Genesisi 22
22
Txizimu txi xola Abrahamu
1 # Wona ni ka: Vaheb. 11:17-19. Se msana keto timhaka, ku to maheka ti to Txizimu txi xola Abrahamu, txi m'gela tiya: “Abrahamu!” Ene a to orovela, a txi khene:
“Niho hawa!”
2 # Wona ni ka: 2 Mak. 3:1. Txizimu txi to kha txona:
“Teka mwanana wako, mwanana wako wammweyo, ene Isaake, awu u m'dhundako ngutu, u tsula ka ditiko da Moriya, ahawa u no ya mningela, u txi mmaha mhamba ya kuhiswa, ka mmango wu ni no kukomba.”
3Sekoko Abrahamu a to wuka ni mabimbi-kutxa, e longela mbongola yakwe, e teka sithumi simbidi kumweko ni mwanana wakwe Isaake, a txi funya ni tikhuni ta kuya hisa ngu tona mhamba; a to tsula ka wukhalo wu Txizimu txi nga mkomba wona. 4Ngu ditshiku da wuraru, Abrahamu, a di gute maso, a to wu wona wukhalo wule, a di ngadi kule. 5Se Abrahamu a to womba tiya ka sithumi:
“Zumbani hawa ni mbongola, ani ni mfana hi ya haleya, hi txi ya khozela, hi na tshumela hi wuya kwanu.”
6Abrahamu a to teka tikhuni ta kuya hisa ngu tona mhamba, e rweka mwanana wakwe Isaake, na ene a di tekile mndilo ni txikhwa e ñola manzani, se ve tsula vona vokha vavambidi. 7Sekoko Isaake a to womba ka tate wakwe Abrahamu, a txi khene:
“Tata wangu!”
Se Abrahamu a to xamula a txi khene:
“Ngani wuwa, mwanangu!”
Isaake a to wotisa a txi khene:
“Hi ni mndilo ni tikhuni, se txi hani txihambana txa mhamba ya kuhiswa kani?”
8Abrahamu a to xamula, a txi khene:
“Txizimu ngu txona txi no ti lulamisela txihambana txa kuya maha ngu txona mhamba ya kuhiswa, mwanangu.”
Se va to tsula ngu wumbidi wawe. 9#Wona ni ka: Jak. 2:21. Va to hoka ka wukhalo wu Txizimu txi nga ti ti va leletile ka wona; Abrahamu a to aka txiluvelo, e veketela tikhuni txitimwi ka txona, e sunga mwanana wakwe Isaake, e msanzeka ha ka tikhuni txitimwi ka txiluvelo. 10Se Abrahamu a to nawuluta dianza dakwe, e teka txikhwa, kasi kudaya mwanana wakwe. 11Aniko ngu nzumani yi to kwangula Ngelozi ya Mkoma yi txi kha yona:
“Abrahamu! Abrahamu!”
Ene a to orovela, a txi khene: “Ni ho hawa!”
12Sekoko Ngelozi yi to kha yona:
“U nga sanzeke dianza txitimwi ka mfana, kambe u nga mmahe txilo; nguko se na tiziva tito, ngu ditshuri, wa txi thava Txizimu, nguko khwa ni lambela mwanana wako, mwanana wako wammweyo.”
13Sekoko mbimo yile Abrahamu a nga gula maso, a to wona txihambana msana kwakwe, txi di khwekete ngu titxheho makhukhuni; Abrahamu a to ya teka txihambana txile, e txi ningela txi maha mhamba yo hiswa, txi txi tsiveta mwanana wakwe. 14Se Abrahamu a to raya wukhalo wule ditina do khene#22:14 Vaheb. Mkoma Jire. “Mkoma a na ti wonela.” Kukhukhela konaho kala ka ditshiku da nyamsi, kudhanwa ku “Mmangoni Txizimu txi na ti wonela.”
15Sekoko ngu nzumani yi to kwangula ka wumbidi Ngelozi ya Mkoma ka Abrahamu 16#Wona ni ka: Vaheb. 6:13-14. yi txi m'gela tiya:
“Ni xambanyile ngu ngani nipune, kuwomba Mkoma, Nga ku u nga maha toneto, u nga mbi lamba ni mwanana wako wammweyo, 17#Wona ni ka: Vaheb. 11:12. ni na kukatekisa, ni andisa liveleko lako, nga tinyeleti ta nzumani, ni ku nga mtxhefa mabambe ka linene; liveleko lako li na honyola madhoropa a valala va lona. 18#Wona ni ka: Mith. 3:25. Se ngu ka liveleko lako yi na katekiswa yotshe mifumo ya ha mafuni, nguko u engisile dipswi dangu.”
19Sekoko Abrahamu a to tshumelela ka sithumi sakwe, se votshe va to tsula Bherisebha, ahawa Abrahamu a nga aka kona.
Liveleko la Nahori
20Ti di pindile totshe eto, Abrahamu a to gelwa ti to kha vona: Milka nene a m'velekete vanana mwananu Nahori. 21Uzi i ku matiwula, Bhuzi i ku mwanawe, ni Kemuweli, i ku tate wa Aramu, 22ni Kesedhi, Hazo, Pildhasi, Jidhilafi ni Bhetuweli. 23Se Bhetuweli a to veleka Rebheka; ngu vava va mtxhanu ni vararu, Milka a nga velekela Nahori, mwanawe Abrahamu. 24Nahori a ti ni msikati wa txikaba, ditina dakwe i Rewuma, nene a mningile vanana i ku: Tebha, Gahamu, Tahasi ni Mahaka.
اکنون انتخاب شده:
Genesisi 22: BEC2016
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
A Bíblia em Txitxopi © Bible Society in Mozambique, 2016.