Peragenebesi 25
25
At Paulus en e, “Wene nebam pegesa a’ge yu, ’gain Kaisar en wene edip herasogo ologun woruak o,” oluk egei wene
1’Gain Festus ano edikpegesema, o Kaisarea eba wagarik e, agauwa henagan welagarik, o Yerusalem laga. 2Lagarik oruakma, is ap Allah eiye a’ge onuelak ’gaindek ebano emin, ap Yahudi a’ge onuelak ’gaindek ononuk oruak a’ge logon emin, enemin e’bek ’gwigisarik e, wene Paulus ebam pogu legesa a’ge ano mo’gulegisa. Mo’gulogulat e, ede ’gi-’gagalsogoat tigisa. 3Asogo mo’gulegisa ai re, at ’gain ano osi en Paulus ebe woluk o Yerusalem womogoluk wagaimu, ebela pam en woruogoluk obok eniak mesigat la’bulogo egesarik at mo’gulogulat e,
“Hat hebabut op en, nis nenede opsogo Paulus ebe o Yerusalem yema perakpou manup o,” oluk eniak sakhosogo ’gonu mo’gulegisa ai o. 4Asogo mo’gulegisa a’geat de, at Festus en e,
“At Paulus e’gik herle werak o Kaisarea ebayat welemak. Oruakma re, an yema wolom erlakma en perleneat laik o. 5At en tu puk a’ge mesik tiso holuk, his ap ’gaindek a’ge yema en wene ebam pagup en e, neneminat louwok o,” oluk mo’gulentesi.
6Asogo mo’gulentesirik, agauwa 8 a’ge en de a? 10 a’ge en de a. Enemin o Yerusalem welegesarik en, o Kaisarea waga. Wagarik, hubet o’gwe re, o aphwami wene enebam pogulat, no’gorlogulat, togu legesema eba hutla ’goluk, osi en Paulus ebe woluk wemagoluk mo’gulentesi. 7Mo’gulentesimu legesarik ebe woluk wegesema re, is ap Yahudi a’ge o Yerusalem en wegesa a’ge ebano Paulus ebe wali’gik poluk, di wene yu wene e’gin a’ge a’bigat ebam pegesa. Asogo a’geat de, at wiak mesik tu erlakma no oluk e,
“Demat wiak disogo tagoma nenil hege o,” oluk mo’gulom a’ge erlak aga. 8Asogo erlak agama, at Paulus en u’gwarek ebe erlele wokho disogo mo’gulesi,
“Wene Allah en nis aphwami Yahudi a’ge nenesa’go weregei wene ano mesik sagalogo ukpoluk wiak tagalat, o Allah owi werik a’ge ano wiagap tagalat, nonue ’gain Kaisar o Roma a’ge ano iak sagalogo ukpoluk mesik wiak tagalat, modok tu erlak o,” oluk mo’gulesi.
9Asogo mo’gulesimu, at Festus en e, aphwami Yahudi a’ge onogola opsogo oluk, Paulus disogo mo’gulesi,
“O Yerusalem eba en wene yu paget an nilem wene edip heratogumu, demat holuk an en ologun werik en e, nemin lul a? Hebit a,” oluk mo’gulesi. 10Mo’gulesimu, at Paulus en e,
“An yogodak e, wene enebam pogulat, no’gorlogulat, tugumu yema, nonue ’gain Kaisar Roma a’ge e’gik pam welegi. Holuk e, wene nebam pegesa a’ge yu, at oruakma eba enat wene edip herasogo ologun woruak o. An en is aphwami Yahudi a’ge wiak mesik tagonobo erlak ano, hat halugat o. 11An en mesik tu puk a’ge tagalat, wiak togwiam enebe modok waronobogwi a’ge tagalat, demat telimu re,
Watnobu hegirat o. Watnebit, oluk eli. A’ge re, is ap yema en wene nebam erlakmayat pogwi ai en, is logon en, is ap yema onogola opsogo oluk, an nebe is ene’gik pam nobo mia o. We, nue Kaisar enat wene ai edip herasogo ologun woruak o,” oluk mo’gulesi. 12Mo’gulesimu, ap mesik at ’gain Festus emin welat,
“Disogo tuok, yusogo tuok,” oluk emin ogu legesa a’ge emin en e,
“Disogo tuok o,” egesarik en Paulus disogo mo’gulesi,
“Hat en e,
Wene yu, ap Kaisar en edip herasogo ologun woruak o, oluk e’gen ai en, Kaisar e’bek perakhebaigat o,” oluk mo’gulesi.
Ap Agripa hwe Bernike e’birek wegesema Paulus paget mo’gulentigisa wene
13Asogo egesarik e, agauwa weiyat oruakma en, ap ’gain onuk logo a’ge Agripa erei Bernike eminat, at ’gain Festus hau woruogoluk e’bek o Kaisarea wegesa. 14Wegesarik agauwa logon enemin eba oruakma, at Festus ano en e, wene Paulus paget Agripa disogo mo’gulesi,
“’Gain Feliks en ap mesik e’gik herle wusogo perakpesi a’ge yema oruak o. 15Oruakhwe, an o Yerusalem legimu, is ap Yahudi a’ge Allah eiye a’ge onuelak ’gaindek emin, enarluedek emin, enemin ne’bek wegesarik e, an en ap ai wene ebam poluk ebe woruagoluk mo’gulnegisa. 16Mo’gulnegisa a’ge re, an en o’go disogo mo’gulentegis,
Nis aphwami Roma a’ge en togwi re, ap mesik wene ebam pogwiam, is wene ebam po a’ge oruak en ap ano ebe mo’gulogwiam, at en o’go is mo’gulentasu erlakma re, enebe waronobuagoluk ebe wogonto mia o, oluk mo’gulentegis. 17Asogo mo’gulentegistik, enebe nemin yema wegerik, agauwa wolom erlakma enat, loruk o’gwe nosi en ap ano o aphwami wene enebam pogulat, no’gorlogulat, togumu ebano woluk wemagoluk mo’gulentegis. 18Asogo mo’gulentegismu, legesarik ebe woluk wegesema, at ebe ’burl edikpoluk, is ap ebano inotluk e, modok wiak tegei a’ge wene ebam pouwa epegi a’ge re, asogo ebam po erlak. 19We, is en enaik Allah pam he’berik welat eniak hundomok ogwi a’ge paget wene mesik ebam pogulat, ap mesik onuk Yesus ai, ebe waraga a’geat de, at Paulus en e,
Pobuk togolik elaluk agarik oruak o, oluk iak ningsogo oso ai en wene ebam pogulat, tigisa o. 20Wene asogo ebam pegesa a’ge ano, an wene ai paget pobitu erlak. Nede ing-ding egeimu re, an en Paulus disogo mo’gulegis,
O Yerusalem loluk en e, wene yu edip herasogo, an ologun werik en e, lul a? Hebit a, oluk mo’gulegis. 21Mo’gulegismu, at Paulus en e,
Wene yu at Kaisar en edip herasogo ologun woruagoluk ne’gik herle wusogoat uknobomup o, oluk egeimu, an en nosi disogo mo’gulentegis,
’Gain Kaisar e’bek perakpo ’gela’ge ago holuk e, perakpaikmu re, e’gik herle weragat tenak wolomup o, oluk mo’gulentegismu oruak o,” oluk mo’gulesi. 22Asogo mo’gulesimu, at Agripa en e,
“Ap ai iak an nesa’go domok holu nagai yo,” oluk mo’gulesimu, at Festus en e,
“Holuk e, loruk en de, iak hesa’go hologun o,” oluk mo’gulesi.
23Mo’gulesimu, loruk o’gwe ap Agripa o, hwe Bernike o, e’birek erligonobogukhwe, is ap tentara onuelak ’gaindek emin, ap o eba a’ge ononuk oruak a’ge emin, enemin owene enebam pogulat, no’gorlogulat, togumu ebano ’gwigisa. ’Gwigisema, at Festus en e, osi en Paulus ebe woluk wemagoluk mo’gulentesi. 24Mo’gulentesimu legesarik ebe woluk wegesema, at Festus en e,
“Agripa nue. Ye, his ap logon nene’bek ’gu egep a’ge yema heneminat, narilak norokhwi wa o. Ap henil hegep a’ge yu re, is aphwami Yahudi a’ge o Yerusalem en, yema en, enebe ’berlek en e, an mo’gulnogulat e,
Ap yu elaluk wolom puk. Woruat o, oluk eniak loksogoat ogwi o. 25Is en asogo ogwi a’geat de, an en wene ai edip herategis a’ge re, at en demat wiak mesik tisoma, wene enebam poluk enebe waronobogwi hegitsogo mesik tegei erlakma hegi o. A’geat de, at u’gwarek en e,
Wene yu ’gain Kaisar en edip herasogo ologun woruak, oluk egeimu, Kaisar e’bek perakpaigoluk tegis ai o. 26A’ge re, wene at ebam pegesa a’ge ai edip heratogukhwe, an en pobitu erlakma en we, nede ing-ding egeimu wene ai paget pelal wokho nonue ’gain Kaisar e’bek no’gosogo perakpo ’gela’geat agama ai o. Narilak norokhwi. His ’berlek henemin, nonue ’gain logo a’ge Agripa emin, henemin en wene Paulus ebam pegesa a’ge ai, edip heratogumu, an pobirak poluk pelal se’geksogo wokho perakpaigoluk nede epegirik en at ebe hene’bek woluk wegi yu i o. 27Asogo tegis ai re, wene edip herasogo en de,
Disogo tegeimu, oluk pelal se’geksogo wogo erlakma, at e’gik herle wusogo perakpo re, mia epegirik en at ebe woluk wegi ai o,” oluk mo’gulentesi.
اکنون انتخاب شده:
Peragenebesi 25: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
