1 Korintus 14
14
Allah Arogun en wogentasuam eniak eneperlak a’ge elalinat ogulat, wene ’baksogo mo’gulontogulat, togwi wene
1Henebabut e, aphwami enebe enede welagai ai a’ge henannisogo mo’gulogu lomup o. Mo’gulogulat e, Allah Arogun en enebabut lo’bok wogentasu wene ai eiye orogup en, honogola aganhansogo togu lomup o. Togulat, Allah iak ’baksogo mo’gulontogwi ai a’ge wokhontouwagoluk, logo pomup o. 2Sa en eniak eneperlakhwe elalinat oso ai, Allah Arogun ogola welat wene hisogoma a’ge oso ai en e, aphwami mo’gulentasu erlak a’geat de, at Allah ebam mo’gulosokhweat de, aphwami logon en pobi togwi erlak o. 3Asogo a’geat de, at sa en Allah iak aphwami at ’baksogo mo’gulentasuam e, enede ago weriselat, enesa’go weriselat, enede sebeliselat, tiso ai o. 4A’ge re, at eniak eneperlak a’ge elalin oso a’ge ai, ai u’gwarek en ede ago weriso yo. A’geat de, at mesik Allah iak aphwami ’baksogo mo’gulentasu a’ge ai nak e, Allah eiyagai odoktogwi a’ge ’berlegat enede ago weragenebasu o.
5Aphwami eniak eneperlak a’ge elalin ogwi ai weiyat mia ’gela’ge a’geat de, Allah iak aphwami ’baksogo mo’gulontogwi ai nak e, logo ’gela’ge o. Ai en e, his henebe ’berlegat aphwami eniak heneperlak a’ge elalinsogo umu re, an nagai a’geat de, ebe op modok e, his en Allah iak ’baksogo mo’gulontogulom aiyat nagai o. A’ge re, eniak heneperlak a’ge elalin ogup holuk e, pobuk Allah eiyagai logon enede ago weragonobouwogoluk e, his heniak pam hegitsogo umu nak e, op o.
6Narilak norokhwi. An pobuk e, eniak neneperlak a’ge elalin a’ge mo’gulhentau weik holuk e, ai pam en obaphonobu no? Wene Allah ogola a’ge ’baksogo u erlakma en, wene naluk a’ge mo’gulhonto erlakma enat, Allah iak mo’gulhonto erlakma enat, wene se’geksogo mo’gulhonto erlagat, holuk e, obaphonobu no?
7Di ’bi’gong yu ’bi’gong arogun erlak a’ge iak inghogwiam, iak oso a’geat de, iak hundomok oso erlak holuk e, aphwami en e,
“I, iak ai a’ge egei yo,” oluk no’gosogo pobitu no. Mia o. 8Aphwami weim louwogoluk amitmit sup ogwi ’gela’ge, ’bi’gong mesik iak loksogo oso a’ge ano, iak o’gut ing-dingsogo oso holuk e,
“Yogo, yogodak weim obuogoluk hegi o,” oluk se’geksogo pobirak erlakma en sa en hebik-hebeksogo tu no. Mia o. 9Ai ’gela’ge re, his en eniak heneperlak a’ge elalinat ogulat, henemde pam en wene se’geksogo ogwi erlakma re, wene ai no’gosogo enaluk om no. Mia o. We, e’gela herle’gela mo’gulom o. 10’Gwiangma di aphwami yu aphwami eniak lo’bok a’bigat oruak epegi. A’ge re, eniak ai ’burlat ogwi puk. Se’geksogo ogwiam pobi togwi nak o. 11Asogo a’geat de, is eniak o’gut ’belakma an neperlak holuk e, at mesik en osoma, an en nesa’go no’gosogo holu. Ye, an niak osoam, niak o’gut ’belakma re, at en niak no’gosogo esa’go holu. Mia o. 12Holuk e, at Allah Arogun en enebabut lo’bok wogentasu a’ge ai wokhontouwagoluk henede aganhansogo togu legep a’geat de, Allah eiyagai enede ago waronto a’ge holuk loksogo wokhontouwagoluk, aiyat logo pomup o.
13-14Is logon eniak an neperlak a’ge pam elalinat se’ban ogulat e, nedemu en eselegi a’geat de, ebe pobi taga legi modok erlak ai en e, at mesik en is mesik eniak eperlak a’ge pam elalin oso a’ge ai en eselat e,
“Naik Allah. Eniak eneperlak a’ge ai an nu’gwarek niak pam hegitsogo mo’gulentasu leik en e, hat Harogun en enebabut wogentasu ano a’ge mesik woknemak o,” oluk se’ban ese lemak o. 15Holuk e, an no’gosogo tik. Disogo tik. Se’ban ai re, Allah Arogun en mo’gulnosokhwe eniak neperlak a’ge pam elalinat eselat, nonu’gwarek neniak pam nede pobirak poluk en eselat, tik o. Ye, weni ai re, Allah Arogun en mo’gulnosokhwe eniak neperlak a’ge pam elalinat weriselat, nonu’gwarek neniak pam nede pobirak poluk en weriselat, tigat o. 16Ai ’gela’ge re, hat mesik Allah Arogun en mo’gulhosokhwe eniak heperlak a’ge elalinat eselat,
“Naik Allah o,” oluk hau worogun holuk e, at mesik eperlak a’ge en pobirak erlak welat,
“Wene egei ai demat emak o,” oluk u ’gela’ge,
“Amin,” oluk u no? Wene hat ogun ai re, at eperlak en, asogo u mia ai o. 17Holuk e, hat en asogo Allah hau opsogo worogun a’geat de, at ai ede opsogo ago werak pagun no? Erlak o.
18Eniak eneperlak a’ge elalinat ogwi ai re, his en e, weiyat ogu legep. An nak e, a’bigat oso yo, oluk,
“Naik Allah o,” oluk hau werise legi o. 19A’ge re, an Allah eiyagai enemin odoktak welat wene mo’gulentaigoluk e, eniak neperlak a’ge a’bik hebarligen elalin a’ge u erlak, we, pobitu a’ge nak niak weisogoat huabenam nak umu re, op o, oluk mo’gulentasu legi.
20Narilak norokhwi. Wene honogola eberogu legep ai re, malik wei a’ge en onogola eberogwi ’gela’ge eberogu lorogup o. We, malik pou ’get dogo a’ge en wiak togwi eneperlak welagai ai ’gela’ge welat, henede enarlue a’ge enede ’gela’ge hurlesogoat welemis o. 21#Yes. 28:11-12At nenaik Allah ’gain Onuk Logo a’ge en nenesa’go weregei wene ano pam wene mesik disogo egeimu pelal wogo oruak,
“An en aphwami yema, wene is logon eniak o’gut mennak a’ge eniak pam mo’gulentasulat,
is logon ap ’bok a’ge enemde pam mo’gulentasulat, tik o.
Asogo mo’gulentaik a’geat de,
enesa’go holua erlak nak o,”
oluk egeimu pelal wokho pegesa.
22Wene Allah Arogun en mo’gulentasuam eniak eneperlak a’ge pam elalin ogwi ai re, aphwami enede Allah pam he’berik pogwi a’ge ai pobi tuagoluk ogwi puk. We, is logon enede Allah pam he’berik pogwi erlak a’ge ai en pobi tuagoluk asogo ogwi o. A’geat de, Allah Arogun en wogentasuam, Allah iak ’baksogo mo’gulontogwi ai re, enede Allah pam he’berik pogwi erlak a’ge enebaget puk. We, is enede Allah pam he’berik pogwi a’ge en pobi tuagoluk mo’gulontogwi o. 23His Allah eiyagai mesikmu odoktak welat, henebe ’berlek en eniak heneperlak a’ge pam elalinat ogumu, is wene eneperlak a’ge emin, enede Allah pam he’berik pogwi erlak a’ge emin, hene’bek ’gumarik, is en e,
“Yema re, enede ’balagama ogwi o,” oluk mo’gulhontouwa erlak no? Mo’gulhontouwayat o. 24Asogo a’geat de, his henebe ’berlek en, Allah iak ’baksogo ogwiam, at mesik ede Allah pam he’berik erlak a’ge emin, wene eperlak a’ge emin, hene’bek ’gumarik, at en e, disogo u o,
“Eige. An wiak tegismu wene nebam oruak hegi o,” oluk ede epasuam e, 25at ogola hisogo a’ge ’bagua o. ’Bagosoam e, ede sebelak poluk at ebe ’gonurak welat Allah erliktogulat, disogo ua,
“Demat Allah emin welegep o,” oluk mo’gulhontouwa.
Allah eiyagai odoktak welat togulom wene
26Holuk e, narilak norokhwi. No’gosogo togulom. Disogo togulom o. His henebe odoktak poluk e, at mesik en weni Allah paget edip lebiselat, at mesik en e, wene se’geksogo mo’gulhentasulat, at mesik en Allah ogola wene hisogo a’ge mo’gulhentasulat, at mesik en wene eniak heneperlak a’ge pam elalinat osokhwe, at mesik en his heniak pam hegitsogo mo’gulhentasulat, togulat e, Allah eiyagai enede ago wusogo di wene yu wene eba ’berlek elirat asogo ogulom o. 27Is pema en, eniak eneperlak a’ge pam elalinat uogoluk holuk e, enebe ’biren de a? Henagan de a, umu re, op. Ugan e, erlak. A’ge re, pobuk naduk ogwiam e, at mesik en his heniak pam hegitsogo mo’gulhontogulom e, op o. 28A’geat de, at mesik his heniak pam hegitsogo mo’gulhonto a’ge ebe erlak holuk e, is eniak eneperlak a’ge elalin ogwi a’ge ai, Allah eiyagai odoktak oruakma eba eniak erlagat wolom. Eniak erlagat welat e, Allah at mo’gulogu lemak o. 29Ye, Allah iak mo’gulontogwi a’ge ai enebe ’biren en de a? Henagan en de a, mo’gulhonto yo. Asogo mo’gulhontogukhwe re, his logon en, wene hegit oso ogulat, wiak oso ogulat, ebabut ’balogulom o. 30Asogo a’geat de, Allah en at mesik hweriogo welago a’ge wene ede ’gagaliso holuk e, mo’gulhontouwagoluk e, at naduk mo’gulhentasu laga a’ge ano re, iak erlagat mo u o. 31Ai ’gela’ge re, henebe ’berlek en wene mo’gulogo henaluk agalat, henede ’gagal agalat, tuogoluk e, henebe ’berlegat mesik-mesik pobuk naduk Allah iak ’baksogo mo’gulontogulom o. 32-34At Allah re, yogun hesabele tiso a’ge puk. At e, we, hegitsogo nak tiso ai en e, is ap Allah iak mo’gulontogwi a’ge ai, wene mo’gulontogu lemagoluk at Arogun en enebabut wogentasu a’ge ai eiye otluk welat, onu’gwarek enat,
“An disogo mo’gulentaik, asogo mo’gulentaik,” oluk ogulom o.
Wene Allah en nenesa’go weregei wene ano pam pelal wokho pasulat e,
“Hwami re, eniak erlaksogoat eneragam wolom o,” oluk egei ai en e, Allah eiyagai o di owi yu owi odoktoluk welagai ’gela’ge, his henebe odoktak welat e, hwami eniak erlagat wolom o. Eniak sagalogumu no yo. 35A’ge re, is hwami en wene mesik mo’guluogoluk holuk e, Allah eiyagai odoktak oruakma, eniak sagalu mia ai en e, onowi pam loluk onu’gwarek onogunlak enebam hin wo yo. 36Allah iak o di owi yu owi lasu ai re, edip his no? Ye, at e, his nak henebaget mo’gulhentau wegesa no a?
37At mesik en e,
“An en Allah iak mo’gulhontouwagoluk, Allah Arogun en nebabut ai woknesimu o,” eselat, ye, at e,
“Mu a’ge tuagoluk woknesimu o,” eselat, oso holuk e, at en e,
“Wene Paulus en egei ai re, nonue ’gain Onuk Logo a’ge en nenesa’go weregei a’ge, pelal wokho nene’bek perakpou waga ai o,” oluk at pobirak poluk wouwak o. 38A’geat de, wene ai wo erlakma en ukpasu holuk e, his en ap ai ebe wo erlakma en ukpogu lomup o.
39Yogo. Narilak norokhwi. Allah iak ’baksogo mo’gulontogu lomogoluk logo poluk henannisogo togu lomup o. A’ge re, is logon en eniak eneperlak a’ge elalinat uogoluk ogwi holuk e, wene ’balogup no yo. 40A’ge re, di wene yu wene hegitsogo ogulat, se’geksogo ogulat, togu lomup o.
اکنون انتخاب شده:
1 Korintus 14: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید