1 KORINTUS 1
1
1Dor Paulus ara. Kristus Yesus, atakam botaw, dor atewosomfan. Allaham, eras bwem akat aeef. Bare dajowow ipicam Sostenes, a surat akac aeapomamom. 2E car Korintus bemap Yesus basicim barewsi ow, bare Allah aras ara. E Kristus car ow tarowat aemapomfan. Aramat ipicam car ow tarowat memem ajatefan. E asanin asanin Yesus Kristus basicim owam, inimasam ara. Aramat ipic bare e ow aTuhan ara. Aram daTuhan ara. Bare, dar a surat car atetamamenom. 3Daricipic Allaham, Tuhan Yesus Kristusam, asan akat car baomcan. Aram jak akat car batetamcan.
Paulus terima kasih atakam Allah aotawef
4Bare, car Kristus Yesus ajamkawimokom. Inimas Allah asan akat car aomfan. Dor inimas apormin, wunam terima kasih atakam Allah aatamotawmin. 5Car Kristus cowkon aememamokom. Inimas Allah e akatas takas car aomomkurumfan. Inimas ara, e atakam atawmokomas takas, bare akat ara. Caram camsom awut ara. 6Bare, dor e Kristus aemcowas, atakam car aotawfin. Aramat ipicam e atakam jipu cowok car aomfan. 7E Yesus Kristus daTuhan aofasineycow jofay ara, ow takas abi aporcemes. Car e jofay bwenaw manmok afemokom ara, caram e asan akatas takas aomomkurumamokom. 8Aramat ipicam car e asepnak jofay ajiwar a mamkawiawar, inim jak fakas car atatamceman. Inimas ara, e Yesus Kristus daTuhan aofasineycow, ar, “Car salah opok ow ara,” inim aecema. 9Allah, bare, e atayi aeefas takas, aemkurumcema. Aramat ipicam car e atiw, ayakap memem ajatefan. E atiw, bare Yesus Kristus daTuhan ara.
E Yesus basicim barewsi ow mampacay arapok
10Dojowow akatonokom. Dor e Yesus Kristus daTuhan akerja bwemtam ipic ara. Inimas dor atjen car aowmin. Atakam cawora. Caramaman mampacay arapok. Bi binip cawornaka. Atakam cawor mamsakamey. 11Dojowow akatonokom. Keloe e wun ajowow, atakam dor aotawfenes: “E Korintus Yesus mamkawi ow atakam aamtawmes.” Inim aefenes. 12E atakam atawminas ara, car wun ow atakam, “Dor Paulus mamkawi.” Car wun masirin. “Dor Apolos mamkawi.” Car wun masirin, “Dor Kefas mamkawi.” Car wun masirin, “Dor Kristus mamkawi.” Inim aetotormokom ara. 13Inimas car Kristus sey aseyefokomnew? Paulus e salib os op damir aaftamfannew? Ow bwi car abwimfan, ar Paulus juwas ajiemfesnew? 14Bare, dor Krispusam, Gayusam, e cowok bwi abwimof. Dor car wun awapokom ow bwi babwim opok. Inimas dor terima kasih atakam Allah aotawmin ara. 15Bare, ow, “Ar bwi abwimfenes ara, ar Paulus juwas ajiemfes,” inim atakam bwemotaw asan opok. 16Dor Stefanusam, acem owam, bwi abwimof. Dor wun owam bwi abwimofnew, dor inim binip bacomom opok. 17Bare, Kristus, dor ow bwi babwim batewosom opok. Ar e Atakam Akat bacacapiom atewosomfan. Aram dor e asmat ow e aman atakam botaw batewosom opok. Inimas dor e Atakam Akat acacapiomcey, dor e asmat ow e aman atakam botaw opok aemcimin. Ow, e Kristus salib op damir aafef atakam, mami atakam bi binip baceceremasin.
Allah abi binip umutonas
18E daniwis aemapces ow nat, e Kristus salip op damir aafef atakam, jen atakam arawen. E ajoremamom ow nat, e atakam, Allah afakas atakam apormom. 19E Alkitab atakam ara:
“Dor e bi binip umuton ow, e abi binip umutonas ajiwosomcimin. Doram e amsom ow, e aramsomas akarimtiwcimin.”
Allah inim aema. 20Inimas ara, e bi binip umuton ow onakasanaramnew? E Allah jirmec mamememtam owam onakasanaramnew? A capinmi atakam mamtaw cescuw owam onakasanaramnew? Bare, Allah a capinmi bi binip umutonas, jenas aporomtamama.
21Allah bi binip umutonnak ara. Inimas ar inim atakam asakamtiwef: “Asmat ow bi binip umuton aceceremces, aram dor amsom bwemem asan opok. Do nat, e ‘jen’ atakam asicimames ow ajortewcimin.” Inim aeef. Bare, daram e “jen” atakam acacapiomamom. 22E Yahudi ow, junum bweas bapor, janim fak aanimames. E Yunani owam, bi binip umuton atakam jen baji akat aemes. 23Da nat, e Kristus salib os op damir aafef atakam acacapiomamom. E Yahudi ow nat, e atakam bifan afayomames. E Yahudi opok owam, e atakam, jen atakam inim arawen. 24E nat, e Allah ajateef Yahudi owam, Yunani owam, e Kristus, Allah afakas baporomtam ipic apormes. Ar aramat ipic, Allah abi binip umutonas baporomtam ipicam apormes. 25Allah ajenas, bare bi binip umutonas awut ara. Asmat ow abi binip umutonas nat, kanim ara. Allah akumitasam, bare fakas awut ara. Asmat ow afakas nat, fakas kanim ara.
26Dojowow akatonokom. E Allah car ajatefan jofay, binip bacomomey. E jofay ara, car bi binip umuton ow, bare arke opok. E car juwas epcom aememfokom owam, arke opok. E car pok awut aomomfokom owam arke opok. E atakam nat, asmat ow abi binip jipuas ara. 27Asmat ow abi binip ara, “E jenas ara,” inim aemes. Allah nat, e “jen” ow, e bi binip umuton ow namke bakamapom aereremtawef. Aram e kumitas, e fak ow namke bakamapom aereremtawef. 28Ar, e asmat ow pwicak apormes owam, e asmat ow bifan afayomames owam, e juwas opok owam, aereremtawef. Ar e ow e juwas epcom ow bakumimosom aereremtawef. 29Eras aemef ara, asmat ow e Allah bipu arma batawsicimasinas ara. 30E Allah nat, car Kristus Yesus cowkon aemapomfan. Aramat ipicam, e Kristus, dar bi binip umuton batetam ipic atewemef. Allaham e Kristus aemefas aporef. Inimas aram, dar ow tarowat ara, inim atakam asakamtiwef. E Kristusam dar ow tarowat aemapomforow. Aramat ipicam e dosa fakas dar asurumtamforow. 31Er e Alkitab atakam jipuas ara. E atakam, “E asicimces ow, Tuhan cowok basicimces.” Inim aema.
اکنون انتخاب شده:
1 KORINTUS 1: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید