Roma 15
15
“Honu’gwarek henebaget tu erlakma en, henarilak honorokhwi onogola opsogo togulom o,” oluk mo’gulentesi wene
1Nis logon, nenede Allah pam hurlesogo he’berik welege a’ge en, nonu’gwarek nenebaget nak nonogola opsogo tu erlakma en, we, is logon enede owan o’borlogouk oruak a’ge ai, lerontogulom o. 2-3#Mzm. 69:9Allah iak pam wene disogo oluk pelal wokho pegesa,
“Hat Allah wene yakhegisa a’ge re, an nebam aga o,”
oluk pelal wokho pegesa hegitsogoat, at Kristus en e, u’gwarek ebaget ogola agai hasu leigoluk taga laga erlak. Ai en, nis nenebe lo’bok en e, nenarilak nonorokhwi enede Allah pam he’berik poluk enede hurle emarik op emagoluk, onogola opsogo togu lomok o. 4Allah iak pelal wogo ai pam e, nenepe mosogo welat, nonogola op agalat, togu lege ai en e,
“Op ema o,” oluk Allah pam eberak welemagoluk, nisat nenesa’go wusogo Allah iak pam pageat pelal wokho pegesa ai o.
5-6His henede, heniak, mesigat welat, nonue ’gain Onuk Logo a’ge aik Allah aiat erliktogu lorogup en e, at Allah aphwami enebabut enepe mosogo welemagoluk tagenebasulat, onogola obabenebiselat, tago a’ge ai enat, his ’berlegat henede mesigat, at Kristus Yesus ebabut ’gela’ge takhonobouwak o.
“Op wene ai, aphwami o’borl o’gwe a’ge enesa’go holu elirat o,” oluk mo’gulentesi wene
7Aphwami en at Allah erliktogu lemagoluk, at Kristus en his henebe wokhenebegei ’gela’ge, his pema en is logon wogonobogulat, is pema en his logon wokhonobogulat, his-his wok-wok togu lomup o. 8Wene ai paget mesik mo’gulhentaik. At Kristus wagarik e, is enagap ene’gerlimu a’ge ’belak Yahudi a’ge ebano eneragam ’gwegei o. Asogo ’gwegei ai re, Allah en e,
“An en disogo tagenebaik o,” oluk nene’balak obok mo’gulentasu laga a’ge ano demat agalat, 9#2Sam. 22:50; Mzm. 18:49ye, is aphwami o’borl o’gwe a’ge en Allah en edeabenebesi ai en erliktogulat, tuagoluk, Yahudi a’ge eneragam ’gwegei ai o. Wene ai paget Allah iak pam pelal disogo oluk wokho pegesema oruak,
“Ai en e, an is aphwami o’borl o’gwe a’ge ene’gerlak o’gwe welat, hat erlikhebiselat,
weni weriselat horogole wasulat, taga leik o,”
oluk egeimu pelal wokho pegesa. 10#Ula. 32:43Mesik disogo egeimu pelal wogo oruagat,
“His aphwami o’borl o’gwe a’ge is Allah eiyagai at en poligenebesi a’ge enemin honogola henagai hogu lomup o,”
oluk egeimu pelal wokho pegesayat. 11#Mzm. 117:1Ye, mesik e, wene disogo egei,
“His aphwami o’borl o’gwe a’ge ’berlegat nonue ’gain Onuk Logo a’ge erliktogulat,
hena’gul onuk lo’bok en at erliktogulat,
togu lomup o,”
oluk egesema pelal wokho pegesayat. 12#Yes. 11:10Ye, mesik e, at Yesaya en e, disogo oluk pelal wokho pesiat,
“E morik pogwiam e, edip pam en esemis libago ’gela’ge, at Isai en dogo’gwe a’ge mesik hebarligen ema o.
Enam agoam e, is aphwami o’borl o’gwe a’ge at eragam welat,
at en obapnonobua, oluk at ebam eberak welema ani o,”
oluk pelal wokho pesi.
13“Pobuk op ema o,” oluk nonogola nenagai hogu lege ai, edip at Allah enat taknenebasu o. His asogo honogola henagai loksogo hogu lemagoluk Allah Arogun anni pam takhonobouwak o. Asogo takhonobouwagoluk e, henede at ebam he’berik pegep ai pam eberak poluk oruakma, at en honogola henagai a’bik hogu lemagoluk takhenebasulat, henede ha’bugaphenebasulat, tuak o.
Paulus en e, “Allah en yo’go nebesi ai en, op wene mo’gulentil denaga legi o,” oluk mo’gulentesi wene
14Narilak norokhwi. His henebabut op modok welat, di wene yu wene henaluk modogatma re, his-his nak henesa’go wat-wat tu elirat welegep ai, an naluk o. 15Asogo a’geat de, at Allah ebabut op en an yo’go nebesi ano pam, wene mesik ai suesi’ga ya pam nogorlok erlaksogo ebethentegis ai o. 16An nebe at Kristus Yesus eragam welat aphwami o’borl o’gwe a’ge wogonobuagoluk yo’go nebesimu, at Allah ogola opsogo Arogun ai pam is enebe Allah akhit enebaigoluk, at iak op wene ai mo’gulentil denaga legi o.
17Kristus Yesus emin hwedik welat e, Allah paget opsogo taga legi o, oluk nu’gwarek erlikhorlo elit o. 18An en wene mu a’ge mesik u re, nogorlok o. We, is aphwami o’borl o’gwe a’ge Allah en eragam onobouwagoluk e, at Kristus en yo’go noboluk wene eselat, e’gik en tagalat, til waga a’ge ai nogorlok erlaksogoat ik o. 19At ebe pobi tuagoluk di bele yu bele tagalat, erliktuagoluk di a’ge yu a’ge walhasulat, annisogoat tegei o. Allah Arogun ano anni pamat tegei ai o. Tagokhweat de, an e, o Yerusalem hwerli en da ’gwil ya ’gwil o Ilirikum hwerli eba, at Kristus wene op wene ai dokhumsogo mo’gulentil wegi. 20-21#Yes. 52:15Wene asogo oluk pelal disogo wokho pegesema oruak,
“Is aphwami pema, at obok holu erlak a’ge en enil hogulat,
ye, is wene holu erlak a’ge en pobisogo hologulat, tua o,”
oluk pelal wokho pegesa hegitsogoat mo’gulentil wagalat, is aphwami pema en e, o wa’gi delakma an en o ebe woru ’gela’ge tuano oluk, nede nagai e, aphwami Kristus onuk enesa’go owan holu erlakma etleba op wene mo’gulentil weigoluk epasu legi o.
At Paulus en o Roma laiyogoluk wene weragenebesi wene
22 #
Rom. 1:13
Wene asogo mo’gulentil denaga legi ai en, nin hwedik nan hwedigat his ’gogolhenebil hene’bek weigoluk tisokhweat de, wom mia ago yo. 23A’ge re, an o yema welat tu a’ge arat tegis o. Holuk e, o pageat etleba enat his ’gogolhenebil weigoluk nede epegirikmu re, yogodak arat weik o. 24Yogodak o Spanyol lasulat, his hene’bek til-tilat weigoluk nede epasu legi o. His hentau weiktik e, nogola nagai hasulat agauwa wei nak henemin weleiktik e, his en o Spanyol etleba peraknoboma lo epasu legi o. 25-26#1Kor. 16:1-4Is aphwami o Makedonia a’ge emin, Akhaya a’ge emin en e, is eniak la’bulogo re, is ena’ge odoksogo is aphwami Allah eiyagai ene’gikmu erlak a’ge logon o Yerusalem welagai a’ge etleba enebegesa a’ge oruak ai en, yogodak an en woluk lerentaigoluk o Yerusalem laik o. 27#1Kor. 9:11Is aphwami Yahudi a’ge en is o’borl o’gwe a’ge enebe op emagoluk Allah iak wogentigisarikmu en, is en pobuk togolik di a’ge yu a’ge onogum paget leronto hegitsogoat, asogo eniak la’bulogo enebegesa. 28Asogo arat enebegesa a’ge ai, an en is Yerusalem a’ge arat wogentai laikmu re, o Spanyol laiyogoluk wagalat, hene’bek til-til weik o. 29An arat hene’bek weik holuk e, at Kristus en his henebaget woknesi a’ge ’berlegat wokhentau weik epegi o.
30Narilak norokhwi. Nonue ’gain Onuk Logo a’ge Yesus Kristus aiat oluk, nis-nisat nede-hedesogo welemagoluk Allah Arogun en taknenebasu ano pam, an nebaget e, nemin se’ban Allah yo’go ningsogo pogu lomogoluk mo’gulhentegis o. 31Is aphwami o Yudea a’ge enede Yesus ebam he’berik po erlak a’ge en nebe ene’gik tenniouwano oluk, Allah en delnobuagoluk emin, ye, aphwami Allah eiyagai o Yerusalem a’ge enebaget odoksogo pegesa a’ge ai, woluk lerentai lasumu re, opsogo wouwagoluk emin, se’ban opsogo ogu lomup o. 32O Yerusalem laiktik en, at Allah ogola en op epasu holuk e, an nogola nagai hil-hil hene’bek weik ani o. Weiktik henemin welat e, set hwalik ani o. 33Allah en aphwami enede ha’bugaptago a’ge ano, his ’berlegat tenhentarok welemagoluk, eselat,
“Demat emak,” u ’gela’ge,
“Amin,” oluk egi ai.
اکنون انتخاب شده:
Roma 15: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید