2 Korintus 2
2
1Ai en e, an his hene’bek weiktik, henede wiagap po a’ge oruak holuk e, mo ik ani o, oluk, nede arat epasu legi o. 2An en his henede wiagaphonoboma re, his henede wiak oruakhwe, an nede pobuk sa en obapnobo no. Mia ai o. 3His enat an nede obapnobo ai o. His an nede obapnoboma an nogola nagai haik holuk e, his ’berlegat honogola henagai ho epasu legi o. Ai en e, an his hene’bek wagoam his en an nede wiagapnobuano oluk, hene’bek wom nebit en, wene nak arat pelal wokho hene’bek perakpou wegi ai o. 4Wene pelal wokho naduk perakpou wegi ai re, nogola wiak en, nede e’gin welat e, nge a’bik tagalat perakpou wegi o. Henede wiagap pou wagoluk perakpou wegi puk. Erlak o. We, an his henebe nede hwedik modok welegi ai henaluk emagoluk hene’bek perakpou wegi ai o.
“Ap wiak tegei a’ge ai togolik henedesogo womup o,” oluk mo’gulentesi wene
5-6Ap mesik ai en nenede wiagap pesi ai re, an nak nede wiagap pesi puk. Ai his ’berlegat henede wiagap pesi oluk u a’geat de, ap enebabut asogo a’ge holuk, henebe esan enat ap ai esa’go wusogo wene ebam pegep ai hwerli arat o. Holuk e, an pobuk niak ningsogo wene ebam po re, nebit o. 7Pobuk e, at wiak tegei a’ge ai, ede modok wiak emarik, ebe wiak ema no oluk e, ede op emagoluk wiak tegei a’ge his en erlagapsogo ukpoluk, ede sebelip o. 8At ap ai ebe henedesogo togolik wagup ebele paget, henesa’go wusogo mo’gulhentegis ai o. 9An en,
“His disogo tip o,” oluk, mo’gulhentegis ano, niak hologo togwi a? Erlak a, oluk henebabut ’baligoluk wene ai pelal wokho hene’bek perakpou wegi ai o. 10-11At en his wiagap henebegei a’ge ai, his en erlagapsogo ukpagup holuk e, an en erlagapsogo ukpaigat o. An en erlagapsogo ukpo a’ge oruak holuk e, at Iblis, ebabut lalenebiso a’ge nenalukmu re, mabenapnonobouwano oluk, his henebaget, at Kristus ilemat erlagapsogo ukpasu legi o.
Paulus o Troas welat ede perik welagarik,
o Makedonia waga wene
12 #
Per. 20:1
An o Troas eba wegi ’gal e, op wene Kristus tegei ano a’ge wene, aphwami eba a’ge panoasuak mo’gulontouwagoluk nonue ’gain Onuk Logo a’ge en mo’gulnesimu mo’gulentasu modok welegi o. 13A’geat de, nare Titus ano ne’birek sarlok tu erlakma en e, nede perik welegirik e, aphwami eba a’ge hau waronoboluk e, o Makedonia wegi o.
“Kristus emin hwedik welat nenanni aga lege o,” oluk mo’gulentesi wene
14Asogo a’geat de, at Kristus anni agarik orogole wasukhwe no’gumu, nis at emin hwedik a’ge Allah en Kristus e’berlik woknonoboluk noso yo, oluk erliktuok o. Asogo woknonoboluk neselat e, e’ben op a’ge sang-pangsogo lasu ’gela’ge, at Kristus tegei wene ano nis en wiyalogo o di owi yu owi woluk louwagoluk woknonoboluk noso yo. 15-16Ai re, at Kristus en e, e’ben op a’ge Allah paget odouk narlu ’gela’ge, nis nenebe Allah wogoso ai o. Wogosoam, is aphwami alemaretil lagai a’ge en e,
“E’ben wiak. E’ben e, aphwami enebe warenebiso a’ge ’gela’ge,” ’balogwi o. A’geat de, is aphwami delenebiso a’ge en,
“E’ben op. E’ben e, aphwami enelalugabenebiso a’ge ’gela’ge,” ’balogwi o. Asogo ’balogwi ai en e, wene ai sa ’gela’ge en elit woluk lo epegep. 17Is aphwami logon enebe esan en e, di a’ge yu a’ge o’go ha sabutil lagai ’gela’ge, Allah iak asogoat woluk lagai o. A’geat de, nis nak e, asogo erlak. We, Allah en, at iak woluk louwagoluk yo’go nenebesi ai en, at ilemat nenede mesigat Kristus emin hwedik welat, mo’gulentil laga lege ai o.
اکنون انتخاب شده:
2 Korintus 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید