آیات محبوب کتاب مقدس از Ibrani 11

به اشتراک گذاشتن

Enede Allah pam he’berik welagai ai ebe re, disogo. “Op ema,” oluk demat opogulat, “Di a’ge yu a’ge nenil hogwi erlak a’geat de, demat oruak nak o,” oluk pobi togulat, ogwi aiat o. Is aphwami nadugat enede asogo Allah pam he’berik welegesa ai pam, Allah en, “Is op,” oluk enebe ebam lioksogo welaga.

Aphwami enede Allah pam he’berik pogwi erlak holuk e, at ogola opsogo tu modok mia o. Ye, at e’bek womogoluk holuk e, is en e, “Allah demat oruak o,” oluk opogulat, “At ebe enaluk omogoluk tua holuk, at en o’go demat a’ge wogentasuat o,” oluk opogulat, tu ai o.

Allah iak pam en ’bogorl ’gwiang di a’ge yu a’ge ’berlegat nenil hogu lege yema re, nis en e, “Nenil hogu lege erlak a’ge pam walhesimu oruak o,” oluk, nenede at ebam he’berik poluk pobitu o.

At Abraham ogo re, Allah en yo’go poluk, “Hat o mesik eiye welerinogoluk wokheik en e, lak o,” oluk obok mo’gulesimu, at en e, “Wene ai demat,” oluk ede Allah pam he’berik poluk o ’geba laik hwe, oluk eperlak welarat de, waga. At Abraham wagarik, o obok mo’gulesi a’ge ano arat wagarik welarat de, “O yu erlak o. O muat mesik Allah en elit a’ge walholuk ningtak a’ge pam weregei a’ge mesik oruak o,” oluk, yetharok modok welat, o sum a’ge ya werik da werik nogwil denagalat, ap ’bok a’ge ’gela’ge nese laga. Ai ’gela’geat, ap Ishak emin, Yakub emin, onogola en e, “Allah en, Disogo wokhentaik, oluk obok egei ai, nis neneminat mo’gulnentesimu eiye omul,” oluk asogoat no’gu legesa.

At ap Nuh ogo re, ede Allah pam he’berik poluk, di wene yu wene pobuk om a’ge Allah en hwese’bi mo’gulesimu ebe il ho erlak a’geat de, “Demat ema a’ge mo’gulnesi hegi,” oluk Allah iak hologo welat, ik so mesik at eiyagai enemin delonobu a’ge paget weregei. Asogo weregeimu, Allah en aphwami wene enebam poluk enebe warenebegei a’geat de, at Nuh omu nak e, ede Allah pam he’berik pesi ai pam, Allah en, “At op,” oluk agap delegei o.

At ap Henokh ede Allah pam he’berik welaga ai pam, ebe warom erlak. We, Allah en elaluk ’ga’go wesimu, is aphwami logon en ebe palo tigisa a’geat de, enil ho erlak. At ebe asogo owan wo erlakhwe, “At Henokh Allah ogola opsogo nak taga laga,” oluk egesema Allah iak pam pelal wogo oruak.

At ap onuk Kain en, we a’ge nak Allah wogosi a’geat de, at Habel ai nak e, ede Allah pam he’berik poluk op a’ge Allah wogesimu, at en e, “Habel nak e, ebabut hegit op hegi,” oluk egei. Asogo egeimu en, at Habel ebe waraga a’geat de, ede Allah pam he’berik welat tegei ai, at en, “An disogo tegis,” oluk mo’gulnentasu ’gela’ge modok oruak o.

Ye, at Abraham ebe sebal agarik ugwe Sara abeli welaga a’geat de, at Abraham ede en e, “Allah en obok mo’gulnentesi ano demat woknontouwayat o,” oluk ede Allah pam he’berik poluk welaga ano pam, hwe Sara omlogo doru hegit agama deregei.

At Abraham wagarik, o obok mo’gulesi a’ge ano arat wagarik welarat de, “O yu erlak o. O muat mesik Allah en elit a’ge walholuk ningtak a’ge pam weregei a’ge mesik oruak o,” oluk, yetharok modok welat, o sum a’ge ya werik da werik nogwil denagalat, ap ’bok a’ge ’gela’ge nese laga. Ai ’gela’geat, ap Ishak emin, Yakub emin, onogola en e, “Allah en, Disogo wokhentaik, oluk obok egei ai, nis neneminat mo’gulnentesimu eiye omul,” oluk asogoat no’gu legesa.

Ye, at Musa ai ebe arat souwe agarik en, ede Allah pam he’berik poluk, disogo epesi, “An ap ’gain Firaun agalogo emalik ’gela’ge wolom e, modok nebit o. An nebe op welat, we lodu paget a’geat de, nagaisogo wiak tagalom ai nebit o. We, is Allah eiyagai enemin di obotut yu obotut taknobogulom op o,” oluk, ogola epesirik e, “Pobuk Allah en o’go woknema a’ge oruak o,” oluk epesirik e, “Di a’ge yu a’ge op a’ge aphwami o Mesir ene’gikmu a’ge yu logo puk o,” oluk, ukpoluk e, “Kristus paget nenebe mi-miarak nonobogulom aiat logo yo,” oluk epesi. Asogo opoluk libagarik e, ede Allah pam he’berik poluk, “Ap ’gain Firaun ai olot het om ai nogorlok o,” oluk ede opo erlakma enat, Allah ebe nenil hogwi erlak a’ge ai il hasulat ’gela’ge, “Nede at ebam pegirikmu re, lebigat o,” oluk o Mesir ukpoluk liplau waga ai o.

Nadugat Allah en Abraham mo’guleselat, “Hat en dogo’gwe a’ge wiyalema oluk mo’gulhegis ano ebe re, homlogo Ishak yu en dogo’gwe a’ge en wiyalema ebele paget mo’gulhegis o, oluk, mo’gulesi a’geat de, pobuk ebabut ’baligoluk, “Homlogo ebe yu an nebaget watnemin o,” oluk mo’gulesi. “Watnemin o,” oluk mo’gulesimu, at Abraham ede Allah pam he’berik poluk welaga ai pam, “Ishak waromma Allah en pobuk elirat elalugaptua,” oluk, ebe wusogo Allah wogeigoluk tegei ai en e, eniak agamsogo ogulat e, Ishak werak a’ge elaluk aga Abraham en wesi, oluk uat o.

Asogo moluk-melak osoam, at hwe Rahab danian nese laga a’ge ano ogo re, ede Allah pam he’berik poluk, is ap Israel a’ge enil en wogu legesa a’ge enebe opsogo wogenebegei ai en e, is aphwami logon Allah iak wo enebit a’ge enebe modok waronobogulat, at hwe ai nak e, woru erlak ukpegesa ai o.

Aphwami Israel a’ge enede asogoat Allah pam he’berik welat, aphwami ’gwiang do’bon o’gwe lagai ai ’gela’ge, ik ye’gelak onuk Laut Merah ai hielak o’gwe liplau wegesa ai o. Asogo liplau wegesema, is aphwami Mesir a’ge en, “Nis ogo asogoat libomok o,” oluk egesarik liplau wagaimu, ik en sebelenebegei ai o.

Is aphwami Israel a’ge enede Allah pam asogo he’berik welat, o Yerikho seli agauwa hebarligenam walo’gogu legesarik, agauwa agaikhen walo’gogumu re, leget pakleget werik a’ge moluk-melak egei.

Liplau wagarik, ede asogoat Allah pam he’berik welat, at malaikat mesik aphwami enebe warenebiso a’ge en, aphwami o Mesir a’ge eneiyagai naduk dogo a’ge warenebiselat, aphwami Israel a’ge warenebisoma no oluk e, wam domba wusogo onuk Paskah no’gulat, emep o ’goduk petne lo’bok wetil louwagoluk mo’gulentesi.

At Yusuf ogo re, ede Allah pam he’berik poluk welaga ai pam, ebe ’gerat wareriogoluk tagalat, eiyagai Israel a’ge o Mesir en libom a’ge paget mo’gulentasulat, ye, “An nuak orluktak ai re, disogo tip o,” oluk mo’gulentasulat, tegei.

At Yakub ede Allah pam he’berik poluk welaga ai pam, wareigoluk tagalat, ebe o’bouwa’gun ologun pam he’berik poluk Allah hau weriselat, aphwami en is logon mu’gat wusogo enebam pogwi ai ’gela’ge, is enebe ’biren Yusuf eiyagai mo’gulentasulat e, “Allah en obaphenebise lemak o,” oluk mo’gulentesiat.

Ye, at Ishak ai re, ede Allah pam he’berik poluk welaga ai pam, eiyagai Yakub emin, Esau emin, mo’gulentasulat, aphwami en is logon mu’gat wusogo enebam pogwi ai ’gela’ge, “Pobuk Allah en obaphenebise lemak o,” oluk mo’gulentesi.