Filemon 1
1
Hau warenebegei wene
1-2 #
Kol. 4:17
Filemon nare o. Nare nemin Kristus paget togu lege a’ge hebe nede o. An Paulus, Kristus Yesus paget ne’gik herle wusogo nebegesema welegi a’ge ano, nonot Timotius ne’birek en, hat hebe emin, Allah eiyagai ogo hat howi pam odoktogwi a’ge emin, nenerei Apfia emin, nonot Arkhipus, weim obogwi ’gela’ge, Allah paget nenemin nenannisogo togu lege a’ge ano emin, wene yu pelal wokho hene’bek perakpou wege ai o. 3Narilak norokhwi. Nenaik Allah emin, nonue ’gain Onuk Logo a’ge Yesus Kristus emin, e’birek enebabut op ano en op a’ge wokhontogulat, henede ha’bugaphonobogulat, togu lemak o.
Filemon ebabut taga laga a’ge paget,
Allah hau weregei wene
4-5Hat hede nonue ’gain Onuk Logo a’ge Yesus ebam he’berik poluk, Allah eiyagai logon ’berlegat hedeabenebise legen ai hobok nesa’go hwelegitik e, se’ban hwedik-hwedigat eselat, hat honuk il-il naik Allah hau werise legi o. 6Nis nenede Allah pam he’berik poluk, nenarilak nonorokhwi Allah eiyagai logon enemin, Kristus emin hwedik oruakma, at en di a’ge yu a’ge op a’ge woknentasuam pobi togu lege ai, pobuk loksogo pobi tuogoluk Allah yo’go pasu legi o. 7Filemon nare o. Hat en aphwami Allah eiyagai ’berlegat hedeabenebasulat e, onogola obabenebise legen ai en, an Allah paget taga lemagoluk nede ago werak nebasu legenma nogola nagai a’bik hasu legi o.
At Onesimus Filemon en ebe wouwagoluk mo’gulesi wene
8Hat asogo taga legen ai en, ne’birek Kristus emin hwedik welat e, at ebaget togu legerikmu re, an en e,
“At nare nemin,” oluk, ne’gerli erlagat,
“Disogo tip o,” oluk, niak uareksogo mo’gulhom elit a’geat de, 9an Paulus yogodak nebe arat sebal egirik oruakma, Kristus Yesus paget ne’gik herle wusogo nebegesema welegi o. Asogo welat, hat nedesogo welegi ai en, niak sakhosogo hebam mesik ’gonu mo’gulheik. 10#Kol. 4:9Ai re, an ne’gik herle werak welat, at Onesimus ede Kristus ebam he’berik pesi ai en, ebe nomlogo ’gela’ge agalat, an nebe at aik ’gela’ge agalat, egerik en, at ebe wanogoluk mo’gulhegis o. 11At naduk e, hat hebaget opsogo tu mia ’gela’ge welaga a’geat de, yogodak hat hebaget nak puk. An neminat nenebaget opsogo taknebasu lema a’ge elirat oruak o. 12Ai en, at ebe an nede hwedik a’ge togolik he’bek perakpou wegi ai o. 13An op wene mo’gulentil neselegi ai paget ne’gik herle wusogo nebegesema oruakhwe, hat en letniasulom ’gela’ge, hebalema at en letniasu lemagoluk ebe tenak po a’geat de, 14hat en,
“I o, op. Hemin wolomup o,” oluk mo’gulnom erlakma en, an nabusak wene mesik u mia o. We, an nogola nagai ye, hat at ebe eiye a’ge hede enat tinogoluk perakpou wegi ai o. A’ge re, hat hogola en e,
“Nebit,” epasukhweat, an en niak ningsogo mo’gulhom e, nebit o. 15At Onesimus hat ukhoboluk libaga ai re, we, agauwa lodu paget welemarik en, pobuk he’birek modok wolomogoluk wa’gunmu, at Allah ede epesi pam tago epegi. 16At pobuk hat hemin wolorogup ai, ebe heragam a’ge welat, hat hebaget taga lema a’geat de, ai nak puk. At e, at ebe Allah eiyagai a’ge agarik nenare nenede a’geat welema ai o. At en e, an nede a’geat welat, an nebaget op modok tago ai, weiyat o. Hat hebaget nak e, at ebe ’gwiangma heragam a’ge welat, hare he’birek nonue ’gain Onuk logo a’ge emin hwedik wolorogup ai en, ebenagaik loksogo hede hwedik takpoluk welema o.
17Ai en e, hat en,
“Paulus ebe an nare ne’birek hwedik welege a’ge,” oluk, epasu legen ai, Onesimus togolik he’bek perakpou weik a’ge ai, an nebe pobuk he’bek weikmu woknobu ’gela’ge, at ebe asogoat togolik womup o. 18At en wiak mesik takhebesimu, nomat ebam pegenma ’belak holuk e, nomat ano ’berlegat an nebam pomup o. 19An Paulus asogo nomat nebam welegi, oluk ’berlek ai o’go ’balik a’ge nu’gwarek ne’gik en pelal wegi ai o. An en, hat op wene mo’gulhegismu hu’gwarek hebe paget op a’ge eiye egentik welegen ai, nomat hebam pegimu ’belak hebam oruak oluk mo’gulhom a’geat de, an asogo u re, erlak o. Hu’gwarek halugat o. 20Ai holuk nare o. Nonue ’gain Onuk Logo a’ge emin hwedik welat an nogola nagai houwagoluk, hat en an letnio ’gela’ge, at ebe ai opsogo womup o. 21Wene an en mo’gulhegis a’ge ai hat en hesa’go hologo togunat hegi, oluk, nede epegirik en, wene yu pelal wokho he’bek perakpou wegi ai o. An e,
“Ebe womup o,” oluk, mo’gulhegis a’ge ai, hat en asogo tagalat op a’ge logon emin togunat hegi, oluk, an nalugat o. 22His ’berlegat en an nebaget se’ban Allah yo’go pogu legep ai en, at en pobuk ne’gik herle hebilogo lebiknoboluk, hene’bek woknoboluk wema epasu legi o. Holuk e, an pobuk hene’bek weiktik nogo u a’ge paget, hat howi pam eba o ogorlirak mesik degelogo nebasu lomup o.
Wene ologun ’balogo pobuk
hau warenebegei wene
23 #
Kol. 1:7; 4:12 At Epafras emin Kristus Yesus paget togu lege ai en, nene’gik herle wusogo nenebegesema welege a’ge ano en hau wathebegei o. 24#Per. 12:12,25; 13:13; 15:37-39; 19:29; 27:2; Kol. 4:10,14; 2Tim. 4:10-11Ye, an narilak Kristus ebaget togu lege a’ge, Markus emin, Aristarkhus emin, Demas emin, Lukas emin, enebe ’berlek en hau wathebigisayat o.
25Nonue ’gain Onuk Logo a’ge Yesus Kristus ebabut op ano en ebe his henedemu welat tenhentarok welemak o.
اکنون انتخاب شده:
Filemon 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید