1 Timotius 2
2
“Se’ban disogo ogulom o,”
oluk mo’gulesi wene
1-2An en wene mesik logo a’ge yu Allah eiyagai enesa’go werinogoluk mo’gulheik. Nis aphwami enemin op lioksogo welat e, Allah erliktogulat, aphwami enebaget hegitsogo togulom a’ge togu lomogoluk e, aphwami ’berlegat enebaget emin, ’gain ononuk logo a’ge enebaget emin, is logon ononuk oruak a’ge welat tennentarok welagai a’ge ai, enebe ’berlek enebaget emin, se’ban ogulat e, Allah yo’go pogulat, ’gonu mo’gulogulat, hau worogulat, togu lemagoluk enesa’go werise lomup o. 3-4At Allah delnenebiso a’ge ano ede en epasulat e,
“Di aphwami yu aphwami ’berlegat delenebiselat e, dem wene dokhumsogo enaluk emagoluk mo’gulentasulat, tu a’ge o,” oluk ede agai epasu ai en e, his asogo ogu lorogup holuk e, obat o. 5Allah ebe mesigarat o. Ye, Allah emin nis aphwami emin ’burl heisogo welat la’bulnenebiso a’ge ap ebe Yesus Kristus ai mesigarat o. 6At Kristus aphwami ’berlegat wiak togu lege ai pam herle wusogo tennentarok oruakma herle hebilogo delnenebigoluk u’gwarek epenenat,
“Nebe watnobuak o,” oluk waga ai pam, Allah ogola en e,
“Aphwami ’berlegat delonobu o,” oluk epasu a’ge ai, enagat emagoluk hegitsogo enagat aga ai o. 7#2Tim. 1:11Asogo epasu ai en, at en e,
“Hat en dem wene ai aphwami o’borl o’gwe a’ge en demat oluk enede opoluk wouwagoluk, mo’gulentil denaga lomup,” oluk, an yo’go noboluk peraknobou wagama, mo’gulentil denaga legi ai o. Asogo egi ai demat egi o. Niak esei egi erlak o.
Se’ban ogulat, “Ap en disogo togulat, hwami en
disogo togulat, tuagoluk enesa’go werip o,”
oluk mo’gulesi wene
8Ye, o di owi yu owi se’ban ogulat, is ap en e, ene’gik en logon wiak tu erlak, onolot het om erlak, wene sorok ogwi erlak, degelak modok welat, se’ban ogu lemagoluk, mo’gulonto oluk nogola nagai epegirik en mo’gulhegis ai o.
9 #
1Pet. 3:3
Ai ’gela’ge, is hwami re, enasu sualogulat, melei wantogwi ’gela’ge emas a’ge wantogulat, eile’bani wantogwi ’gela’ge mutiara wantogulat, sum o’go lok a’ge ’buktogulat, tu modok mia o. We, enil ha’buksogo welat, enalli a’ge selangsogo wo a’geat wogu lemagoluk mo’gulentagun en mo’gulhegis ai o. 10Enalli a’ge wo ’gela’ge re, enebabut Allah eiyagai a’ge en welat tu hegitsogoat, is logon opsogoat lerontogu lemak o. 11Is eniak erlaksogoat welat, wene mo’gulontogwiam, enesa’go hologoat welemak o. 12Is hwami en e, ap eneragam ’gela’ge welat onoboluk,
“Di tip, yu tip,” oluk mo’gulontogulat, wene mo’gulontogulat, ogu lema no oluk an en wene ’balise legi ai o. Is e, we, eniak erlaksogoat wolom o. 13#Kej. 2:7,21-22Allah en e, Adam naduk walhesirik en, pobukhwe Hawa walhesi ai en, eniak erlagat wolom egi ai o. 14#Kej. 3:1-6Ai ’gela’geat, Iblis en e, Adam naduk lalegei puk. We, hwe ai naduk lalegeimu re, Allah iak sagalogo wiak tegei ai o. 15Asogo a’geat de, is hwami enede Allah pam he’berik poluk e, enebe Allah paget poluk degelak welat, aphwami logon enedeabonobogulat, enil ha’buksogo togulat, togu lemagoluk e, malik dagonobogukhwe, Allah en delonobuayat o.
اکنون انتخاب شده:
1 Timotius 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید