Mt 20
20
Xifaniso xa vatiri va nsimu vhinya
1Hikuva a Mfumu wa Matilo wufana ni n'winyi wa yindlu, lweyi ahumiki ampundrwini ayathola vatiri vaya ansin'wini yake ya vhinya. 2Loko apfumelelani na vone a kuvahakela hi mali ya Denari hi siku, avarumela kuyatira ansin'wini yake. 3Atlhela ahuma hi nkama wa vuraru, lowu wukombisiwaka hi nkama wa vuntlhanu na mune(09:00h) wa mixo a mahlayeleni yeru, avona van'wana lava afaka vayimi hubyini na vangena ntiro. 4Aku ku vone: Yanani na n'wine n'wiyatira ansin'wini yanga, nitan'winyika leswi swidringanaka. 5Vone vafamba. Atlhela ahuma hi nkama wa vuntlhanu na mun'we (6), ni hi nkama wa vuntlhanu na mune (9) #20:5 A nkama wa vuntlhanu na mun'we (6) ni nkama wa vuntlhanu na mune (9), i minkama ya khume na mibiri (12:00h) ni khume ni ntlhanu (15:00h) amahlayeleni yeru. ayentxisa xiswoswo. 6Atlhela ahuma hi nkama wa vukhume na mun'we (11)#20:6 A nkama wa vukhume na mun'we (11) i nkama wa vukhume ni ntlhanu na mibiri (17:00h) amahlayeleni yeru. aya ahubyini akuma van'wana vhanu na vayimile. Aku ku vone: Xana n'wiyimeli yini lahu a siku hinkwadru na n'wingatiri ntxhumu? 7Vone vaku: Hi leswi hingatholiwangakiki hi mhunu. Avabyela aku: Yanani na n'wine alivhinyeni dranga.
8Driku drapela, a n'winyi wa vhinya abyela a mulaviseli wakwe aku: Vitana a vatiri, uvanyika a hakelo, usungula hi lava va le ntrhaku, uyagama hi lava va kuranga. 9Kuta lava va nkama wa vukhume na mun'we, vayamukela Denari, mun'wana-ni-mun'wana; 10kutani kutlhasa lava va kusungula, afaka vapimisa leswaku vatayamukela kutlulisa; kambe na vone vayamukela Denari, mun'wana-ni-mun'wana. 11Loko vayamukelile vasungula a kun'unun'utela a n'winyi wa yindlu, 12vaku: Lava vatlhasiki avugan'wini, vatiri a nkama mun'we ntsena, kambe uvahakeli swanga ha hine hibyatrhiki a kubindra ka siku hinkwadru ni mumu. 13Kambe a n'winyi wa nsimu ayangula mun'we wavu aku ku yene: Nakulori, anikukanganyisi. Ahiyingelananga hi Denari drin'we xana? 14Titekele a swaku utifambela. Hikusa nidjula a kunyika lweyi wa vugamu swanga ha wene. 15Kumbe xana anina mfanelo ya kuyentxa leswi niswidjulaka hi swanga xana? Kumbe unilavisa hi kubiha hi leswi ninga munene xana?
16Hi swoleswo, a va vugamu vatava va kuranga; ni va kuranga, vatava va vugamu.
Yesu atlhela akhanela hi kufa ni kupfuka kwake
(Mrk 10:32-34; Lk 18:31-34)
17Kutani loko Yesu atlhantukela Yerusalema, ateka hi tlhelo a vadondrisiwa lava va khume na vabiri, na vali ndleleni aku ku vone: 18Vonani! Hitlhantukela a Yerusalema; kutani N'wana wa Mhunu atakanyiketiwa amandleni ya vaprista lava vakulu ni vatrali, vatamuyavanyisela a lifu, 19vatamunyiketa ku va-Matiko akuva vamusandra, vamupswhita, vamugongondrela axihambanwini; kambe hi siku dra vuraru atapfuxiwa akufeni.
Xikombelo xa mamana wa Yakobe na Yohana
(Mrk 10:35-45)
20Kutani a mamana wa vana va Zebedeya atrhindrekela ku Yene kun'we ni vana vakwe, amukhisamela, akuva akombela xa ntxhumu. 21Yene amuvutisa aku: Udjula yini? Lweyi wansati ayangula aku: Hlaya leswaku a vana vanga lava vabiri, vatatrhamisa na wene aNfun'wini waku, mun'we ava xineneni, mun'wana ava ximantrhini. 22Yesu ayangula aku: An'wiswitivi leswi n'wikombelaka swone. Xana n'wingaswikota a kunwa a ntrheko#20:22 A swaku kunwa ntrheko swihlaya leswaku a mhunu atipatra na Yesu a kuxanisekeni kwake. Lavisa ku Mint 12:2. lowu ninga kusuhi ni kuwunwa? Vone vaku: Im'na hingaswikota! 23Yesu avabyela aku: Kunene, n'witanwa a ntrheko wanga, kambe a kutrhama axineneni kumbe aximantrhini ahi mine ninganyikaka swone, ntsena kutanyikiwa lava Tatana wanga avabekiseliki. 24Vatiki vaswiyingela, a vadondrisiwa lava van'wana va khume, vahlundrukela a vamakwavu-na-makwavu lava vabiri. 25Kambe Yesu avavitana aku ku vone: N'waswitiva leswaku a vafumi va-Matiko vamafuma, ni vakulu vayentxa ntamu a henhla ka wone. 26Swingavi tanu amakari kwenu; kambe lweyi adjulaka kuva lwenkulu amakari kwenu, aavi mutireli wenu; 27ni lweyi arandraka akuva lweyi wa kuranga, amakari kwenu, aavi nandra wenu. 28Swanga hi leswi na Yene N'wana wa Mhunu angatelangakiki kutireliwa, kambe ateliki kutirela ni kunyiketa a vutomi byake xiva xitirulu ku lava vanyingi.
Kuhanyisiwa ka vakufa-mahlu vabiri
(Mrk 10:46-52; Lk 18:35-43)
29Vaku na vasuka Yeriko, a xitrhungu xikulu ximulandra. 30Kutani lava va kufa-mahlu vabiri lava afaka vatrhami kusuhi ni ndlela, loko vativi leswaku hi Yesu lweyi ahundraka, vabandlukana vaku: HOSI, N'wana Davida, hitwele vurombe. 31Kambe a xitrhungu xivakhwavela akuva vamiyela. Kambe vone vahundrisa a kubandlukana vaku: HOSI, N'wana Davida, hiyentxele vurombe. 32Kutani Yesu ayima avavitana, avavutisa aku: N'wirandra leswaku nin'wiyentxela yini xana? 33Vone vayangula vaku: HOSI, hirandra leswaku a mahlu yeru mapfuliwa. 34Yesu avatwela vurombe, avakhumba a mahlu, kolahu, vatlhela vavona, kutani vamulandra.
اکنون انتخاب شده:
Mt 20: NTX2007
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Xironga New Testament with Psalms © Bible Society in Mozambique, 2007.
