Markus 16
16
O Yesus womomi de wooho kali
(Matius 28:1-8, Lukas 24:1-12, Yohanes 20:1-10)
1Ma orasi o Sabat ma wange ipasaka, de ongo Maria Magdalena, ongo Maria o Yakobus ma awa, de lo ongo Salome itagi o bi rapa iija ma ngale o Yesus Awi sone ma bake isimuja. 2O Nahadi ma wangeka o goginita nosi o wange asa ibao, de ona itagi o boosuka. 3Yahika o ngeko ma soaka, de itemo moi de moika, “O boosu ma boberesu o teto magena nagoona asa inariwo yatinga.” 4Duma ma orasi kagena imasidiado o teto ilalamo magena ona yakelelo iloloka. 5So kagena de ona gila-gila iwosa o boosu ma aru ma rabaka, de ona imaginano o girinaka, de yakelelo o gohiduuru moi awi juba daaare womatamiye, so ona isawangi de yamodo.
6O gohiduuru magena wotemo, “Upa nimodo! Ngohi tininako ngini niwisari o Yesus, o Nazaret ma nyawa, kekiaka Una wisisasangahadika gena. Hika nianano masirete kanena Awi riho de kanena Una iwihahado. Duma ngo kanena wihiwaka. Una wooho kali! 7So nimatai-tai nitagi nisingangasu to Una Awi muri-murika, komagena lo o Petruska. Nisingangasu Una wotagi wodomaka o Galileaka. Kadoka ngini asa Una niwikelelo, maro o kia ma nonoma ngini winidedemoka.”
8So kagena de ona isupu o boosuno, gila-gila iloda imagogora sababu imasidotirineku de yosawangi icarawa. Sababu yamodo poli so o nyawa moika lo ona isingangasuwa.
O Yesus womasimane ongo Maria Magdalenaka
(Matius 28:9-10, Yohanes 20:11-18)
9La o Nahadi ma goginitano, o Yesus wooho kali o nyawa isosone manga sidongirabano, de Una womasimane ma noma-noma ongo Maria Magdalenaka, muna idodoma Una asa wodusu to muna manena ami toka ngai tumudingi. 10So muna magena motagi mosihabari Una Awi dodiaoka, mamake ona idodora de iari isodu-sodu. 11La o orasi magena ona yogiise ongo Maria motemo mowikeleloka o Yesus wooho kali, duma ona yopiricayawa.
O Yesus womasimane wimomote yasinotoka
(Lukas 24:13-35)
12Komagena dabolo de o Yesus womasimane kali wimomote yasinotoka, ma ngeko Awi jamani watagali. Magena idadi ma orasi wimomote yasinoto magena manga dodagi ma rabaka o Yerusalemno isupu yakahika o doku moika. 13Kagena de ona iliho gila-gila isihabari o hali magena manga dodiaoka, duma ona yopiricayawa.
O Yesus womasimane Awi muri-murika
(Matius 28:16-20, Lukas 24:36-49, Yohanes 20:19-23, Rasul 1:6-8)
14Ma dodoguka, o Yesus womasimane kali Awi muri yamogiowo de moika, ma orasi magena imatamiye yoodo. Una wasidapano ona magena, sababu manga piricaya ka ma cunu de manga sahe datogoi so ona yapiricayawa, kiaka o nyawa isingangasu o Yesus ona wikelelo masirete Una wooho kali. 15So kagena de Una wasulo onaka, “Nitagi ma bati o bi doku o dunia ma ngoguka, de nisihabari o habari daloloha o Gikimoino ma meta o dunia ma nyawaka. 16La o nyawa nagoona yopiricayawa o Gikimoi Awi habari daloloha, done wafanggali de o dorou. Duma o nyawa nagoona yopiricaya o Gikimoi Awi habari daloloha de yaoosika, done o salamati yamake. 17La o nyawa yopipiricaya ona magena tahike Ai kuasa la o nonako ihahairani aku yaaka. Komagena lo de to Ngohi Ai ronga aku o toka yodusu, de ona lo asa isibicara o bi bahasa ma somoa, 18de nakoso ona o ngihia yacoho eko o raci yaudo, asa ona isiboditowa, de lo nakoso to ona manga gia yasipada o nyawa yasisirika, o nyawa ona magena asa yaloha kali.”
O Yesus o sorogaye witide
(Lukas 24:50-53, Rasul 1:9-11)
19So de o Jou Yesus wobicara dabolo, gila-gila Una asa witide o sorogaye, so kadaku womatamiye o Gikimoi Awi girinaka la Awi horomati wamake. 20Kagena de Awi muri-muri itagi isihabari o Gikimoi Awi habari daloloha sidago ma bati o bi doku o dunia ma ngoguka. De o Jou lo womote to ona manga manara ma rabaka sidago aku yaaka o nonako ihahairani, la nagoona isigogigise to ona manga dodoto magena asa yanako itero de igogou.
اکنون انتخاب شده:
Markus 16: LAIGBI
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
