1 Timotius 1
1
Hau weregei wene
1-2 #
Per. 16:1
Timotius nomlogo yo. Hede Kristus ebam he’berik pegen ai en, an nomlogo demat egentikmu re, wene yu an Paulus en pelal wokho he’bek perakpou wegi ai o. At Allah delnenebiso a’ge emin, Kristus Yesus en obapnonobua oluk nenede opogu lege a’ge ano emin, e’birek enat yo’go noboluk, at Kristus Yesus ebaget taga lemagoluk peraknobou wegesema wegi ai o. Nenaik Allah emin, nonue ’gain Onuk Logo a’ge Kristus Yesus emin, e’birek enebabut op ano en, op a’ge wokhogulat, enedeaphobogulat, hede ha’bugaphobogulat, togu lemak o.
Timotius en is aphwami logon enesa’go hegitsogo werise lemagoluk mo’gulesi wene
3An o Efesus en o Makedonia yema weriogoluk e, hat hede ’gagalogo wene disogo oluk mo’gulhegis ani o,
“Hat hebe o yema wolomup o. Welat e, is mu a’ge en e, wene demat a’ge puk. We, mu a’ge mo’gulhontogwi a’ge ai u erlakma en mo uagoluk enesa’go werise lomup o. 4Is ai en e, nonung eniak eseiyat dedilogulat,
Nenebe asogo dagetil wege, oluk wene’gomane edipmu en dakho erlakma en ’bele’gil modok wagalat, ogwi a’ge ai pam enede eberak modok welema no oluk, u erlakma en ukpou wagoluk enesa’go weribat o,” oluk mo’gulhegis ani o. Wene ai a’ge ogwiam, dem wene nenede Allah pam he’berik poluk oruakma, at en obapnonobua ai a’ge lok ago erlak o. We, ologun pam eniak loksogo sagalogwi ai o. 5Enede Allah en hoenebisoam e, onu’gwarek onogola en e,
“Wene an nebam erlak, nogola selak welegi,” oluk opogulat, enede demat Allah pam he’berik poluk welagai ai en, aphwami enedesogo welagai o. Holuk e, is asogoat welemagoluk enesa’go werise lomup o, oluk mo’gulhegis ai o. 6A’ge re, is logon en enebabut op togwi ai a’ge togulomtik e, ukpoluk ’gwi-’gwani ’burlat erlak om a’ge ai paget ogulat e, onu’gwarek enat nal agai ai o. 7Is ai en e,
“Wene Allah en nenesa’go weregei wene ano, nis en mo’gulontogu lomul,” oluk enagai en mo’gulontogularat de, wene ebe pobirak erlakma en, eneperlak welat e,
“Wene ebe disogo yo. Demat pobisogo mo’gulentige o,” oluk ogwi a’geat de, pobirak erlak welat ogwi ai o.
8Wene Allah en nenesa’go weregei wene ai, nis en pobirak poluk, tu hegitsogo togu lomul holuk e, op o, oluk, nenalugat o. 9Demat a’ge re, wene Allah en nenesa’go weregei wene ai, aphwami hegitsogo togwi a’ge paget egei puk. We, aphwami enesa’go werak erlak holu puk togwi a’ge ai emin, Allah enebit welat wiak togwi a’ge ai emin, enebe Allah paget po erlakma en Allah iak sagalogo togwi a’ge emin, enialak enaiklak enebe modok waronobogwi a’ge emin, aphwami logon yogunat enebe ’be’gi waronobogwi a’ge emin, 10ap en hwami yogunat tenontogulat, ap-ap yogunat tenontogulat, togwi a’ge emin, aphwami logon eneiyagai a’ge yogot hisagonobogwi a’ge emin, eniak esei ogwi a’ge emin,
“Wene demat ik,” oluk Allah onuk ho’buk ’bil-’balat de, lalonobogwi a’ge emin, is ’berlegat asogo togwi a’ge paget egei o. Ye, is logon enebabut dem wene obabenebiso a’ge ai sagalogo ukpoluk dagan togwi a’ge an u erlak a’ge logon ’berlegat emin paget egei. 11Ye, wene ai hegitsogo, op wene ano an en mo’gulentil nese lemagoluk nebam pesi o. Op wene ai re, Allah erliktogulat, hau worogulat, togu lege a’ge ano iagat o.
Allah hau weregei wene
12-13 #
Per. 8:3; 9:4,5 An naduk e, Yesus obok wiak ’baliselat, ebe nogola mi-miarak poluk Allah eiyagai a’ge di obotut yu obotut tagenebasulat, taga legi a’geat de, nonue ’gain Onuk Logo a’ge Kristus Yesus en edeapnebegeitik,
“Hat en pobuk an nebaget hebabut he’bisogo taga lorogun o,” oluk, wene yu an nebam poluk yo’go nebasulat, anni wokneselat, tegei ai o. Asogo wiak taga legi eria hegit e, an nede nonue ’gain Onuk Logo a’ge Kristus Yesus ebam he’berik po erlak welat, asogo tu puk a’geat de, neperlak en taga legi ai re, at en nebe edeapnebesi ai en, hau werise legi o. 14Ai re, at nonue ’gain Onuk Logo a’ge Kristus Yesus ebabut op en loksogo edeapnebesirik, nebabut e, at emin hwedik welat togwi ’gela’geat, nede at ebam he’berik pasulat, aphwami logon nedeabenebasulat, loksogoat taga lemagoluk, nebe woknebegei ai o. 15Aphwami wiak togwi oruakma Kristus Yesus en nenebe delnenebigoluk ’gwiangma yema ’bu aga o, oluk egi ai, aphwami en e,
“Wene ai demat o,” oluk dokhumsogo wo a’geat o. Aphwami logon wiak weiyat ’gela’ge togwi a’geat de, an nak e, wiak lok modogat taga legi ai o. 16A’ge re, is aphwami logon pobuk enede Yesus ebam he’berik pogwiam e, enelaluk modok welemagoluk, tagonobouwa a’ge onogola en opogulat e,
“Paulus wiak tagokhweat de, Kristus Yesus ede ’bugom erlakma en, epe mosogo modok welagarik en, edeap poluk ebe wesi ai re, at en aphwami wiak togwi a’ge asogo wogenebisoma hegi o,” oluk, Allah ebabut enak a’ge pobi tuagoluk, an naduk asogo woknebegei ai o. 17Nenaik ’gain Onuk Logo a’ge Allah ai emategat o. At ebe nenil hogu lege erlak. Allah otok modok welago a’ge aiat o, oluk, erliktogulat, hau worogulat, togwi modok wolomok o, oluk,
“Amin,” egi ai.
18Timotius nomlogo yo. An wene yu hesa’go wusogo mo’gulheik. Is logon en wene nadugat hat hu’gwarek paget ogulat e,
“At disogo taga lema o,” oluk, egesa hegitsogo, op wene yu paget, weim enannisogo obogwi ’gela’ge, hannisogo mo’gulentasu lomup o. 19Is logon en,
“Wene ai demat o,” oluk wogulat, onogola selak wolom a’geat de, pobuk wiak togwi ai en, ik so ik olomu moluk-melaksogo ’biso ’gela’ge, ’bigisa ai o. Hat ai ’gela’ge tu erlakma en welat hogola en,
“An wiak mesik tu erlak welat, nogola selak welegi o,” oluk hede Allah pam he’berik poluk hannisogo taga lomup. 20Is wiak asogo togwi ai, enebe logon e, Himeneus Aleksander e’birek en Allah obok wiak ’balogu legesema, pobuk enebabut heberlemarik wiak tu erlakma en mo uagoluk enebe Iblis wogegismu oruak ai o.
اکنون انتخاب شده:
1 Timotius 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید