2 Korintus 3
3
“At Allah en wene ’get a’ge werak nenebesimu,
at ebaget togu lege o,” oluk mo’gulentesi wene
1Asogo egi ai, nis nonu’gwarek en pobuk erlikhorlogulat ogu lege no? Modok erlak o. Ye, at e, is aphwami logon en togwi ai ’gela’ge, nis woknonobuagoluk surat his wokhentasulat, is logon en woknonobuagoluk surat his en wogontogulat, togu lege a? Erlak o. 2Nis woknonobuagoluk e, his henebeat pelal ’gela’ge wogo a’ge nis nonogola oruakma re, aphwami ’berlek en onuk mo’gulogulat, pobirak nonoboluk, tu a’ge oruagat o. 3#Kel. 24:12; Yer. 31:33; Yeh. 11:19; 36:26His henebe re, wene Kristus en pelal wokho pesimu nis en perakpege a’ge ’gela’ge welegep o. Pelal ai re, odo a’bosu pam wo erlak a’geat de, Allah elaluk modok welago a’ge ano Arogun pam wesi o. Ye, helep ebak a’ge pam ogo wogo erlagat. We, aphwami enede pamat wesi o.
4At Kristus en nis nenede wenemennei yat horok eberu erlakma en, Allah pam he’berik poluk welemagoluk taknenebesi ai en, wene asogo egi o. 5Nis nonu’gwarek nenanni pam di a’ge yu a’ge tu elit o, oluk, nenede opogu lege erlak o. We, at Allah enat nenanniapnenebegeimu tu elirat welege o. 6#Yer. 31:31Allah en wene ’get a’ge obok werak nenebesi ai, nis en woluk louwagoluk, at enat nenanniapnenebegeimu elirat woluk lo a’ge welege o. Wene naduk enesa’go weregeimu pelal wokho pegesa a’ge hegitsogo tu erlak holuk, ai pam enebe warenebiso yo. A’geat de, Allah Arogun en enelalugabenebiso ai en, nis wene naduk pelal wogo a’ge woluk lo erlakma en, we, at Arogun en mo’gulnentasu a’ge woluk laga lege ai o.
7-8 #
Kel. 34:29
Allah en wene helep pam ’balegei a’ge ai ukpogu lege ai pam nonu’gwarek en wene nenebam poluk nenebe waraga lege o. A’ge re, naduk wene ai wogosoam e, erliktigisa. Helep ai at Musa en woluk ’bu agokhwe re, at orogole amulit a’bik a’ge erlak agokhweat de, is aphwami Israel a’ge enil yethul oluk tigisa ’gal e, enil mum-mam egei. Wene pelal wogo ai wogosoam erliktigisa ai ’gela’ge, at Allah Arogun woknentasuam e, a’bigat erliktu o. 9Wene pelal wogo ai hegitsogo tu erlak pam wene nonu’gwarek en nenebam pege ai o. A’geat de, wene ai wogentasuam erliktigisa a’geat de, ai weiyat o. At Yesus en wene nenebam a’ge no’gorlogo wokholuk Allah pam togolik hwedik taknenebesi ai wene woknentesi ai paget nak e, loksogoat erliktu o. 10Wene pobuk a’ge a’bigat erliktu ebelerak ai en e, wene naduk a’ge erliktogu legesa ai ’gela’ge, pobuk erliktu a’ge erlak aga o. 11Wene naduk a’ge ai erlak om a’ge oruakhweat de, erliktigisa holuk e, modok wolom a’ge ai a’bigat erliktu o.
12Pobuk asogo op ema oluk, nonogola nenagai hogulat e, wene nonogorlok modok erlaksogoat mo’gulontogu lege o. 13#Kel. 34:33Nis e, at Musa orogole amulit a’bik ano modok erlak eigoluk erlak agokhweat de, is aphwami Israel a’ge enil niouwano oluk, orogole sum pam orlomu tegei ai ’gela’ge, nis asogo orlomu tul puk. 14A’ge re, is ai enede ebistak pesimu welegesa. Yogodak ogo re, Allah en,
“Disogo takhenebaik ani o,” oluk wene emin werigisa a’ge pelal wogo a’ge ano, is en onuk mo’gulogukhwe, enede ’gagalom erlakma en ebis agarik sum ’gela’ge hiktak a’ge orlomurak oruak o. Asogo orlomurak a’ge ai, at Kristus emin hwedik togwiam en nak e, enede hiktak a’ge orlomurak ano elirat hurago ai o. 15Yogodak ogo re, wene at Musa en pelal wesi wene ai, is en onuk mo’gulogwiam e, enede ’gagalom erlakma en hiktak a’ge ano orlomurak oruak o. 16#Kel. 34:34Asogo a’geat de, aphwami is a’ge logon enebabut heberlogo onolukhwe nonue ’gain Onuk Logo a’ge wogogwiam e, enede hiktak a’ge ano orlomurak a’ge ai wokhasu o.
17“Nonue ’gain Onuk Logo a’ge,” oluk egi ai re, Allah Arogun pagerat o. Aphwami nonue Onuk Logo a’ge Arogun onogola oruakma re, herle hebeligat enematekma welagai ai o. 18Enil enapunak pam is aphwami logon enebe ’bekhirat yerontogwi ai ’gela’ge, nis ’berlegat nonorogole pam hiktak a’ge orlomurak erlakma re, aphwami en nonue ’gain Onuk Logo a’ge erliktogwi a’ge ai arogun ’gela’ge enil yetnontogwi. Nis nenebe at nonue ’gela’ge emagoluk e, pobuk naduk taknenebasu modok oruakma re, erliknonobu ’gela’geat aga lege. At Allah Arogun ai ebe nonue ’gain Onuk Logo a’geatma, at enat taknenebasu o.
اکنون انتخاب شده:
2 Korintus 3: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید