Mt 11
11
Varumiwa va Yohana ku Yesu
(Lk 7:18-35)
1Loko Yesu agami kunyika swileleto ku vadondrisiwa vakwe va khume na vabiri, asuki kone ayadondrisa ni kurera a ritu amitini yavu.
2Loko Yohana ayingeli, na ali bohelweni, ta mintiro ya Kriste, arumi ku Yene van'we ku vadondrisiwa vakwe, 3akuva vayamuvutisa leswaku: Hi wene lweyi afanelaka a kuta, kumbe hifanela kurindrela mun'wana? 4Kutani Yesu avayangula aku: Fambani n'wiyadrungulela Yohana leswi n'wiswivonaka ni leswi n'wiswiyingelaka: 5Lava vakufa-mahlu vavona, a swilema swafamba, a va nhlokonho vabasisiwa, a vakufa-tindleve vayingela, a vafi vapfuxiwa, a swisiwana switivisiwa a Ivangeli. 6Akatekile lweyi angakhunguvanyekiki hikola kwanga.
7Kambe loko vafambile, Yesu asungula kukhanela ni switrhungu ha Yohana, aku: N'wayivona yini a huleni? A lihlanga ledri dritrekatrekisiwaka hi mheho? 8Kasi n'wayivona yini? A mhunu lweyi ayambaliki swiphatiphati? Vonani, lava vayambalaka a swiphatiphati vakumeka atindlwini ta vafumi. 9Kambe n'wiyivona yini xana? N'wiyivona muprofeta? Im'na! Nan'wibyela; mfuri hi lweyi atlula ni muprofeta. 10#Hlayela dra Mlk 3:1. Hikusa hi yelweyi kungatraliwa ha yene leswaku: Niruma a ntrumi yanga amahlweni kwaku, leyi yitakabekisa a ndlela amahlweni kwaku.
11Nihlayelamfuri nili ku n'wine: amakari ka lava vabelekiwiki hi wansati, akungitumbuluka mhunu lweyi atlulaka Yohana Mubabatisi; kambe lweyi anga ntrongonyana a Mfun'wini wa Matilo awamutlula. 12Kambe kusukela amasikwini ya Yohana Mubabatisi kutlhasa swoswi, a Mfumu wa Matilo wukumiwa hiwuphangi, vawuwutla hi ntamu. 13Hikusa a vaprofeta hinkwavu, na wone Nawu vaprofetile kuyagama ha Yohana; 14#Lavisa 17:10-13; Mrk 9:11-13; Mlk 4:5; Lk 1:17. Ni loko n'widjula kupfumela, hi yene anga Eliya lweyi afaka afaneli kuta. 15Lweyi angani tindleve ayingiseti! 16Kambe xana ningafanisa a vhanu va minkama leyi hayini? Vafana ni vatrongwana lava vatrhamiki tihubyini, na vahlayalena van'we ku van'wana vaku:
17Hin'wiyimbeli nanga,
kambe n'wine an'wikinanga!
Hibi nkulungwana wa nkosi,
kambe an'widrilanga!
18Hikusa kuti Yohana, lweyi afaka angadi, anganwi, n'wine n'wiku: Lweyi ani demoni. 19A N'wana wa Mhunu atile na ada, anwa, vaku i wa magolo ni mpopswi, i nakulobye wa vahlengisi ni vadohi. Kambe a vutlhari byikombisiwa a kululama ka byone hi mintiro ya byone. #11:19 Ku Matralwa man'wana a ndrima leyi yihlayisiwa xileswi: Kambe a vutivi bya Xikwembu Nkulukumba byitikombi hi vana vakwe.
Miti ya kuyala kupfumela
(Lk 10:13-15)
20Kutani Yene asunguli kusola a miti leyi afaka ayentxi ku yone a mahlolana yake lawa ya kutala, hikusa afa mingandrulukanga, aku: 21Yowee, ku wene Korazini! Yowee, ku wene Betsaida! Hikusa, loko afa a mahlolana lawa mayentxiwiki ku n'wine afa mayentxiwi a mitini ya Tiri na Sidoni#11:21 I matikwana lawa manga kusuhi na Kapernawume, lawa swoswi makumekaka atikwanini dra le Nyingitimu wa Lebanoni., afa vayaki va yone vandruluki khale, vayambala masaka ni nora. 22Nambi swili tanu, nan'wibyela, nili: Asikwini dra yavanyiso kutavevukeliwa Tiri na Sidoni kutlula n'wine. 23Wene ke Kapernawume, utatlakuxiwa kuyatlhasa tilweni? Utaxixiwa kuyatlhasa Hades #11:23 Hades: A ritu ledri dridjula kuhlaya leswaku mbangu wa vafi; tinyangwa ta Hades tikombisa a mintamu leyi mimfani! Hikusa loko fanga a mahlolana lawa mayentxiwiki ku wene, mayentxiwi ku Sodoma, a muti lowo ni namuhla afa wahatava kone. 24Kambe nan'wibyela leswaku: hi siku dra yavanyiso kutavevukeliwa Sodoma kutlula wene.
Tanani ku mine n'witawisa
(Lk 10:21-22)
25Ankameni wolowo, Yesu ayangula, aku: Nakukhensa Tatana, HOSI ya Tilo ni misava, hi leswi ungafihlela tintlhari ni vayingeli a timhaka leti, kambe utipfuleteliki ku vatrongwana. 26Im'na, Tatana, hikusa swirandrisiwi xiswoswo amahlweni kwaku. 27Hikuva hinkwaswu swinyikiwi mine hi Tatana wanga; anga kone lweyi ativaka a N'wana loko ange Tatana, na kone akuna lweyi ativaka Tatana loko ange N'wana, ni lweyi a N'wana arandraka a kumupfuletela akuva amutiva.
28Tanani ku mine hinkwenu n'wine n'wikaraliki na n'wine n'wibindriwaka, nitan'wiwisisa. 29Tibyatrhelani a mpinga wanga, n'wiva n'widondra ku mine, hikusa ni wa kurula ni wa mbilu ya kutitrongohata. N'witakuma kuwisa amimoyeni yenu; 30hikusa a mpinga wanga wabyatrheka, na wone ntrhwalu wanga wavevuka.
اکنون انتخاب شده:
Mt 11: NTX2007
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Xironga New Testament with Psalms © Bible Society in Mozambique, 2007.
