AEMAWIRISAS 27
27
Tentara ow, Paulus, Roma atowomirfes
1Bare. Pemerintah dar Italia capinmi bajir atakam asakamtiwfes. Atakam asakamtiwfes masirin, ar Paulusam, wun penjara aman aemapfes owam, tentara komandan ipic juwas Yulius, atetamfes. Yulius, Kaisar atentara ipic cowok ara. 2Bare, daram kota Adramitium kapal ajamuwfom. E kapal e Asia capinmi jopir kota arke bajir aemseef. Daram anajuwfom. Kota Tesalonika ipic cowok juwas Aristarkusam akac aemfom. E kota, Makedonia capinmi kota ara. 3Ajofay ara, dar kota Sidon asetayfom. E Yuliusam asan akat Paulus aomef. Inimas ar, Paulus ajowow bi bapor basowku, acuw opok. Aram e ow pok Paulus bafafaytam acuw opok. 4Bare, daram erasan ewnajuwfom. Dar fo aoworomfom aporfom, wunam wōw juwas Siprus e fo opok poman amesenfom. 5Dar masirin, Kilikia capinmiam, Pamfilia capinmiam, aokorsakayfom, wunam, Likia capinmi kota juwas Mira ajirtayfom. 6Erasan ara, e tentara komandan ipic, kota Aleksandria kapal aporef. E kapal Italia capinmi bajir aemseef. Inimas aramat ipic dar e kapal asomumforow.
7Bar mamincop ara, dar kamornakap aimirfom. Da nat, kota Kenidus sotop, asan pwicak asisikayifom. E fo aoworomforow, inimas dar e bin ajiapfom asan bwemimir asan opok. Bare, dar wōw juwas Kreta e fo opok poman fwikin amesenfom. Daram jopir bas juwas Salmone aokorsakayfom. 8Dar e fwikin sotop, asan pwicak amesenfom. Bare, dar asan juwas “Kapal Asan Akat” atayapfom. E asan kota Lasea sotop ara.
9Daram bar arke erasan aemsefom. E Amos Pok Bamase Jofayam, bare emcaofefom. (E fo bwiam emcaenawef.) Inimas e jicupum bojir asan pwicak ara. Paulus inimas aporef, wunam atjen e ow aowef. 10“Awamcokom owa. Dar aojircom, asan pwicak aemsecomom. A kapal pokam, a kapal anakatam, bare afakaysecema. Asmat owam damir aafcemes.” Inim aeef. 11E nat, e tentara komandan ipic, e kapal jurumudi aratakamam, e kapal kapten ipic aratakamam, jen ajief. Ar Paulus atakam jen baji opok. 12E kapal batayap asan, e jufu bwi pir mamincop inim bwemseawar, asan pwicak ara. E kapal kerja ow arke inimas aporfes, wunam bonajuw atakam aamsakamfes. Aram Feniks bajirtayporen. Feniks, e wōw juwas Kreta kapal batayap asan ara. Ar fo awut opok asan. Inimas ar e jufu bwi pir mamincop inim bwemseawar asan akat ara.
Jon awut atakam
13Bare. Fo kanim e jicowoc iwinawef. E kapal ow masirin, e bonajuw atakam aamsakamfesas, akat inim arawen. Inimas ar angker ajijimtawfes, wunam Kreta fwikin sotop amesenfes. 14E nat, jon awutut e wasan ewneyef. E jon juwas “Emariw Fo” ara. 15E jon e kapal akurumef. Dar e kapal, e fo boworom, emporfom opok. Inimas e fo afufumomirforow. 16-17Dar masirin, wōw kanim juwas Kauda e fo opok poman amesenfom. Daram e kapal sekoci asan pwicak aemseef aporfom. E kapal kerja ow masirin, e sekoci e kapal op ajijimtometemfes. E jonam awutnakut ara. Inimas e kapal kerja ow jec jak asakayfes. Bare dar e sekoci e kapal op asan akat atewapomfom. E kapal kerja owam, somen, kapal bak aman afimtewfes, wunam manam ajiktewfes. Erasan ara, bisin asan juwas Sirtis ara. Ar e kapal e bisin ton basimtiw omar aefes. Inimas ar e opnakut kain layar asurumnemfes. Bare, ar e fo e kapal bafufumomir atetamfes. 18E jonam bakari opokut. Ajofay ara masirin, e kapal ow, e kapal pok, bwi ajimirsampumfes. 19Jowon ara masirin, ar e kapal perkakas ban arma ajimirsampumfes. 20Bar arke ara, dar e jopokam, e bayaram, bwempor asan opok. E jon awutam bakari opokut. Dar masirin, “Bare, dar damir aafcomom.” Inim aefom.
21Tareynakut e ow amos memen opok aemsefes. Paulusam e ow bipu aememef, wunam atakam aotawef. “Bare, dor car Kreta bajirpor arapok, inim atakam emeotawfin. Car doratakam jen ajifokom ayaw, dar inim asan pwicak bwemse opok ara. E pokam takas bafakayse opok ara. 22Do nat, atjen car aowmin. Car jak faka. Awamcokom ow jipic cowok damir bwemaf asan opok. A kapal cowok afakaysecema. 23Dor Allah aras ara. Doram Allah basicim ipic ara. Bare, iram ara, Allah amalaikat cowok, e dobipu aememesman. 24Aram atakam aotawesman. ‘Paulus. Oram omar arapok. Oram Kaisar bipu aememcemem. Allah e janim aanimamemas atetamceman. Ar e kapal or akac waseokom ow takas, ajortewcema.’ Inim ajiesman. 25Awamcokom owa. Dor Allah atakam asicimamin. E aotawesman atakam, bare inim cowok aemcema. Inimas ara, caram jak faka. 26E fo nat, afufumomircemarow, wunam a kapal, wōw cowok e bisin ton asimtiwcema.” Paulus inim aeef.
27Bare. E jon, isi empat belas ajiwar aatamsimapomef. E iram e jon e jicupum bwi juwas “Adria” afufumomirforow. Iramnak ara, e kapal kerja ow dar fwikin sotop inim arawen. 28E ow masirin, somen jutur pok epcom, bwi ajururumpumfes. E bwi kaku, meter empat puluh ajiwar aporfes. Ase opok asan, ar e somen aojururumpumfes. E bwi kaku meter tiga puluh ajiwar aporfes. 29Ar e kapal, ek ton basimtiw omar aefes. Inimas ar angker empat ajiwar e kapal ep atewpumfes, wunam e jo basarimpu janim aanimfes. 30E nat, e kapal kerja ow, e kapal curuw bakorney aemfes. Inimas ar e sekoci bwi atewsemfes, wunam wun angker e kapal cimen bwi batewpum pir aefes. 31Paulus nat, atakam e tentara komandan ipicam, e tentara owam, aotawef. “A kapal kerja ow, a kapal op cowok memem opok aeces, car bwemjorem asan opok.” Inim aeef. 32E tentara ow masirin, e sekoci somen apwikimfes. Inimas ar e sekoci apemosomfes.
33Iram fak ara, Paulus, e ow takas, amos memen, atakam aotawef. “Car isi empat beas ajiwar manmok atiwapawirukum, wunam amos memen opok aemawirukum. 34Inimas ara, dor atakam car botawpormin. Car amos pemeney. Er car bajoremas ara. Bare e cakus fin cowoknakapam bapakapios opok aemcema.” Paulus inim aeef. 35Paulus inim atakam aotawef masirin, amos atewef. Aram e ow bipu, terima kasih atakam Allah aotawef. Ar masirin, e amos akomtewenef. 36E ow takasam jak fak aememfes, wunam amos aemenfes. 37Bare, e kapal ajamuwfom ow dua ratus tujuh puluh enam ajiwar ara. 38Ow amos jak anapitemfes masirin, ar e gandum, bwi ajupumfes. Er e kapal dasas bwemas ara.
E kapal daniwis aemseef
39Bare. Jo apuef. E kapal kerja ow e fwikin amsom opok. E nat, jo minukum bisin epcom aporfes. Ar masirin, e kapal, e bisin ton basimtiwpor, atakam aamsakamfes. 40Inimas ara, ar e angker somen takas apwipwikimfes, wunam e angker, bwi inim aemsemfes. Aram e kemudi somen asurumfes. Ar masirin, e kapal cimen kain layar op atewtopomfes. E fo masirin, e kapal, fwikinpu afufumomiref. 41Bare, e kapal, bwi jamnuk asan, bisin ton asimtiwef. E kapal cimenam bisin atamjukumtiwef. Aram bwemsijis asan opok. Inimas e wa awutut, e kapal ep afakamsemef.
42E tentara owam inimas aporfes. Ar masirin, e penjara ow takas bacatiw atakam aamsakamfes. E ow bacucujir wunam baysosasin. 43E tentara komandan ipic nat, e Paulus bajortew akat aemef. Inimas ar jirmec ajirimef. “Car e ow bacatiw arapok. E jitakam ow bwi batakamsopipuces. 44E jitakam opok ow masirin, papannew, kapal os dasnew, ban baomoseces. Inimas fwikin bajirces.” Inim aeef. Inimas ara ow takas fwikin asan akat ajirtayfes.
اکنون انتخاب شده:
AEMAWIRISAS 27: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
