta ha wo ara na. 15N gbele-gbelenta wati min, a burimatoe bɔra ka ala duruki to n bole la.”
16Musi wo ya Yusufula duruki wo lamara ala kei Pɔtifa yarɔ. 17Ala kei nanɛ, koe min bɛɛ tenbira anubɛ Yusufu tɛma, a ya wo dantɛgɛlɛ sa ala kei ye ko, “I nara Hiburu yɔɔn-keminɛ min na, wo le donta n kuma ka n nafɛya. 18Kɔnɔ n gbele-gbelenta tumɛ min, a ya ala duruki to n dafɛ. A burimatoe bɔra luyi ma.”
19Yusufu tigi Pɔtifa ya kumɛ wo lamɔɛn ala musi la tumɛ min, a yisi bɔra dɔgɔma-ma-de! 20Pɔtifa ya Yusufu bi ka a ladon yele la, mansɛta yelela-mɔgɛnu bi kan min. 21#Kɛwɔlɛnu 7.9 Kɔnɔ hali Yusufu ye yele wo la, Mari ye a fɛ. Mari ya a ma, yele-kandanna-kun-tigi min bi nyɔ, a diyara wo ye koikoi! 22Wɔlɛ min bɛɛsi ye kɛla yele la, anubɛ yelela-mɔgɛnu, yele-kandanna-kun-tigi wo ya Yusufu ma wonu kunyɛ la. 23Kun-tigi wo ma hɔn fenfen na tun. A ya yelela-koe bɛɛsi to Yusufu bolo kamasɔrɔn a ara a lɔn ko Mari ye Yusufu fɛ. Yusufu ya min bɛɛ kɛ, Mari ya wo lasabati.
اکنون انتخاب شده:
Ko-Dabirɛnu 39: KCLB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kuranko Common Language Bible © The Bible Society in Sierra Leone, 2006.