ROMA 8
8
Roh Kudus atakam ji bwe
1Bare, wow Allah e Kristus Yesus ajamkawimes ow, “Car dosa ow ara,” inim atakam botaw opokut aemama. 2E Roh Kudus, e Yesus ajamkawimom ow, aomomamarow. Aram jiwnenak atetamamarow. Aramat ipicam dor asurumtamfan. Inimas e dosaam, e damirasam, dor momom opok. 3Asmat ow, e Jirmec ji bwemekurum asan opok. Inimas e Jirmec, asmat bwemjortew asan opok. Allah nat, e atiwnak atewnemef. Atiwam dam, asmat dosa dam inim awcawor ajaworemef. Aramat ipic e dadosa bakokoromosom damir aafef ara, ar dosa akumimosomef. E dosa dar boomomasin. 4Allah inimas aemef ara, eras, dar e Jirmec akat ji bwekurumas ara. Bare, dar e darasmat jak basinomas jipu bwem opok aemcom, wunam e Roh Kudus arakatas jipu aemcom, dar e Jirmec ji aekurumcomom ara. 5E ajak basinomas jipu bwem ow, e ajak basinom bi binip aceceremames cowok ara. E nat, e Roh Kudus akat apormaras jipu bwem ow, e aramat ipic akat apormaras bi binip aceceremames cowok ara. 6E ajak basinomas bi binip aceceremames cowok ow, damir aafcemes. E nat, e Roh Kudus akat apormaras bi binip aceceremames cowok ow, jiwne aemes. Aram jak akat aemopmes. 7Bare, e ajak basinomas bi binip aceceremames cowok ow, Allah jewew ow aememames. Ar Allah Jirmec ji bwe opok. Bare ar e Jirmec ji bweme asan opok. 8E ajak basinomas jipu bwem ow, e Allah akat apormaras jipu bwemem asan opok.
9Allah Roh e cajak aman aemapmarnew, car e cajak basinomas jipu bwem opok. Caram e Roh atakam jipu aemamokom ara. E Kristus Roh epcom opok ow, bare aram Kristusas opok. 10E cadam dosa epcom ara. Inimas caram damir epcom ara. E nat, Kristus e cajak aman aemaptotormannew, e Roh, jiwnenak car atetamtotorman. Allaham car ow tarowat ara, inim atakam asakamtiwef. Inimas Kristus eras car aemtamaman. 11Allah, e Yesus ajaworomsumutumef. Bare, Allah Roh e cajak aman aemapmarnew, e Kristus ajaworomsumutumef ipic, jiwne, e cadamir epcom dam, atetamcema. Eras e aRoh, e cajak aman aemapmaras ara.
12Dojowow akatonokom. Inimas ara, dar e dajak basinomas jipu bwem arapok. 13Car, e cajak basinomas jipu aemcokom, bare adamirafcomokom araman. E nat, car e cajak aman dosa acatiwcokom, bare jiwne aecomokom. E Roh, inimas bwem, akac aemceman. 14E Allah Roh atakam ji bwe ow, bare Allah atiperes ara. 15E atewetfokom Roh, car desen kerja bwemtam ow, batewem opok. Aram omar boe ow, car batewem opok. E nat, e atewetfokom Roh, Allah atiperes car atewemfan. Inimas dar atakam Allah aamtawcom, dar, “Diwi! Doricipic!” inim aetotorcomom. 16E Roham atakam e daranakat ow aotawtotorcemarow. “Or Allah ajiwi ara.” Inim aetotorcemarow. 17Allah, asan akat e arow atetamcema. Daram Allah ajiwi araman. Inimas dar, e asan akat atowopcomom.
Aramat ipicam asan akat e Kristus atetamcema. Daram e asan akat e Kristus akac atowopcomom. Dar e Kristus akac ajurusemcom ara, daram aramat ipic, asan akatnakut akac atowopcomom.
Allah asan akatnakut atetamcemarow
18E wow ajurusemamomasam, e Allah atetamcemarow asan akatnakutam, bare awcawor opok cowok. Dor eras nomsom ara. 19Jofay ara, Allah, e atiperes asan akatnakut aemapcesas, aporomcema. E Allah akenemapomefas takas eras bapor, jak aseremomames. Aram eras manmok afemes. 20-21Bap ara, Allah e pok takas akenemapomefen. Aramat ipic nat, e pok takas desenas bemap atakam asakamtiwefen. E pok takas desenas bemap nat, e pok atakam arma basakamtiwas opoken. Bare, Allah inim atakam asakamtiwefen. E nat, e pok takas jirey Allah aemes. Ar, Allah, e pok takas, of boemames opokas bojaworomtaw, inim jirey aemes. E pok takas e Allah atiperes e aemapces asan akatnakut awcawor bemap akat arawen. 22Wow ajiwar nat, e Allah akenemapomef pok takas ajurusapmes. Inimas aram jen ajimes. Ar, cepes jiwi bajispetiw dam asesak inim cimin ara. Daram inimas namsom ara. 23E jen ajimesas nat, e Allah akenemapomef pok cowok opok. E dar Roh Kudus epcom owam ara. E Roh Kudus, e Allah bap atetamforowas ara. Asep ara, ar wunasam atetamcemarow. Dar Allah e dar batewetkurumnak jofay bwenaw manmok afemom. E jofay, aramat ipic ay dam atetamcemarow. Bare, e jofay ajiwar dar e dajak aman jen ajimom ara. 24Allah dar ajortewforow ara, ar ay dam dar batetam atakam aotawforow. Bare, daram eras manmok afemom. Ar e ay dam dar emcatetamforow ayaw, dar eras manmok bofe opok ara. 25E nat, dar e manmok batiw opokas bwenaw, manmok afemom. Daram eras jak jirow epcom, manmok afemom.
26Wunam, e Roh akac aemamarow. Dar ow kumit ara. Daram janim Allah manimnak namsom opok. E Roh nat, janim Allah aanimtamamarow. Janim Allah aanimtamamarow, e Roham jen awutnakut ajima. Dar asmat ow nat, e jen awutnakut ajimaras, atakam bwemotawkurum asan opok. 27Allah, asmat ow ajak amanas takas amsom. Inimas aram e Roh abi binipam amsom. E Roh, e Allah akat apormaras jipu, janim aramat ipic aanimama. Ar, Allah, asan akat e ow tarowat batetam, inim janim aanimama. 28Allah, e damos ar ajiomames ow, asan akat atetamama. E ow bajurusemnew, bajurusem opoknew, bare e takas, e ow asan akat bemapomas ara. E ow bare, e Allah, ajipuas bwem ajateef ow ara. 29Ametnak ara, Allah e atiw ajamkawices ow amsom. Inimas ar e ow e atiw inim awcawor memem atakam bap asakamtiwef. Eras e atiw, betiw ipic mememas ara. Eram e atiw ajamkawices ow arke, aykun ow mememas ara. 30Bare, e ow Allah e atiw inim awcawor memem atakam bap asakamtiwef. Aram e ow ajateef. Aram e ajateef ow, ow tarowat ara, inim atakam asakamtiwef. Aram e ow tarowat atakam asakamtiwef ow, asan akatnakut atetamef.
Kristus damos ajiomamarow
31Dar inimas apormom ara, dar ucim atakam aotawcom? Bare, Allah dar akac aemamarow. Inimas ow dar bwemkumimosom asan opok. 32Allaham e atiw ban fak bakem opok cowok aemef. Ar, e atiw, dar takas damir baftam atewnemtamforow. Inimas aram e akatas takas dar atetamcemarow araman. 33E Allah aereremtawef ow, dosa bwem ow ara, inim atakam ca otawcow? Bare, Allah, e ow, ow tarowat ara, inim atakam asakamtiwef. 34E ow, dosa bwem ow ara, inim atakam ca sakamtiwcow? Bare, inim atakam ow opok cowok. Kristus Yesus, e damir aafef ipic ara. Aram damir baf cowok opok. Allah, aramat ipic aojaworomsumutumef. Wow aramat ipic Allah ban bo jamam awap. Aramat ipic janim fak Allah aanimtamamarow. 35Kristus damos dar bajiom, ca karimcow? Ajurusemcomnew, asan pwicak emapcomnew, ow aemsokomcarowosnew, amostonakut ememcomnew, pakaian opok ememcomnew, ow dar acatiwcarowosnew, bare eras takas, Kristus damos dar bajiom bakarimas opok cowok. 36E Alkitab atakam ara:
“Dar or ajamkawimenom. Inimas join join, ow dar bacatiw atakam atawmes. Ar, ow e acatiwces domba cimin, dar aemamarowos.”
E Alkitab inim aema. 37E nat, Kristus damos ajiemamarow. Inimas eras takas dar bakumimosom opok cowok. Dar faknakut aememcomom. 38-39Damir aafcomnew, tetakay ememcomnew, ow e Allah damos dar bajiomas bwemkarim asan opok. Malaikatnew, onam op pemerintah ownew, onam op kepala ownew, e Allah damos dar bajiomas bwemkarim asan opok. Ow e wow aemamarowosasnew, e asep jofay aemcemarowosasnew, e onam opasnew, awames capinmiasnew, e Allah akenemapomor wun pok aranew— bare, eras takas, e Allah damos dar bajiomas bwemkarim asan opok. Dor inimas nomsom ara. Bare, dar e Kristus Yesus daTuhan, cowkon aememamom. Inimas Allah damos ajiomamarow.
اکنون انتخاب شده:
ROMA 8: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید