ROMA 15
15
Dar kawey ow asan akat bomji
1Dar Kristus mamkawi fak ow, e mamkawi fak opok ow, mamkawikurum mamememapomji. Daram darop jak akatas jipu bwem arapok. 2E nat, dar aporsipor, e Kristus dar akac mamkawi ow, jak akat bemapomji. Dar e ow asan akatas bwemji. Eras e ow Kristus mamkawi fak bemapomas ara. 3Kristus, bare arop jak akatas bwem opok aemawiri. E nat, er e Alkitab atakam jipu ara: “E ow cemew atakam or aotfan ara, bare ar cemew atakam dor aotfenes.” Inim aema. 4E ametnak surat aeapomfes atakam takas, bare dar mamememtamas ara. E Alkitab atakam, dar jak jirowam, jak fakam, bemapomas ara. Inimas dar jirey Allah bwe ara. 5E jak jirowam, jak fakam, inim atetamcemar Allah, bi binip cawor car batetamcan— e Yesus Kristus amememtamawirias jipua. 6Inimas, car bi binip caworam, atakam cowkonam, Allah asicimcomokom ara. Aramat ipic, e Yesus Kristus daTuhan, arAllaham, aricipicam, ara.
E Yahudi opok ow, e Atakam Akat jen baji
7Bare, Kristus asan akat car atewtotorfan. Caram caramaman, ow asan akat mamtewtotorey. Eras bwem, bare Allah basicimas ara. 8Bare, dor atakam car aotawmin ara, Kristus e Yahudi samat ow akerja bwemtam ipic aememef. Eras aemef ara, Allah suw ipic opok baporomas ara. Er, Allah, e atayi darafasut aeef jipu bwemas ara. 9Erasam, e Yahudi opok ow, e Allah basicim ara— e ow Allah ow serow ajiomef aporfes ara. Bare, er e Alkitab atakam jipu ara:
“Inimas ara, dor e Yahudi opok ow aman, or asicimcimin. Dor, or basicim so aecimin.”
Inim aema. 10E wun atakam masirin:
“Car Yahudi opok owa. Car, e Allah aeremtawef ow cowkon, jak akat ememey.”
Inim aema. 11Wunam:
“Car Yahudi opok ow takasa. Caram Tuhan basicimey. E samat takas, aramat ipic basicimces.”
Inim aema. 12Wunam, Yesaya atakam ara:
“Isai urpis ipic aenawcema. Allah, aramat ipic, e Yahudi opok ow jirmec bajirim, atewemcema. E owam aramat ipic jirey aecemes.”
E Alkitab inim aema.
13Allah car jirey a bwe, inim bi binip atetamcemar ipic ara. Caram aramat ipic asicimamokom. Inimas aramat ipic, jak akatam, asan akatam, car batetamcan. E Roh Kudus masirin, e jireyas kayimin car akakayimtamawarceman.
Paulus a surat aeapomefas ara
14Dojowow akatonokom. Dor car ow akatnakut aporkurumamin ara. Caram e akatas bwem camsomnakut aporkurumamin ara. Caram caramaman atjen bamow camsom aporkurumamin ara. 15Do nat, awames surat wun atakam, jak fak epcom aotawmin ara. E atakam, bi binip car bacomomtamas ara. Bare, Allah inim tugas akatipic dor atetamfan. Inimas dor atakam fak car aotawmin. 16E atetamfan tugas ara, Kristus Yesus kerja bwemtamas ara. Doram Allah atakam mamtaw, inim tugas aemamin. Dor masirin, e Allah aotawef Atakam Akat, e Yahudi opok ow aotawmin. Inimas dor e ow Allah atetamcimin. Ar ow pok Allah bacatiwtamas inim cimin atetamcimin. Allah, e ow, e pok inim cimin, akat aporcema. E Roh Kudusam, e ow, ow tarowat aemapomama. 17Kristus Yesusam dor akac aememaman. Inimas e Allah kerja aemtamawiruas, bare akat ara. 18-19E aemawiruas nat, Kristus dor akac aemawirumas ara. Inimas er Kristus aemawirias ara. Dor masirin, inim atakam cowok car botaw jak fak aememamin. Bare, e Yahudi opok ow, e aemawiruas aporawiris. Aram e atakam aotawawiruas, jen ajiawiris. Aram e junum bweas aemawiru aporawiris. Allah Roham, e afakas dor atetamawirin. Inimas e Yahudi opok ow, Kristus atakam ji aefes. Bare, dor Yerusalem capinmi ajaremof, wunam Ilirikum capinmi ajiwar aamorjiof, dor e Kristus Atakam Akat acacapiomkurumof. 20Dor e Atakam Akat, e Kristus atakam jen baji opok ow botaw, jak aseremomawiru. Dor, cem, kawey ow ajirimapomfes fasis ton bweapom inim cimin, bwemasin. 21Er e Alkitab atakam jipu ara:
“Ow, e aramat ipic atakam, e ow botaw opok aemawiris. E ow nat, e aramat ipic atakam jen ajicemes. E atakam jen baji opok ow, jen ajikurumcemes.”
Inim aema.
Paulus Rma bajir at aeef
22Inimas ara, dor bar arke car bajarpor aea aeof. Do nat, ca bwemjarpor asan opok. 23Wow nat, dor arasan kerja emeemkurumof. Doram tahun arke, e cabi bapor, jak aseremomawiru. 24Inimas ara, dor Spanyol capinmi ajircey, dor pir mamincop asan akat jaki car bajit aemin. Doram car wun ow e Spanyol capinmi akac bajar akat aemin. 25Do nat, Yerusalem bin ajiomamin. Doram wow e bowsec ara. Dor uang, e erasan ow tarowat batetam atowomamin. 26E wun Yerusalem ow tarowat, bare pok opok ara. Er masirin, e Makedonia owam, e Akaya owam, uang, e ow sey baseyetam inim atakam arma aamsakamfes. 27Bare, ar e atakam arma aamsakamfes ara. E Yahudi ow, e Kristus atakam, e Yahudi opok ow amememtamfes. Inimas e Yahudi opok ow, e Yahudi ow amatam baji akat ara. Ar e ow pok batetamces. 28E dor wow tugas ara, e uang, e Yerusalem ow batetam atowomtamamin ara. Dor e aaramsimfes uang e Yerusalem ow atetamcey, dor Spanyol capinmi ajircimin. Do nat, cacapinmiam asetayapcimin. 29Dor car ajarporcey ara, dor Kristus e atetamamarow asan akat, atakam atowominawcimin. 30Dojowow akatonokom. Dar e Yesus Kristus daTuhan asicimamom ara. E Roh Kudusam damos mamjiom jak atetamforow. Inimas dor janim fak car aanimamin. Car Allah asan akat dor batetam, janim fak mamanimey. Doram eras car akac janim Allah aanimcimin. 31E Yudea capinmi Kristus atakam bopow ow, dor bajurusum arapok. Wunam, e Yerusalem tarowat ow, e atowomircimin uang, jak akat epcom batewces. Inim janim Allah mamanimey. 32Inimas ara, Allah akat aporcow, dor jak akat epcom, car ajarporcimin. Doram jaki carasan ajitcey, dor asan akat, ses aancimin. 33Allah, jak akat atetamcemarow. Aramat ipicam car akac baemcan. A atakam, bare atakamnak ara.
اکنون انتخاب شده:
ROMA 15: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید