Roma 1
1
Hau warenebegei wene
1His Allah eiyagai o Roma welegep a’ge narilak norokhwi. At Allah henebe ede a’ge ’berlegat an Paulus Yesus Kristus eragam a’ge ano en wene pelal wokho hene’bek perakpou wegi ai o. An en op wene ano aphwami mo’gulentil denaga lemagoluk, Allah en pulogo ediknebesirik peraknobou waga o. 2Nadugat Allah en e,
“Wene op wene ai, pobuk hebarligen ema o,” oluk obok is ap at iak mo’gulontogu legesa a’ge ebano mo’gulentasuam, is en Allah iak ’belak a’ge ano pam pelal wokho pogu legesa. 3-4Wene pelal wokho pegesa ai, ebe re, Allah omlogo nonue ’gain Onuk Logo a’ge Yesus Kristus pagerat o. Aphwami dagagai ’gela’ge re, ebe Daud en dogo’gwe a’ge en dagaga. A’geat de, ebe waragarikmu re, Allah Arogun en anni pam elalugap pesi ai en, Allah omlogoat o, oluk enak aga ai. 5At waragarikmu re, Allah Arogun en elalugap pesi ai re, an en di aphwami yu aphwami ena’gul onuk lo’bok enede at Yesus ebam he’berik poluk iak hologo togulom a’ge mo’gulentasuam, at onuk lok emagoluk Allah ebabut op en yo’go noboluk peraknobou waga o. 6Aphwami di aphwami yu aphwami ena’gul onuk lo’bok eba re, his aphwami o Roma a’ge henemin henebagerat o. His henebe Yesus Kristus osi emagoluk yo’go henebesiat o. 7Henebe at u’gwarek pagathorloluk yo’go henebesimu welegep o. Ai paget, an en wene pelal wokho hene’bek perakpou wagalat e,
Nenaik Allah emin, nonue ’gain Onuk Logo a’ge Yesus Kristus emin, e’birek enebabut op ano en op a’ge wokhontogulat, henede ha’buktak honobogulat, togu lemak o, oluk egi ai o.
Paulus en aphwami Roma a’ge ene’bek
laigoluk egei wene
8Narilak norokhwi. Wene ebe mo’gulhentaik en e, an naduk yu mo’gulhentaik o. Aphwami o di owi yu owi etleba en, his ’berlegat honobok op ogulat e,
“Is aphwami Roma a’ge enede Yesus ebam he’berik poluk welagai o,” oluk ogwi ai en, Yesus Kristus mo’gulotluk nak,
“Naik Allah o,” oluk hau werise legi o. 9Asogo hau weriselat e, his henebagerat mo u erlakma en se’ban osoat welegi a’ge, at Allah aluk ani o. An Allah eragam welat, op wene at omlogo taga laga wene ai aphwami mo’gulentil neselegi ai, an nede pam en ningsogoat, at Allah paget takhenebasu legi o. 10Se’ban asogo eselat e, at Allah en op opoluk,
“Is ene’bek lak o,” oluk mo’gulnotluk woknoboluk wemagoluk ’gonu mo’guloso modok welegi o. 11His henede hurle emagoluk, Allah Arogun en wogentasu a’ge ai, his logon wokhentaigoluk honobou wele, epasu legi o. 12An wokhentau wele epasu legi ai re, his emin, an emin, nenede Yesus Kristus ebam he’berik pege a’ge ai pam, nenede ago wat-wat tul en weigoluk epasu legi o. 13#Per. 19:21Narilak norokhwi. An en, aphwami o’borl o’gwe a’ge pema akhit o di owi yu owi etleba wene mo’gulentasu legimu wegesa ’gela’geat, his asogoat wagup oluk agauwa esanamat hene’bek weigoluk epasu legi a’geat de, ne’gebela ’belak en mo eselegi ai henaluk emagoluk mo’gulhentegis o. 14Aphwami di wene yu wene pobi togwi a’ge emin, pobi togwi erlak a’ge emin, se’gola tigisa a’ge emin, tu erlak a’ge emin, ’berlegat op wene mo’gulonto oluk an nebam ’belak ’gela’ge welegi o. 15Ai enat e, op wene ai his aphwami o Roma welegep a’ge eba mo’gulhentau wom nagai epasu legi o.
Op wene ai, Allah anniat o,
oluk mo’gulentesi wene
16 #
Mrk. 8:38
Op wene ai Allah anniatma re, naduk-naduk aphwami Yahudi a’ge, ye, pobuk e, aphwami Yunani a’ge, enede Yesus Kristus ebam he’berik pogwi a’ge ’berlegat delenebiso ai en e, an nogorlok erlaksogoat wene op wene ai mo’gulentil denaga legi ai o. 17#Hab. 2:4Allah en disogo egeimu pelal wokho pasulat e,
“Henede an nebam he’berik wolorogup ai pam, an en wene henebam a’ge no’gorlogo wokholuk,
nemin pobuk togolik hwedik takhenebaikmu henelaluk modok wolorogup o,”
oluk egeimu pelal wokho pegesa ’gela’geat, Allah emin pobuk togolik disogo hwedik takpo yo, oluk, op wene ai pam selakmayat pesi. Allah emin pobuk togolik hwedik takpo wene ai ebe re, mu a’ge mesik tul pam en puk. We, nenede at ebam he’berik poluk edipmu en ’bekhit hwerli ologunmu wolomul ai pam, Allah emin pobuk togolik hwedik takpoluk wolomul o.
Allah en wene aphwami enebam pasu wene
18Aphwami en e, Allah ebe enebakhenne ukpoluk, enebabut wiagat togulat, dem wene aphwami logon enaluk ema no oluk sebelogwi ai en e, Allah olot het agalat ’bogorl pam en selakmayat pesi. 19At Allah olot het agalat selakmayat pesi ai, at u’gwarek en,
“An nebabut degenik o,” oluk obok ’baksogo selakmayat pesimu pobitu a’ge oruakhweat de, togwi ai en olot het aga ai o. 20Allah ebe nenil hogwi erlak a’geat de, at en ’bogorl ’gwiang walhesimu enil hogulat, at ebe walhesi a’geatma re, anni otok modok welago yo, oluk, ebabut dokhumsogo pobitu a’geat welagai ai o. Asogo welagai ai paget, is en wene enebam a’ge no’gorlogo wene no a’ge u. Mia o. 21#Efe. 4:17,18Allah ebe asogo enaluk welarat de, is en e,
“Allah ebe di a’ge yu a’ge walhesi a’geat o,” oluk, ebe erliktogwi erlak, hau worogwi erlak, welegesa. Asogo welat e, mu a’ge ebe arogun erlak a’ge paget de, wenemennei ebam eberogu legesa ai en, enede ebis aga ai o. 22Is enede asogo modok ebis agama welarat de,
“Nis nenede modok ’gagalak o,” oluk ogwi o. 23#Ula. 4:16-18Enede ebis agama re, Allah ebe muk ago erlak a’ge, erliktu a’ge ai ukpoluk ebalema re, muk ago a’ge ene’gik en ogut-ogut de, aphwami ’gela’ge heli’gogulat, sue heli’gogulat, wam, ’baik, mene heli’gogulat, ina’ge heli’gogulat, heli’gogo poluk e, erliktogwi ai o.
24Asogo togwi ai en, Allah en e,
“Is onu’gwarek enede en nasuam, is-is ene’gerli erlak enebe wiagaphorlogu lemak o,” oluk enebe ugenebasu ai o. 25At Allah ebe walhesi a’ge erliktogwi modok wolom, oluk ogwiam,
Demat, oluk u ’gela’ge,
“Amin,” oluk ogulom a’geat de, is en Allah iak dem wene ai ukpoluk, aphwami enepenen en eniak pam ’gagalogo ogwi a’ge ai wegesa. Asogo wegesarik, Allah en di a’ge yu a’ge walhesi a’ge ai ebe erliktu erlakma en, we, di a’ge yu a’ge waltak a’ge ai ene’gik en ogut walsogo wusogo poluk, erliktogulat, at ebaget togulat, togwi ai o. 26Is asogo togwi ai at Allah en, is enede en nasuam ene’gerli erlaksogo togu lemagoluk,
“Eneba lo’bok o,” oluk ugenebesi. Is hwami en e, ap enemin nogogwi ’gela’geat nogo u a’geat de, is hwami-hwamiat nogogwi erlak a’geat nogogwi ai o. 27Ai ’gela’ge, is ap en ogo re, ap en hwami enemin nogogwi ’gela’geat nogogwi erlak, we, ap-ap nogogwi ai o. Is ap-ap enebam a’ge ligagoam ene’gerli erlaksogoat wiak togulat e, onu’gwarek en wene enebam pagathorlogulat e, enebe wiak agai ai o.
28Is en e,
“Allah ebe nenaluk wolom e, nenebit o,” oluk at ebe is onogola en mi-miarak pegesema re, at en e,
“Is onogola en opogwi ai wiak o. Nebit. Is en e, wiak a’geat de, op, oluk opogwi ai, asogo eneba lo’bok opogulat tu puk a’ge til laga lemak o,” oluk enebe ugenebasu o. 29Asogo ugenebasuam, is onogola re, di wiak yu wiak, a’gul onuk lo’bok ’beterak welat, enemikmik wiak togulat, aphwami logon wiagabonobogulat, togwi o. Togulat, aphwami enebam ’bou togulat, enebe waronobogulat, wene sorok ogulat, aphwami lalonobogulat, wene e’gen poluk welat, togwi ai a’geat onogola modok ’beterak welago yo. Onobok hisakho nobok-hobok ogulat, 30selakma ogulat, Allah ebe enapserisogo welat, enebam harowiak togulat, onu’gwarek en logo pagathorlogulat, erlikhorlogulat, wiak tuogoluk ene’berlel wiak togulat, enaiklak enialak eniak hwelak erlak togulat, togwi ai o. 31Enede erik ’gela’ge wiak togulat, obok wogontogwi a’ge ano ugonobogulat, aphwami enebit nak welat, enedeabonobogwi erlak welat, togwi o. 32Asogo togwi ai en, at Allah en e,
“Aphwami enebabut asogo togwi a’ge holuk e, an en wene enebam poluk enebe modok waronobu hegitsogoat warenebik o,” oluk egei a’ge enaluk welarat de, is onu’gwarek en asogoat togwi modok welagai o. Is asogo togulat, is logon asogoat togukhwe re,
“Elirat togu legep o,” oluk mo’gulontogwi.
اکنون انتخاب شده:
Roma 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید