Filipi 1
1
Hau warenebegei wene
1 #
Per. 16:12
His Allah eiyagai Kristus Yesus emin hwedik welat, o Filipi welegep a’ge, henebe ’berlegat emin, ’gwelakhentarok welagai a’ge emin, lethontogwi a’ge emin, narilak norokhwi o. An Paulus Timotius ne’birek en Kristus eragam welat wene pelal wokho hene’bek perakpou wege ai o. 2Nenaik Allah, nonue ’gain Onuk Logo a’ge Yesus Kristus e’birek enebabut op ano en op a’ge wokhontogulat, henede ha’bugaphonobogulat, togu lemak o.
Allah eiyagai o Filipi a’ge enebaget, Allah hau weriselat, yo’go pasulat, tegei wene
3An e, nin hwedik nan hwedigat his henebam modok eberak welat, naik Allah at hau werise legi o. 4-5His naduk nadugat wene wegep ai hwerli en, yogodak hwerli, an en op wene aphwami logon mo’gulentil denaga lemagoluk letniogwi modok welegep ai en, nin hwedik nan hwedigat nogola nagaisogo his ’berlegat henebaget se’ban eselat, Allah yo’go pasulat, hau weriselat, taga legi o. 6At Allah en his obaphenebaigoluk, naduk nadugat e’gik tenakhenebesirik e, obaphenebasu lemarik en, hwerli at Yesus Kristus wema ai erlige o il hodologo worogwi ’gela’ge, obaphonobuma ai demat oluk, nede ha’buksogo welegi o. 7At Allah ebabut op en yo’go nebesimu re, an ne’gik herle werak welat, ne’gik herle owan werak erlakma op wene erlele wokho ningsogo tagalat, taga legi ’gela’ge, his ’berlek asogoat nemin togu lemagoluk yo’go henebesiat ai en e, his henebe nede hwedik welegi o. Ai en e, an en his ’berlek henebaget,
“Yesus demat takhonobouma o,” oluk opo a’ge hegitsogoat epasu legi o. 8Yesus Kristus en his henebe ’berlegat ede welago ’gela’ge, an en his nede welat e,
“Nemin wollo e,” oluk, nede en demat epasu legi a’ge ai, at Allah aluk o.
9An en se’ban his henebaget eselat, disogo eselegi,
“Di a’ge yu a’ge owi yorogwiam edip lok agalat libago ai ’gela’ge, his dem wene dokhumsogo henaluk agalat, pobirak pogulat, togulat e, aphwami enebe henedesogo welegep ai a’ge loksogoat henedeabonobogup en,” se’ban eselegi o. 10His asogo pobirak poluk togu lorogup holuk, henede en e,
“Yu re, op. Tu a’ge o,” ogulat,
“Ai re, wiak. Tu puk a’ge o,” ogulat, pobi togu lorogup ai o. Asogo togup holuk, Kristus wema ai erlige, wene henebam erlaksogoat, op degelak oruakma wema ai o. 11Di a’ge yu a’ge owi yorogwiam edip lok agalat e’gen egesiso ’gela’ge, at Yesus Kristus en takhenebasu lema ano pam, henebabut hegitsogo logon eminat togwi modok wolorogup holuk, at ebe wagoam e, aphwami logon en Allah hau worogulat, erliktogulat, tua o.
At Paulus e’gik herle werak oruakhwe,
op wene lok aga wene
12Narilak norokhwi. Wene yu henaluksogo mo’gulhentaik. An disogo taknebegesa yu pam e, op wene erlak om erlakma en lok etil lasu o. 13#Per. 28:30An Paulus Kristus ebagerat ne’gik herle werigisema, welegi ya pam e, is ap at Kaisar onuk logo a’ge at owi pam ’guano oluk, ’godukmu ’gagalak welagai a’ge ’berlek emin, is aphwami logon yema a’ge ’berlek emin en e, enak a’ge pobirak nobogwi o. 14An ne’gik herle wusogo nebegesema welegi yu en, Allah eiyagai logon enebe lok akhit enede nonue ’gain Onuk Logo a’ge pam he’berik poluk hurle agarik e, wene Kristus paget eniak pam ’baksogo mo’gulontogulom onogorlok erlak ago ai o.
15Is ai ado pema en enede wiak agarik e, an nebam ’bou togulat, mo’gulontogwi ai o. A’geat de, is ado pema en enede op welat e,
16“At Allah en Paulus yo’go pasulat e,
Aphwami en op wene ai demat opou wagoluk ’baksogo mo’gulentasu lemen o, oluk yo’go pesimu hogu lege,” oluk, enak a’ge pobirak noboluk nebe enede en wene at Kristus paget mo’gulontogwi ai o. 17A’geat de, is ado pema ’bou togwi a’ge ai en, wene Kristus paget mo’gulontogwi ai, enede mesigat welat mo’gulontogwi puk. We, enede en e,
“Paulus e’gik herle werak oruak ai, ebe wiak emak,” oluk, onu’gwarek ononuk lok emagolugat mo’gulontogwi ai o.
18-19A’ge re, is pema en enede ’biren welat mo’gulontogulat, is pema en enede mesigat welat mo’gulontogulat, togwi a’geat de, wene Kristus pagerat mo’gulontogwi holuk e, yogunat o. Nogola nagai hasu legi o. Disogo taknobogukhwe, his en se’ban an nebaget ogulomma re, Yesus Kristus Arogun en an letniogukhwe, Allah en delnobua ani, oluk an naluk welat, nogola nagai hasu leigat o. 20An nede en e, wene Kristus paget u ne’gerli om erlakma en mo’gulentasu lom nagai o. Holuk e, ne’gerli om erlakma en mo’gulentasu leik o, oluk, pobirak poluk nogola op welegi o. Nin hwedik nan hwedigat ’baksogoat mo’gulentasu legi ’gela’ge, yogodak asogoat mo’gulentaigoluk welegi o. Nebe nelaluk wolomma obat o. Ye, waromma ogo obat o. An asogo taknobogukhwe, nebe ebesigat Kristus paget taga legi ano pam, aphwami en Kristus erliktuagolugat welegi o. 21Asogo welegi ai en, nogola en e, nebe nelaluk welago ai, Kristus pagerat. Ye, waragoam e, op a’ge sabuthwerlaik ai o. 22Nebe ’gwiangma yema nelaluk welat pobuk Allah iabuk loksogo tu a’ge welegi ai en, nelaluk wolom hwi a? Warom hwi a. ’Ge a’ge aiktik e, oluk, neperlak ago yo. 23An tu a’ge wene ’biren oruak ai en, nede ’biren ago yo. An wareiktik e, Kristus eminat wolomma re, op o. Ebe op modok e, aiat o. 24A’ge re, an his henebaget ’gwiangma yema nelaluk wolom obat o. 25An wene ai paget pobirak poluk, weleik, oluk nalugat o. His henede Allah ebam he’berik welat, hurle agalat, honogola henagai hogulat, togu lorogup en e, his henebe ’berlegat nemin wolomulat o. 26Wolomogoluk, an pobuk hene’bek weikmu re, his Kristus Yesus emin hwedik welat honogola en e,
“At Paulus emin welege o,” oluk, an nebaget nomot waguptik honogola henagai a’bik hagup ani o.
Paulus en, “Weim obogulat ningsogo obogwi ’gela’ge, op wene paget, ningsogoat togu lomup o,” oluk mo’gulentesi wene
27Wene op wene Kristus en tegei wene ano pam,
“Aphwami disogo togu lomup, asogo togu lomup,” oluk mo’gulhontogwi a’geat togu lomup o. Asogo togulat, henebe la’bulogo togulomma re, is aphwami logon en honobok ogulat e,
“Is enebabut e, op wene mo’gulontogwiam hologwi hegitsogoat enede Allah pam he’berik poluk ningsogoat edik oruak o,” oluk, an nebe walegat oruakma mo’gulnema hwi a? Hene’bek weiktik nil hentaik hwi a. Wene op wene mo’gulhontogu lege ’gela’ge, henemin la’bulogo welat, weim obogulat ningsogo obogwi ’gela’ge, wene ai paget ogo ningsogo togu lomup o. 28Is pema en e,
“Wene ai nenebit o,” oluk, ogukhweat de, his nak e, honogorlok om erlakma en ningsogo modok tenak welemis o. Asogo tenak wolorogup ai pam, is ai nal ema oluk enagat agalat, his delhonobua oluk enagat agalat, Allah enat tua a’ge oruak o. 29At Allah ebabut op en, his henede Kristus pam he’berik pou wagoluk nak yo’go henebesi puk. Erlak o. At ebaget di obotut yu obotut hogu lemagoluk yo’go henebesi o. 30#Per. 16:19-40An naduk e, weim obogulat ningsogo obogwi ’gela’ge, op wene paget ningsogo tagoma henil niegebat ani o. Ye, yogodak nobok hologu legebat o. Ai a’ge, his henemin ogo la’bulik togu legeat ai o.
اکنون انتخاب شده:
Filipi 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید