Va le Galatiya 1
1
Kuxeweta
1Mina Pawulo ninga mupostola, kungali hi kuhlawuliwa hi vanhu kumbe kurhumiwa hi munhu, kambe hi kurhumiwa hi Yesu Kriste ni Xikwembu Tatana lweyi amupfuxeke xikarhi ka vafi, 2nitsala na nili ni vamakwerhu hinkwavu lavanga na mina halenu, hitsalela tikereke ta Galatiya, hili:
3Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Yesu Kriste, 4yena lweyi atinyiketeke hikolaho ka svijoho sva hina, lesvaku atahiponisa ka nguva leyobiha ya masiku lawa. Ayendle svosvo hi kuyingisa kurhandza ka Xikwembu Tatana wa hina; 5Ka xona akuve kudzuneka hilaha kungaheliki! Amen.
Aku na Evhangeli yin'wana
6Manihlamalisa: Hi nkamanyana wutsongo, mifularhele lweyi amivitaneke hi timpsalu ta Kriste, kutani mitsutsumela ka evhangeli yin'wana. 7Kasi Evhangeli yin'wana ayikona. Nihlaya lesvi hikuva ku ni van'wana lava vamipfilunganyisaka tinhloko, lavaringetaka kujikisa Evhangeli ya Kriste.
8Kambe hambi loko hina kumbe ntsumi yohuma tilweni, hingatshuka himijondzisa Evhangeli yin'wana handle ka leyi hitshamaka himijondzisa yona, mujondzisi wotanu aarhukiwe! 9Kufana ni lesvi hitshamaka himibzela, ni svosvi nitlhela nakambe niku: Loko mun'wana amijondzisa Evhangeli yin'wana handle ka leyi miyiyamukeleke, aarhukiwe!
10Xana svosvi svikomba lesvaku ninavela kukhensiwa hi vanhu kumbe hi Xikwembu ke? Xana ni vonaka na nili lweyi aringetaka kutsakisa vanhu ke? Loko onge naharingeta kuyendla svosvo, aningatava mutirhi wa Kriste.
Hilaha Pawulo ahundzukeke mupostola hakona
11Namitsundzuxa, vamakwerhu, lesvaku Evhangeli leyi nimijondziseke yona, ayihumanga ka vanhu. 12Aniyikumanga ka munhu ni mun'we, anga kona ni mun'we lweyi anijondziseke yona. Yesu Kriste hi xiviri xa yena, hi yena lweyi angayihlavutela ka mina.
13 # Vona ni: Mint. 8:3; 22:4-5; 26:9-11. Mitwile lesvi anihanyisa svona khale, loko na ha hanya Xiyuda. Mitiva hilaha ningaxanisa ni kuhelisa kereke ya Xikwembu hakona, ningatsetseleli munhu. 14#Vona ni: Mint. 22:3. Hikuhanya Xiyuda, anitlula lavotala vatintanga ta mina xikarhi ka va ka hina, nili karhi nihisekela ngopfu mikhuva ya vatatana va hina.
15Kambe Xikwembu lexi xinihlawuleke na ningasi velekiwa, xinivitanile hi timpsalu ta xona; 16xisvitsakelile kuhlavutela N'wana wa xona ka mina, lesvaku nitamutwalisa ndzeni ka vamatiko. Nkameni wolowo, anivutisanga munhu, 17na svona, anitlhantukelanga Yerusalema ka lava vanganirhangela kuva vapostola, kambe niyile xikan'we le Arabiya, ndzhaku nivuyela Damaska.
18 # Vona ni: Mint. 9:26-30. Kutani, ndzhaku ka malembe manharhu, hi kona ni tlhantukeleke Yerusalema kuyavonana na Petrosi, kutani nixwe na yena masiku ya khume na ntlhanu. 19Kambe anivonananga na mun'we wa vapostola lavan'wana, handle ka Yakobe makwavu wa Hosi. 20Timhaka leti nimitsalelaka tona titiyile, nihlaya svosvo mahlweni ka Xikwembu, anihembi.
21Ndzhaku ka svona niyile matlhelweni ya Siriya na Kilikiya. 22Kambe nkameni wolowo, tikereke ta Kriste letinga Yudeya, atingasinivona hi mahlo; 23ntsena atitwile van'wana loko vaku: “Munhu lweyi khale aahixanisa ni kuringeta kuhelisa ta kupfumela, svosvi ajondzisa tona.” 24Kutani atidzunisa Xikwembu hikolaho ka mina.
اکنون انتخاب شده:
Va le Galatiya 1: NTC2014
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Novo Testamento Changana © Bible Society of Mozambique, 2014.