Ko-Dabirɛnu 33
33
Kɛlɛ Ban-Koe Yakoba anubɛ Isɔ Tɛma
1Yakoba ya Isɔ anubɛ kei mɔgɔ kɛmɛ nani yen nala tumɛ min, a ya ala dan bɛɛsi lata anu nanu ma, Liya anubɛ Resɛli anubɛ anuna solo-dununa filɛ, kɔni. 2A ya solo-dununɛnu anubɛ anuna dannu fɔlɔn sɔ anu yarɔ. A ya Liya anubɛ ala dannu tugu wonu na. A ya ala bara-musi Resɛli anubɛ ala den Yusufu to a laban la. 3Anu gbɛrɛn anu nyɔgɔn ma, Yakoba tenbira ala denbayɛ yarɔ. A tara a kunyɛ madula a kɔrɔ Isɔ kɔrɔ iko wɔrɔnfila ka a kɔndɔn.
4Kɔnɔ Isɔ burimatoe fanan tara ka a labɛn gbuturu diyanayɛ rɔ. Anu mɔgɔ filɛ dira biribiri! 5Isɔ ya a yɛ lata a dɔgɛ kɔma kilɛ la ka musu-nyama anubɛ den-siyamɛ kɛnu mafɛlɛn, a ko, “Yakoba, yonna mɔgɛ ye kɛ damasi la?”
Yakoba ko, “Alla le ya ko-nyimɛ kɛ n ye ka dan kɛ dama di nde, ila wɔli-kɛlɛ ma.”
6Solo-dununɛnu anubɛ anuna dannu fɔlɔn nara ka anu nyɛnkin Isɔ kɔrɔ ka a kɔndɔn. 7Wo kɔma, Liya anubɛ ala dannu fanan nara ka anu nyɛnkin Isɔ kɔrɔ ka a kɔndɔn. A laban, Yusufu anubɛ a na Resɛli nara ka anu nyɛnkin Isɔ kɔrɔ ka a kɔndɔn.
8Isɔ ya Yakoba manyinika ko, “N bɛnta kolo-fen-siyamɛ minnu na, i ya wonu nata i yarɔ nfenna?”
Yakoba ya a yabi ko, “N bara wonu nata alako n ni yisi-kimɛ sɔrɔn ile, n tigi bolo.”
9Isɔ ko, “N dɔgɛ, i yisi-kimɛ. Min bi n bolo, wo ara n hɛnɛ. Ita nɔnfuli ni to i bolo, yɔ!”
10Yakoba ko, “Ade, n bi i madiyala, ni n bara-koe ara i hɛnɛ, i yandi, i sanbɛnu bira n bolo wo rɔ. Ka tonyɛ fɔ, n bara i yakɔrɔ-nyimɛ yen n bara-la iko Alla kolonkɛ. 11I yandi, n bi i madiyala, n nara sanbɛ minnu na i ye, i ni wonu bira n bolo. Alla ara hɛrɛ di n ma ka n makoe bɛɛ nyinya.” A tora Isɔ madiyala. A laban, Isɔ ya a sanbɛ wonu bira.
12Isɔ ya a fɔ a ye ko, “Ma wuli le gbɛ! Nde si sɔ i yarɔ.”
13Kɔnɔ Yakoba ya a fɔ a ye ko, “I ya a lɔn ko nta dennɛnu kian ra ma gbɛlɛ tagama tinɛ. Kolo-fen-denbɛnu bi n bolo fanan. Ni mɔgɔ telenta anu nagbengbenna gbɛn, kolo-fen-dan wo dama si faga. 14Min fisa, i ni ta ma yarɔ. N si to anu nagbengbenna doni-doninyɛ ma. N si i taran Idɔm nyamanɛ rɔ.”
15Isɔ ya a fɔ a ye ko, “N si nna wɔli-kɛlɛ donu to i fɛ.”
Kɔnɔ Yakoba ko, “N kɔrɔ, hali i ma mɔgɔ to yan. Alako tun, ni i ya i yakɔrɔ-nyimɛ yira n na, wo di n ye.”
16Woletɔ Isɔ sɛgira Idɔm nyamanɛ rɔ. 17Kɔnɔ Yakoba tara a sigi fɔ kan tinɛ do min tɔgɛ Sukɔti ka bɔn sɔ a nyɛrɛ ye nyɔ. A ya lelenu#33.17 Lele: Kurankɔɛ donu si a fɔ ko, “lole,” ni wo ma, “gba.” burun ala kolo-fannu ye nyɔ, woletɔ kan tinɛ wo tɔgɛ sara ko Sukɔti bawo wo kɔrɛ le, “Lele.”
18Yakoba bɔra Mɛsopotemiya nyamanɛ rɔ tumɛ min, a yisi-kimanɛ tara ha Sɛkɛm soe burɔ Kenan nyamanɛ rɔ. 19#Yasowa 24.32; Yɔni 4.5 Kei min tɔgɛ sara Sɛkɛm soe kɛ kuma, wo fa tɔgɛ le Hemori. Yakoba ya dugu-kundi san Hemori sɔrɛ ma wodi-gbɛ-gbu kɛmɛ la. A ya a daga makɛ nyɔ. 20Yakoba ya saraka-mintan-tinɛ sɔ nyɔ ka a tɔgɔ sa “Isirɛlata Alla Sɛnbɛ-Bɛɛ-Tigi Le.”
اکنون انتخاب شده:
Ko-Dabirɛnu 33: KCLB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kuranko Common Language Bible © The Bible Society in Sierra Leone, 2006.