Filipi 2
2
“At Kristus u’gwarek logo pagathorlo erlakma en taga laga ’gela’ge, his asogoat togu lomup o,”
oluk mo’gulentesi wene
1Nis Kristus emin hwedik welat, at en nenede ago watnentasulat, nenebe edesogo nenede sebeliselat, Arogun emin hwedik welat, letnentasulat, tisokhwe nis-nis nede-hedesogo togu lege ai en, 2an loksogo nogola nagai hasu leik en, henede mesigarat wolomup o. Asogo welat his-his nede-hedesogo mesigat a’ge togulat, henebabut henede mesigat welat, togu lomup o. 3Di a’ge yu a’ge tuogoluk, henede en e,
“An nak opsogo taga leik o,” oluk, honu’gwarek en logo ’gela’ge poluk togu lorogup no yo. Henede en honu’gwarek erlikhorlo erlakma enat,
“Is logon op o. An e, mia o,” oluk, opogu lomup. 4Asogo opogulat e, henebe lo’bok honu’gwarek henebaget nak eberogu lorogup no yo. Is aphwami mu a’ge enebaget ogo enebam eberogu lomup o. 5Henebabut e, at Kristus Yesus en ede eberise laga ’gela’geat eberogu lomup o.
6At ebe re, Allah a’geat welat, ogola en e,
“An Allah emin hegitsogo welegimu re,
yu ’gela’geat modok weleik o,” oluk opo erlakma en,
7u’gwarek epenen enat ukpoluk,
nis aphwami nenemin hegit agarik e,
ebe neneragam a’ge ’gela’geat aga ai o.
8Ye, at u’gwarek en onuk erlagap pesirik e,
“An nebabut e, naik en,
Waremak, oluk, epesi hegitsogoat iak hwelak weleik o,” oluk,
ebe e pam edikpoluk woruagolugat epesi ai o.
9Asogo epesi ai en, ebe Allah enat
logo pesi.
Logo pesirik e, is logon ononuk sebelak ’gela’ge oruakhwe,
at nak e, ’gain Onuk Logo a’ge oluk e, logo a’geat tuelak pesi ai o.
10 #
Yes. 45:23
Is ’bogorl pam a’ge emin, ’gwiangma a’ge emin,
’gwiang opma orogobu a’ge emin, ’berlegat at Yesus erliktogulat,
ondogorlu pam hurotluk enebe lo’bok, at eragam ’gua ai o.
11Asogo ’guarik, enemde pam lo’bok nenaik Allah erliktogulat e,
“Nonue ’gain Onuk Logo a’ge Yesus Kristus aiat o,” oluk, ’baksogoat ua ai o.
“His aphwami ’gwiangma a’ge ene’gerlak o’gwe welat o dakharak onobogu lomup o,”
oluk mo’gulentesi wene
12-13Narilak norokhwi. Henebe nede o. An nemin welat, niak nin hwedik nan hwedigat osokhwe hologo togu legep ai ’gela’geat, an yogodak nebe walekma oruakhwe, niak aiat logo poluk e, hologo modok togu lomup o. At Allah en, his togu lemagoluk, henede ’gagalogo takhenebasuam, his honogola en e,
“I, nis asogo togulom nenagai o,” oluk ogulat, Allah ogola agai a’ge togu legep ai en, at ebe honogorloksogo honuak erlik-erliktogulat,
“At en delnonobua o,” oluk ai pagerat togwi modok wolomup o. 14-15#Ula. 32:5His en e, at Allah il pam wene henebam erlagat, ye, wiak a’ge honogola erlagat wolomogoluk holuk e, henebe Allah eiyagai wiak togwi erlak degelak modok welat, o hiktak oruakma hwesagal yeriselat atiarak pasu ’gela’ge, aphwami yema enebabut wiak welat wiak togwi a’ge ene’gerlakma en atiarak welat, di a’ge yu a’ge togulat,
“Nenebit,” oluk uarek-’buareksogo tu erlakma enat, wene ’balu erlakma enat, togu lomup o. 16Asogo togulat, di a’ge yu a’ge so’busogo wogontouwogoluk onugontogwi ’gela’ge, wene aphwami enebe enelalugabenebiso wene ai mo’gulentil no’gu lomup o. Asogo mo’gulontogu lorogup holuk e, at Kristus wema ai erlige, an en,
“Mep si-sagalsogo nannisogoat taga legi a’ge ai we ’burlat almasogo tu erlak o. We, Kristus paget elirat tagenebegimu o,” oluk nalong eik o.
17A’ge re, aphwami en wam domba wam Allah paget, wusogo narlik pouwogoluk, o’borl pam anggur e’gen a’bosu ’belabogwi ’gela’ge, his henede Allah pam he’berik poluk wogogwiam, o’borl pam aphwami en an nebe wusogo nemep ’belabua holuk, an nogola nagai hasuam his ’berlegat honogola henagaiat ho yo. 18Asogoat, his honogola henagai hogwiam, an nogola nagai hoat o.
Wene at Timotius paget emin, Epafroditus paget emin, mo’gulentesi wene
19His eba togu legep a’ge paget, honobok an naluk emarik nede op emagoluk, nede nonue ’gain Onuk Logo a’ge Yesus ebam he’berik oruakma, at en letniasu ai pam, at Timotius ano perleneat hene’bek perakpou weigoluk epasu legi o. 20Is aphwami logon yema enebabut mu ’gela’ge oruakhwe, at Timotius omuat ebabut an nebabut ’gela’ge welat, his henebe edesogo henebam demat eberak welago yo. 21At asogo oruakhwe, is aphwami ai enebe ’berlek en e, Yesus Kristus paget tu erlak welat, onu’gwarek paget nak logo poluk togwi o. 22A’ge re, at Timotius ebabut enagat tiso ano henaluk o. Eneiyagai en enaiklak lerontogwi ’gela’ge, at ebe re, Allah eragam welat an letniaiyogoluk op wene ano ne’birek en mo’gulentil no’gu legerigat o. 23An taknobouwa a’ge wene ebe se’geksogo naluk ago holuk e, at ebe perleneat his hene’bek perakpou weik, oluk epasu legi o. 24At ebe perakpou weiktik e, an nede nonue ’gain Onuk Logo a’ge ebam he’berik welegi ai pam, at en letniasuam e, nebe perleneat weigoluk epasu legi o.
25At nenari Epafroditus an Allah paget nematek en tu modok mia oruakma, letniouwagoluk ne’bek perakpou wegepma re, weim obogulat ningsogo obogwi ’gela’ge, ne’birek Allah paget ningsogo togu legerik e, pobuk togolik hene’bek perakpou weik epasu legiat o. 26At ede en epasulat,
“An nebe ou wegi ano, nobok is enesa’go hweligisarik, no’gosogo togwi,” oluk, wenemennei yat horok eberiselat,
“Is ’berlegat ene’bek laik o,” oluk epasu. 27Ebe re, ou wik-wok warelep a’geat de, an nede wiak oruakhwe warelepma re, pobuk nede modok wiak ema no oluk, Allah en at ebe edeat, ye, an nebe ogo edeat, welat, obap pesimu ebe selang egeitik oruak ai o. 28At ebe pobuk hene’bek wagoam henil holuk e, his honogola henagai hogulat, an nogola wiak welegi a’ge op agalat, tuogoluk e, perleneat hene’bek perakpou wegi ai o. 29-30At ebe wagoam e, nonue ’gain Onuk Logo a’ge emin hwedik welat e, honogola henagai hogulat at ebe womup o. His en no’gosogo letnio ’gela’ge ai en, henebalema at en letniaiyogoluk e,
“Nebe wareik holuk obat o,” oluk, Kristus paget tagalat warelep a’ge ai o. Is aphwami logon enebabut at tago ’gela’ge togwi a’ge holuk heniak hau do’goksogo waronobogu lomup o.
اکنون انتخاب شده:
Filipi 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید