1 Yohanes 5
5
“Is aphwami ’gwiangma a’ge enebabut wiak togwi a’ge ai mabenap poluk, enanni agai,” oluk mo’gulentesi wene
1Aphwami en e, “Yesus ai Allah en yo’go poluk perakpou waga a’ge demat Kristus anoat o,” oluk enede at ebam he’berik pogwi a’ge nak enebe lo’bok e, Allah en dagenebegeimu, at eiyagai oruak o. Ye, nis nenaik Allah nenedesogo welat holuk e, at eiyagai dogo a’ge ai nenedesogo wolom o. 2Asogo wolom oluk, pobirak poluk e, Allah ebe nenedesogo welat, wene at en nenesa’go weregei wene ai hwelakpoluk hegitsogo togulat, at eiyagai dagenebegei a’ge ai nenedesogo wolomat o. 3-4#Yoh. 14:15Nis Allah en daknenebegei a’ge nak nenebe lo’bok en e, “Allah iak ai demat,” oluk nenede at ebam he’berik pogu lege ai pam, is aphwami ’gwiangma a’ge enebabut onotogat welat wiak togwi a’ge ai mabenap poluk nenanni aga lege ai o. Asogo mabenap poluk nenanni aga lege ai en, wene Allah en nenesa’go weregei a’ge ai e’gin erlak, selangtak o. Ai en e, nis en, “Allah ebe nenede welege,” oluk u ’gela’ge re, at en wene nenesa’go weregei wene ai hwelakpoluk hegitsogo togu lomok o. 5Aphwami enebabut onotogat welat wiak togwi a’ge mabenap poluk enanni agai ai salak en no? Ai re, nis en, “Yesus ai Allah omlogo,” oluk nenede at ebam he’berik pogu lege a’ge nak enat o.
Allah en omlogo obok ’baksogo mo’gulnentasu wene
6At Yesus Kristus ’gwiangma ’bu agarik oruakma ik olomu nak ’belabigisa puk o. Ik olomu ’belabogulat, emep namogo worogulat, tigisa o. Asogo tigisa oluk, at Allah Arogun wene demat nak mo’gulnentasu a’ge ano en ’baksogo mo’gulnentasu welago yo. 7-8Yesus ai Kristus at o, oluk, aphwami enebe henagan en eniak mesigat a’ge ’baksogo u ’gela’ge re, Allah Arogun en ’baktagalat, Yesus ebe ik olomu ’belabigisa ai pam ’bageselat, emep namogo werigisa ai pam ’bageselat, ’baksogo selakma aga ai o. 9Wene aphwami en ’baksogo mo’gulnontogwiam, “Demat,” oluk pobi togu lege ai mia o. Asogo a’geat de, at Allah ebe omlogo obok ’baksogo mo’gulnentesi ai nak e, “Modok demat,” oluk pobi tuat o. 10Aphwami enede Allah omlogo pam he’berik pogwi ano nak en e, “Wene ai demat o,” oluk onogola en pobi togwi. Asogo a’geat de, aphwami logon enede Allah pam he’berik pogwi erlak a’ge nak e, “Wene Allah u’gwarek en omlogo paget obok egei a’ge ai demat,” oluk opo erlakma en welat, Allah iak esei oso a’ge ’gela’ge takpogwi o. 11#Yoh. 3:36At Allah en omlogo paget wene ’baksogo mo’gulnentasulat e, “Enebe enelaluk modok welagai ai, edip e, an nomlogoatma re, an en Yesus ebe wokhentasulat, noburlal-hoburlal demat a’ge wokhentegis ai o,” oluk mo’gulnentesi. 12Aphwami en Allah omlogo ebe wogwi holuk e, noburlal-hoburlal wik-wok eiye egesarik oruak o. A’ge re, is logon en Allah omlogo ebe wo erlak holuk e, noburlal-hoburlal wo erlakma en eiye om erlagat oruak o.
“Noburlal-hoburlal demat a’ge eiye egerik welege oluk, pobi togu lege,” oluk mo’gulentesi wene
13His henede Allah omlogo pam he’berik welegep a’ge nak honogola en e, “Noburlal-hoburlal eiye egerik welege,” oluk, henaluk orogup en, wene ’berlegat yu pelal wokho hene’bek perakpou wegi o. 14Ye, nis di a’ge yu a’ge Allah ogola agai epasu a’ge hegitsogo, at en woknontouwagoluk ’gonu mo’gulogwiam neniak esa’go hwelisoat ai o, oluk pobirak poluk, at ilem nonogorlok erlaksogoat ’gonu mo’gulogulom o. 15Ai en e, nis en, “We, no’gwe a’ge Allah ’gonu mo’gulogwiam, at en neniak esa’go hweliso ai,” nenaluk holuk e, “Nis di a’ge yu a’ge ’gonu mo’gulige ano arat woknentesimu eiye egerik welege,” oluk nenaluk o. 16-17Is aphwami logon modok wiak togulomtik e, enebabut pam enebe modok-modok warema a’ge oruak ai paget, his en Allah yo’go po yo, oluk mo’gulhentegis erlak o. At e, enebabut hegitsogo tu a’ge oruakhweat de, di-dagan a’ge wiak togwi ai ’berlegat onuk wiak a’geat de, is logon en wiak togumu enebabut pam enebe modok-modok warom puk a’ge togwi a’ge oruagat o. A’ge re, his Allah eiyagai a’ge henarilak honorokhwi mesik wiak tagoma ebabut pam ebe modok-modok warom puk a’ge tiso holuk, at ebaget Allah yo’go poma, at en noburlal-hoburlal demat a’ge wogema oruak o. 18Nis Allah eiyagai daknenebegei a’ge at omlogo naduk deregei a’ge ano en tennentarok oruakma, at ebabut wiak a’ge ano en e’gik tennontouwa erlak o. Holuk e, nis wiak hwedik modok togulom mia, oluk nenaluk o. 19Is aphwami ’gwiangma a’ge enebabut onotok a’ge ai ’berlek e, at ebabut wiak a’ge ano e’gik pam welagai o. Asogo a’geat de, nis nak e, demat Allah eiyagai a’ge welege o, oluk nenaluk o. 20At Allah omlogo nene’bek ’bu agarik, Allah demat a’ge nenaluk emagoluk nenede ’gagalogo mo’gulnentesi. Asogo mo’gulnentesimu, nis e, Allah demat a’ge omlogo Yesus Kristus e’birek emin hwedik modok welege o. Ye, at Yesus e, ebe Allah demat a’ge welat noburlal-hoburlal edip arat welago yo. 21Holuk neiyagai o. At demat a’ge welago ai ukpoluk, dogwi asua pam he’berik welat wiak togwi ai ’gela’ge, togupno oluk e, ogoiye togulat, henebabut heberlogo wolomup o.
اکنون انتخاب شده:
1 Yohanes 5: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید