ROMA 12
12
1Dojowow akatonokom. Allah saw akat awutnakut aomforow apormin ara. Inimas ara, dor inim janim fak car aanimamin ara. E cadam Allah mamtetamtotorey. E cadam, bare tetakay pok Allah batetamas ara. E cadam, aramat ipic kerja bwemtamam, aramat ipic jak akat bemapomtamam, e aramat ipic inim mamtetamtotorey. Inimas bwem, bare Allah basicimnakas ara. 2Car awames capinmi ow aemamesas mamkawi arapok. E nat, Allah ay binip car batetamtotorcan. Ar masirin, ay jakam atetamceman. Inimas ara, car e Allah akat apormaras camsom aemcomokom. E Allah akat apormaras, bare akatas ara. Aram e aramat ipic ji bweas ara. Aram akatnakutas ara.
3Allah asan akat dor atetamfan. Inimas ar akerja bwemtam ipic atewemfan. Dor inimas apormin ara masirin, inim atakam car takas aotawmin. Car carma basicim arapok. Ca nat, bi binip pimicim mamceceremey. Allah wun ow, jirey a bwe awut inim, bi binip atetamef. Aram wun ow jirey a bwe kanim inim, bi binip atetamef. Car masirin, e Allah car atetamtotorfan jirey bweas, awut inimnew, kanim inimnew, inim jipu bi binip pimicim mamceceremtotorey. 4Bare, ow kamtaram, sopam, manmokam, epcom. E aporsiporasam arop pok bwemas ara. 5Daram inim ara. Dar ow arke ara. Dor Kristus cowkon ajamkawimom. Inimas dar dam cowok inim cimin ara. Daram ow cowkon ara. 6Allah, kerja a bwemtam cescuwas, dar aporsipor, mami atetamforow. Bare, dar e cescuwas desen momom arapok. Allah, aratakam botawtam cescuwas dar atetamforownew, dar e jirey aramat ipic aemomas jipu, atakam botawtamji. Dar jirey awut aemomnew, dar atakamam fak botawtamji. 7Allah, dar ow pok bwemtam cescuwas atetamforownew, dar ow pok bwemtamji. Allah, ow mamememapom cescuwas dar atetamforownew, bare dar ow mamememapomji. 8Ar atjen ow bow cescuwas dar atetamforownew, dar atjen ow bowji. Ar pok kawey ow baseyetam cescuwas dar atetamforownew, dar e pok ban kumit baseyetamji. Ar jirmec bajirim cescuwas dar atetamforownew, daram kerja fak bwemji. Ar ow asan akat bom cescuwas dar atetamforownew, dar eras jak akat epcom bwemji.
Ow damos bajiomkurum
9Car ow damos bajiomnew, pir bwe arapok. E jursumecas bifan mamfayomey. E akatas mamemawarey. 10Car damos mamamjiomey— ducur cowkon jiwi awcawora. “Ow, wun ow basicimces. Aram do basicim arapok.” Inim atakamnak mamotawtotorey. 11Kerja faka. Car besem bemap arapok. Tuhan kerja bwemtam, tetakay ememey. 12Car Tuhan jirey aemokom. Inimas jak akat ememey. Ajurusemcokom, jak jirow ememey. Janim Allah mamatamanimawarey. 13Ow tarowat asan pwicak aemapces, e capok sey e ow mamseyetamey. E jaki ow, e cacem mamtowomiwey.
14Allah, asan akat, e car ajurusumaman ow batetam, janim mamanimey. Allah, e ow bajurusum, janim manim arapok. 15Ow jak akat aememces, caram jak akat akac ememey. Ow bwec abwecces, caram bwec akac mambwecey. 16Caram bi binip cawora. “Dor ow akat ara. E wun ow pwicak ara.” Inim bi binip arapok. Caram e pwicak ow damos mamjiomey. “Nomsom takas,” inim bi binip arapok.
17Ow, pwicakas car aemcan, pwicakas amatam e ow boem arapok. Caram ow takas e akat apormesas jipu mamemey. 18Damos ow takas mamamjiom akat aporcokomnew, bare damos ow takas aamjiomey. 19Dojowow akatonokom. Caram pwicakas amatam baji arapok. Allah e pwicakas amatam arma bajicow. E Alkitab aman, Tuhan inim atakam atawma: “E pwicakas amatam baji, bare doras ara. Bic dorma ajicimin.” Tuhan inim aema. 20Ca nat, e Alkitab inim atakam ji mameey. “E cajewew ow amosto aemapces, amos mamtetamey. Bwito aemapces, bwi mamatetamey. Inimas aemcokom, e ow namke akayapcemes.” E Alkitab inim aema. 21E pwicakas car bakumimosom arapok. Ow, pwicakas car aemcannew, akatas amatam e ow mamjiey.
اکنون انتخاب شده:
ROMA 12: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید