1 Korintus 12
12
Allah Arogun en aphwami nenebabut lo’bok woknentasu wene
1Narilak norokhwi. Allah Arogun en woknentasu wene ai heneperlak wolom ai nebit o. 2His naduk nonue ’gain Onuk Logo a’ge heneperlak oruakma, ebabut wiak a’ge en dogwi asua iak erlak a’ge ebam de, he’berik welemagoluk, we, ’gebane ’gela’geat wokhonoboluk lasulat e, nelakhenebasu laga ai henalugat o. 3Wene yu henaluksogo mo’gulhentaik. Aphwami Allah Arogun onogola oruakma re,
“At Yesus Allah en wiagap pouwak o,” oluk, heman po re, mia o. Ye, Allah Arogun onogola erlak holuk e,
“Yesus e, an nue ’gain Onuk Logo a’ge o,” oluk u miayat o.
4 #
Rom. 12:6-8
Nenebabut lo’bok hundomok woknentasu ai re, Allah Arogun mesigat a’ge enat woknentasu o. 5At nonue ’gain Onuk Logo a’ge iabuk hundomok takpogu lege ai re, at ebe mesigat a’geat, iabuk takpogu lege o. 6Asogo iabuk takpogulat, nene’gik hundomok togu lege a’ge ai, ebe ’berlegat tuagoluk e, nenaik Allah mesigat a’ge enat nenebe lo’bok anni woknentasu o. 7Aphwami en e,
“Is Allah Arogun onogola oruak,” oluk, enagat pobi nonobuagoluk, at en e, nenebe ’berlek nenebaget nonogola lo’bok ’gagaliso yo. 8At Allah Arogun e, at mesik wene ’gagalogo ese lemagoluk wogoso. Ye, at Arogun ai enat, at mesik wene Allah paget di wene yu wene edip ’beli’gogo aluk modok welemagoluk wogosoat o. 9Ye, at Arogun ai enat, at mesik ede Allah ebam he’berik modok welemagoluk muat wogosoat o. Ye, at Arogun mesigat ai enat, at mesik en ou obabenebise lemagoluk anni wogosoat o. 10Ye, at mesik di a’ge yu a’ge elalinat taga lemagoluk wogeselat, at mesik en Allah iak mo’gulentasu lemagoluk wogeselat, at mesik en eselat e,
“At ai Allah Arogun ogola welat tago, eselat, wiak a’ge arogun ogola welat tago yo, eselat,” enagat ’benerise lemagoluk wogeselat, at mesik en eniak eperlak a’ge elalinat ese lemagoluk wogeselat, at mesik eniak eneperlak a’ge osoma, at esa’go holholuk e,
“Ebe disogo de, egei o,” oluk is eniak pam hegitsogo mo’gulentasu lemagoluk wogeselat, enebe lo’bok wogentasu ai o. 11Asogo wogentasu ai re, Allah Arogun mesigat ai enat ede opoluk, di bele yu bele, togu lemagoluk enebe lo’bok me’git me’git wogentasu ai o.
“Nis nene’gik nonoyuk nenebam di a’ge yu a’ge a’bigat oruak a’geat de, nenebe mesigarat o,” oluk egei wene
12 #
Rom. 12:4,5 Nis aphwami nenebe mesigat a’geat de, nene’gik, nonoyuk, logon nenebam a’bigat oruak. Nene’gik nonoyuk di a’ge yu a’ge a’bigat oruak a’geat de, la’bulogo nenebe mesigat ai ’gela’ge re, at Kristus ebe asogoat o. 13Nis e, nenebe ’berlegat Yahudi a’ge et, Yunani a’ge et, eneragam a’ge et, enematekma welagai a’ge et, at Kristus ebe mesigat a’ge emin hwedik tuagoluk, at Arogun en ik olomu ’belapnenebegei ai o. Ye, ik elaruk mesigat no’gwi ’gela’ge, at Arogun mesigat a’ge nonogola pesi ai o.
14Nis aphwami nenebe re, nene’gik mesigat ai nak puk. We, nene’gik nonoyuk nenebe pam di a’ge yu a’ge a’bigat nenebam hwedik oruak o. 15Nonoyuk yu iak oso a’ge wellepma re, at en eselat,
“An nebe ene’gik puk. Mu a’ge ai en e, enebe enebam hwedik welegi erlak o,” oluk umu re, iak asogo ua ano pam, nenebe pam hwedik a’ge ai, momu wolom epegep? Mia o. 16Nenesa’go yu iak oso a’ge wellepma re, at en eselat,
“An nebe enil puk. Mu a’ge ai en e, enebe enebam hwedik welegi erlak o,” oluk umu re, iak asogo ua ano pam, nenebe hwedik a’ge ai momu wolom epegep? Miayat o. 17Nenebe yu re, nenil nak wellepma re, nenesa’go no’gosogo hologullo. Ye, nenesa’go nak wellepma re, e’ben no’gosogo ’balogullo. 18A’ge re, at Allah ede opoluk enat nene’gik nonoyuk nenebe di a’ge yu a’ge nenebe nenebam oruak a’ge yema ebale’gwe lo’bok hwedik taknenebesimu nenebe mesigat a’ge welege yu i o.
19Ye, nenebe yu re, nene’gik ai nak wellepma re, nenebe no’gosogo wollo. 20A’ge re, nene’gik nonoyuk di a’ge yu a’ge nenebam a’bigat oruak a’geat de, nenebe mesigat o. 21Ai en e, nenil en e, nene’gik mo’guleselat e,
“An e, hat erlakma re, op welle o,” oluk u mia o. Asogoat e, nena’gul en nonoyuk mo’guleselat e,
“An e, hat erlakma re, op welle o,” oluk u miayat o. 22Nenebe mesigat a’ge, nene’gik nonoyuk di a’ge yu a’ge nenebam welaga ai re, mesik anni erlak a’ge ’gela’ge opogu lege a’geat de, ai op modogat o. Erlakma re, no’gosogo togullo. Miayat o. 23-25Nis nene’gik nonoyuk nenebe pam hwedik welago a’ge ai, mesik orogole op holuk e, agauwak hwalogo tu mia o. A’geat de, mesik orogole wiak holuk e, agauwak hwalogo pogulat, mesik nene’gerli om a’ge ’gela’ge oruak holuk e, hisogo poluk agauwak hwalogo ebelogo pasulat, togu lege o. Nene’gik nonoyuk di a’ge yu a’ge nenebe nenebam hwedik welago a’ge ’berlegat agaikhe en e, agaikhe edeaptagalat, togu lemagoluk, at Allah en nenebe agauwak hwalogo walnentesi. Walnentasulat, nene’gik nonoyuk nenebe nenebam hwedik welago a’ge logon ’berlegat, hwerli warema no oluk, orogole wiak holuk, agauwak hwalogo pasulat, togu lemagoluk, ebale lo’bok hwederik nenebesi ai o. 26Nene’gik nonoyuk di a’ge yu a’ge nenebe nenebam hwedik welago a’ge, mesik ou en nonouk tiso holuk e, nenebe ebesigat nonouk togu lege o. Ye, nene’gik nonoyuk di a’ge yu a’ge nenebe nenebam hwedik welago a’ge, mesik aphwami en erliktogwi holuk e, nenebe ebesigat nenagai hogu legeat o.
27His henebe la’bulogo Kristus ebe ’gela’geat welat e, henebe lo’bok, at e’gik oyuk ’gela’ge ebam hwederik welegep o. 28#Efe. 4:11At Allah enat e, eiyagai nenebale lo’bok nenebasulat, naduk e, nis at iak mo’gulentil denaga lemagoluk yo’go nenebasulat, nene’berlik e, at iak mo’gulentasu lemagoluk is logon yo’go enebasulat, is ene’berlik e, wene mo’gulentasu lemagoluk is logon yo’go enebasulat, is ene’berlik e, elalin a’ge togu lemagoluk is logon yo’go enebasulat, is ene’berlik e, aphwami logon ou a’ge obabonobogu lemagoluk is logon yo’go enebasulat, ye, di a’ge yu a’ge lerontogu lemagoluk is logon yo’go enebasulat, onuelak ’gain edik welemagoluk is logon yo’go enebasulat, aphwami o da a’ge ya a’ge eniak eneperlak a’ge pam wene ese lemagoluk is logon yo’go enebasulat, nenebe lo’bok asogo yo’go nenebesi. 29Nis ’berlek ai nenebe lo’bok, at iak woluk louwagoluk yo’go nenebesi a’ge welege no? Nis ’berlegat Allah iak mo’gulontogu lege a’ge no? Nis ’berlegat wene mo’gulontogu lege a’ge no? Nis ’berlegat elalin a’ge togu lege no? 30Nis ’berlegat aphwami logon ou obabonobogu lege a’ge no? Nis ’berlegat aphwami o da ya eniak neneperlak a’ge pam wene elalinat ogu lege a’ge no? Nis ’berlegat eniak neneperlak a’ge ogwiam neniak pam hegitsogo ogu lege a’ge no? Erlak o. 31Ai en, narilak norokhwi. Allah Arogun en nenebabut lo’bok woknentasu ai a’ge, ebe op a’ge wokhontouwagoluk ningsogo togu lomup o.
اکنون انتخاب شده:
1 Korintus 12: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید