Ko-Dabirɛnu 12
12
Burama Kele-Koe Mari Bolo
1 #
Kɛwɔlɛnu 7.2-3; Hiburunu 11.8 Mari ya a fɔ Burama ye ko, “I fa anubɛ ala denbayɛnu boloka anubɛ i bɔnsɔn ka i bɔ ila nyamanɛ rɔ ka ta nyamani-gbɛrɛkɛ rɔ n si na min yira i la. 2N si i sibole lasiyaya ka wonu bɔnsɔn fanan nasiyaya. N si nta duwɛ layigi i kuma ka i ma tɔgɔ-tigi-wɛ anubɛ duwa-tigi la.
3 #
Kalesiya 3.8
Min ba duwa i ye, nta duwɛ si to wo kuma.
Min ba i danka, n si wo danka.
Duninya-mɔgɛ bɛɛ si duwɛ sɔrɔn ile fɛ.”
4-5Woletɔ Burama wulita ka ta iko Mari ya a fɔ a ye nya min. Burama ye bɔla Hɛran soe burɔ tumɛ min, a sɔrɔn ara san bi-wɔrɔnfila ani san loli (75) le bɔ. Burama ya ala musi Sirayi bi anubɛ ala yɔɔnnu anubɛ anu bolo-fan damasi. A kɔrɔla dan Lɔti tara anu fɛ. Anu wulita ka ta Kenan nyamanɛ rɔ.
Anu ke Kenan nyamanɛ rɔ, 6ale Burama ya nyɔ ratagama ha ka ta ke Morela kɔlɔma-kuru-latankanɛ do kɔrɔ min bi Sɛkɛm soe dafɛ. Kenan kɛnu bi nyamanɛ wo rɔ wo wati rɔ. 7#Kɛwɔlɛnu 7.5; Kalesiya 3.16 Mari bɔra gbɛ rɔ Burama ye, a ko, “N bi nyamanɛ min dila i sibolenu ma, wo le kɛ la.” Woletɔ Burama ya saraka-mintan-tinɛ sɔ Mari ye nyɔ.
8Wo kɔma, a bɔra nyɔ ka ta Bɛtɛli soe tele-bɔɛ wara la kɔnkɛnu siya kan min. Anu ya anu daga makɛ Bɛtɛli soe anubɛ Eyai soe tɛma. A ya saraka-mintan-tinɛ do fanan sɔ Mari ye nyɔ. A ya baraka bira a ye ka a bato. 9Burama tora tala a yarɔ ka yilan-yilan nyamanɛ wo rɔ dugu la wara la.
Burama Ta-Koe Iyipiti
10A ma mɛ kɔnkɔ-fitinɛ burunta Kenan nyamanɛ wo kuma bɛff! Wo le ya a to, Burama wulita ka ta Iyipiti nyamanɛ rɔ alako a ni wati-kundu-ni kɛ nyɔ. 11A gbɛrɛnta Iyipiti nyamanɛ ma tumɛ min, a ya a fɔ ala musi Sirayi ye ko, “N ya a lɔn ko musu-kinyanɛ le ile la, ado i mafɛlɛn di. 12Iyipiti kɛnu ba i yen tumɛ min, anu si a fɔ ko nna musi le ile la. Ila kinyɛ si a ma, anu ni i bi n bolo ka nde faga. 13#Ko-Dabirɛnu 20.2, 12; 26.7 I ni a fɔ anu ye ko nde tirisan-musi le ile la. I ni a ma, n ni kisi i fɛ. I ni a ma, anu ni n tabira a kin na!”
14Burama kera Iyipiti tumɛ min, Iyipiti mɔgɛnu ya musi wo yen nkɛkuna, anu yɛ bɔra a la. 15Iyipiti mansɛla mɔgɔ-banu ya Sirayi yen tumɛ min, anu ya a matɔgɔ ale mansɛ ye. Anu ya Sirayi bi ka ta a la mansɛ wara. 16A ya Burama rabira a kin na Sirayila ko la. Ale mansɛ ya yɔɔnnu di Burama ma anubɛ sagɛnu anubɛ ninkinu anubɛ sofɛlɛnu anubɛ nyomɛnu.
17Kɔnɔ Mari ya kiraya-fitina-wɛ layigi ale mansɛ anubɛ ala denbayɛ kuma Buramala musi Sirayila ko la. 18Woletɔ mansɛ wo ya Burama kele ka a manyinika ko, “I wara nfen ma n na kɛ la? Nfenna i ma a fɔ n ye nun ko ila musi le? 19Nfenna i ya a fɔ n ye ko i tirisan-musi le ha nde ara a bi ka a ladon nna bɔn la? Nba, i ma ila musi yen? A bi. I ni ta a la i warɛ nyamanɛ rɔ.”
20Mansɛla mɔgɛnu ya ale anubɛ ala musi anubɛ a bolo-fan bɛɛsi labɔ anuna nyamanɛ rɔ iko ale mansɛ ya a fɔ nya min nun.
اکنون انتخاب شده:
Ko-Dabirɛnu 12: KCLB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kuranko Common Language Bible © The Bible Society in Sierra Leone, 2006.