MATIUS 23
23
E Allah Jirmec mamememtam owam, e Parisi owam, atakam
(Mrk. 12:38-39; Luk. 11:43-46, 20:45-46)
1Bare. Yesus atakam e ow arkeam, e amamkawi owam, aotawef. 2“E Allah Jirmec mamememtam owam, e Parisi owam, e Musa Jirmec surat atakam bajomtam ow ara. 3Inimas car e atakam atawmesas takas ji mameey. E atakam jipu mamekurumey. E nat, car e ow aemamesas jipu bwem arapok. E ow ewen picin cowok atakam atawmes. E nat, ar e atakam atawmesas jipu bwem opok. 4Ar juturnakut pok manam ajikapomames. Wunam e pok kawey ow sop atatiwmes. E nat, ar e pok akac bataw, bare opok cowok aemames. 5Aram ow manmok a basirim jak aserememames. E aemamesas takas eras jipu aemames. Inimas ar Alkitab ayat epcom ese awut, e abipis atewtopomtotorcemes. Aram wun inim ese e asop ajimtopomtotorcemes. Aram e abaju jirow e bip comkan inim ciminas atewtopomtotorcemes. 6E pokbwi cem amanam, e sembahyang cem amanam, ar e bap ow asan bemap jak aserememames. 7E pasar asan ara, aram ow, ‘Selamato’ a baji jak aserememames. Aram ow, ‘Guru’ a baji jak aserememames. 8E nat, caGuru, bare cowokut ara. Caricipicam cowok ara. Inimas, ow, ‘Guru’ ca baji arapok. 9Caram awames capinmi ow, ‘Doricipic’ baji arapok. E caricipic, bare cowokut ara. Aramat ipic onam op awap. 10Owam, ‘Kepala’ ca baji arapok. E cakepala ipic cowokut ara. Er e Allah Aeremtewef Ipic ara. 11E caramaman awut ow, e cakerja bwemtam ow baememces. 12Allah, e arma batawsicim ow takas namke akamemcema. E nat, ar e arma batawsicim opok ow asicimcema.”
Pir bwe ow
(Mrk. 12:40; Luk. 11:39-42,44,52, 20:47)
13“Awapokom Allah Jirmec mamememtam owam, awapokom Parisi owam, car pir bwe ow ara. Car ajurusemcomokom. Car e Onam Op Pemerintah Asan jimasap, e jimasap ememames ow bipu akapimapomamokom inim cimin ara. Car e asan bafiw opok. Wunam car e asan afiwpormes ow, aotpemamokom inim cimin ara.” [ 14Awapokom Allah Jirmec mamememtam owam, awapokom Parisi owam, car pir bwe ow ara. Car ajurusemcomokom. Car fwisma cepes cem osom atewetmokom. Wunam car janim Allah jirownakut aanimamokom. E nat, ar ow manmok ca batiwas cowok ara. Inimas ara, Allah siksa awutut car aomceman.]
15“Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car jipic cowoknakapam e caragama bafiw bacajijimtaw, e capinmi arke ajirtaya aemokom. Caram eras bwem, asan arke ajarmokom. Wunam e ipic e caragama afiwcow, car ar jokmen memem amememtamamokom. Bare, car jokmen kanim inim. E ipic nat, jokmen awutut ara. Bare, caram, aram, neraka akac afiwcomokom ow araman.
16Bare. Car ajurusemcomokom. Car bap awamcokom ow ara. E nat, car manmok kapi! Caram atakam, ‘Ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem awames,’ inim aeces, e ow e atayi biwosom, bare pwicak opok. E nat, ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem emas pok awames,” inim aeces, bare e ow e atayi bwemjiwosom asan opok. Inim aemokom. 17“Ca jen ow ara! Caram manmok kapi! E pentingnak pok, ucimasam? E Allah cem emas poknew? E Allah cem anakatnew? Bare, e Allah cem, e emas pok, akat emas pok aemapomama. 18Caram atakam, ‘Ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem pok jis bafamtam jowse awames,’ ” inim aeces, e ow e atayi biwosom, bare pwicak opok. E nat, ow atayi faknakut aeces, wunam, “Dor e atayi aeminas jipu aemcimin. Pate opok cowok. Allah bacatitam pok e Allah cem pok jis bafamtam jowse awap, inim aeces, bare e ow e atayi bwemjiwosom asan opok.’ Inim aemokom. 19Ca manmok kapi ow ara! E pentingnak pok ucimasam? E Allah bacatitam poknew? E Allah cem pok jis bafamtam jowsenew? Bare e pok jis bafamtam jowse e Allah bacatitam pok, akat pok aemapomama. 20Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E Allah cem pok jis bafamtam jowse awames,’ inim aeces, ar e jowse cowok atakam opok. Ar e jowse ewapes pok takasam atakam atawcemes. 21Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E Allah cem awames,’ inim aeces, ar e cem cowok atakam opok. Ar e cem aman aemapmar ipicam atakam atawcemes. (E ipic, bare Allah ara.) 22Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E onam op capinmi awames,’ inim aeces, ar e onam op capinmi cowok atakam opok. Ar e Allah fa bemap asanam e fa bemap asan aemapmar ipicam, atakam atawcemes.”
23“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car sērēām, iricam, wun inim pokam, persepuluhan Allah atatamamokom. E nat, car e Allah Jirmec penting awutas bwem opok. E penting awutas, bare ow tarowat memem ara. Kawey ow serow bajiom ara. Allah basicim ara. Er penting awutas ara. Bare, car eras bi binip aceceremcerey. E wunasam binip manimem arapok. 24Ca manmok kapi bap ow ara. Isi mimin, e aancokom bwi aneysecow, car e isi mimin, finim aneyatamtewcomokom. E nat, car e aancokom bwi aman unta, desen atawnemcomokom.”
25“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car e mok cesenasam, e piring cesenasam, bwi acicikimamokom. E co pok aman nat, e ces aefokomasam, e paknam atewfokomasam, bare imwinakap ara. 26Awapokom Parisi ow, manmok kapi ara. E mok aman batakamcicikimey. Inimas e cesenam, bare orom ara.”
27“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Ow, bi awerem cem aaramcemes. Bare, car e awerem cem inim cimin ara. E cem cesenas bare akatipic ara. E cem aman nat, damir ow emake arkenakutam, ponowas jukpiri awutnakutam, awamses. 28Caram inim ara. Kawey ow, car ow tarowat ara, inim bi binip aceceremames. E nat, e cajak aman, car pir bwe owam, Allah atakam bopow owam, awapokom ara.”
Allah, e pir bwe ow, ajurusumcema
(Luk. 11:47-51)
29“Bare, ca awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car e Allah atakam botaw damir ow awerem cem aeapomamokom. Caram, e ow tarowat e awerem, cosow asowapomamokom. 30Caram, ‘Dar e darafasutmar jofay aemapfom ayaw, dar e darafasutmar e Allah atakam botaw ow akac bacatiw opok aemfom.’ Inim aemokom. 31Inimas aemokom ara, car, ‘Dar e Allah atakam botaw acatiwfes ow arurpis awamcom ara,’ inim atakam umuton atawmokom. 32Bare, e carafasutmar aemawirisas emkurumey. 33Amera! Amer jiwinakasa! Car e neraka aman siksaas, omar bwemjisos asan opok. 34Inimas ara, dor Allah atakam botaw owam, bi binip umuton owam, Allah Jirmec mamememtam owam, capu atewenama aecimin. Caram e wun ow acatiwcomokom. Caram e wun ow salib os op acamtopomtotorcomokom. Caram e wun ow e casembahyang cem aman omop aafcomokom. Caram e ow e wun samatin samatin cemsanpu amimirimomatawarmokom. 35Inimas ara, Allah e jokmen aemfokomas jipu siksa car aomceman. Kawey owam, ow tarowat acatiwfes. Allah, e kawey ow, e ow acatiwfesas takas, siksa car aomceman. Bap ara, e ow, e jipic tarowat juwas Habel acatiwfes. Asep ara masirin, car e Berekya atiw juwas Sakaria acatiwfokom. Car aramat ipic e Allah cemam, e Allah pok jis bafamtam jowseam, e wasec acatiwfokom ara. Bare, Allah, inim bacatiwas ajiwar, siksa car aomceman. 36Atakamnak ara, Allah inim jokmenas takas jipu, siksa a awaniemames ow aomcema.”
Yesus Yerusalem ow sawes akat aoworporef
(Luk. 13:34-35)
37“Yerusalem owa. Allah, e aratakam botaw ow, car atawenama aema. Ca nat, e ow acatiwa aemokom. Caram ek e ow dampu ajimira aemokom. Ayam arwas, e ajiwi, e kep atawanimapomcema. Doram bar arke, e catiperes, inim cimin batawanimapom jak aseremema aeof. Car ara masirin, inimas pwicak aemfokom. 38Jakaperey. Allah e carasan bakan ajicema. 39Asep jofay car atakam aotawcomokom, ‘Tuhan, asan akat, e atewenamamar ipic baomcow!’ Inim aecomokom. Ca nat, e jofay ajiwar, e dobi bopor opok aemcomokom.” Yesus inim aeef.
اکنون انتخاب شده:
MATIUS 23: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
