Mǎkè 5
5
Jùsu Peana Jbɛju Tɔ̀ɔ Kǔ Sùsu Nea Lěe Ja
Mt 8.28-34; Lk 8.26-39
1Tà Jùsu klee Ɔɔ mɔ̀ cheěn nyo nynia lěe jbǒo wakǎ tɛ̀ɛǒ mɔ̀ klě Kedawlà kwɛɛnʼɛ fle mǒ, 2è nùǒ sɔnaě blǎgbè wan mǒ, tǐi doo tǐ jleě è jbɛju tɔ̀ɔ kǔ sùsu nea lěe ja nɔ̀ sɔnaě sɛklɛ bǐtìe wan mǒ ɔ̈ dia Jùsu nya bɛ̌ba. 3Jbɛjuǒ ɔ tǐnʼa lě sɛklɛ bǐtìi wan, nyu wùɛ nɔ̀ sea lě wɔ̀ bɔ pìn ɔ ble baǎje chěenʼe chɛ̀. 4Klě tǐ fòfoa wlòmo u kme ɔ ǔ pe ɔ chěen sonwe le klee be le, kɛɛ tǐ wùɛ mɔ̀ ɔ bɛ̌ i ɔ̌ sèsɛɛ i je le, bɔ̌ bɛ̌ chěenʼǒ neě ɔɔ sonwe le, è ii noǎǒ ne ɔɔ be le ɔ̀ bɛ̌ ili ke. Nyu wùɛ nɔ̀ sea kbě blě ɔ̈ mǐa lɔ je wɔ̀. 5Tǒn klee chnɛ̀ ɔ plìě sɛklɛ bǐtìiǒ slè le ɔ̌ jɛ̌ togbei ja le ɔ̌ pe tùe le ɔ̌ ni seɛ̌ ɔ̌ bɛ̌ ɔɔ chɛ̀ wan le.
6Tà ɔ jeěa lěe Jùsu nya, ɔ kpala plùplɛ klù ɔ̌ kɔa kwne bo keǒ Ɔ jemǒ 7ɔ̌ pnǎna dɛ jleě klě kpě kɛn ne win wlòmo ɔ je, “Jùsu, Ja Tmɔ Nyesoaa Jǔ, mɛ jlɛ̀ Bò nuǔ kɛɛ̌ mǒ? Ě bɛ̀teè le keǒ Nyesoaa tè mɔ̀, Nè tùiǐ sònwɛ!” 8Tè kɔn tè ɔ boɛaa tèǒ nɛ̀ moo kě Jùsu dɛ̌a kǔ sùsuǒ je Ɔ je, “Kǔ sùsu, sɔnʼě jbɛjuǒ ja mǒ!” 9È Jùsu gbɛ̀a ɔ wan Ɔ je, “Ke tae nèě kɛ nynɛ̌?” Ɔ tùa Ɔ kɛ̀ɛn ɔ je, “Ně nynɛ̌ moo Tabɔ̀ Fòfoa. Mɛ̌oǒ joo nɛ̀ moo ä fò lo.” 10È kǔ sùsuǒ ɛ bɛ̀tea Jùsu kaǒ ɛ̈ di ɛɛ numa Ɔɔ̌ diaě ɛ blǒǒ kɛn sà. 11Ɛ kɔna bogbò fòɛ nɛ̀ dia wan le keǒ togbee wakǎ mǒ klě ɛmo tàǒ. 12Ii tè kǔ sìsiǒ i bɛ̀tea Jùsu le i je, “Dboě ä bocheǒ mǒ ä miě i mǒ be.” 13È Jùsu sɔnaě i mɔ̀ mǒ ǐ sɔnaě jbɛjuǒ ja mǒ ǐ palaě bocheǒ mǒ, è boche wùɛ nìǒ tèeaǒ jbǒo kponkpǒo dɛǒ pɛ̀slɛɛaa je ï wɛ̀ɛaě jbǒ mɔ̀ de ɛ̌ kpala i. Ii wùɛǒ kǒaa i blɛɛa mɔ̀ taslěwɛɛ sɔ̌n.
14È nyopòǒ ü tùia ii jǐ mɔ̀ u kpala dǐa plùplɛ klee klě chèaǒ tbɛɛaǒo dǐ kɛn ǔ tmɔɔ̌a nyopò dɛ kpalaa tùɔn, ii tè nyopò sɔnaě dǐa mǒ ǔ dia lě u mǐa dɛ kpalaa tùɔn jě. 15Tà u nyniaǒo Jùsu mɔ̀, ù jěa jbɛjuǒ kǔ sìsi fòfoa nea lěe ja ɔ̌ nea bo ɔ̌ poa wlawlě měne plě ɔɔ dlǒ beaǒ snǔ mɔ̀, ùu wùɛǒ ù pea fano. 16È nyopò wùɛǒ jěaa dɛǒ kpalaa tùɔn keǒ jbɛjuǒ jleě mǒ klee bocheǒ u tmɔɔ̌a uu bǐì ɛɛ tè. 17Tà u wɔ̌naa tèǒ, è uu wùɛ u pea Jùsuu kpěǒ ii fano, ii tè u tmɔɔ̌a Nɔ u je, “Ä bɛ̀teè le, sɔ̀n nɔ äa blǒɔ wlòmo.”
18Tà Jùsu kea lěe blǎgbè wan be, è jbɛjuǒ kǔ sìsiǒ i sɔna lěe ja mǒ nɔ̀ tmɛɛ̌a Nɔ ɔ je, “Ě jlɛ̌ bo naà de.” 19Kɛɛ Jùsu seaǒ ɔ mɔ̀ mǒ sɔn ɔ sea Ɔ de na. Dɛɛ do Ɔ tmɔɔ̌a nɔɔ nɛ̀ moo, “Muě koǔ bo klě nè nyopò slè mì u tmɔɔ̌ no dɛǒ Koɔn nuu keǒò mɔ̀, ke Ɔ nu mòo wɔle je jbojbɛ.” 20Ii tè jbɛjuǒ ɔ̌ mua klě Dikaplà wakǎ kɛn ɔ̌ tùngmaea nyopò wùɛ tmɔɔ̌a dɛ Jùsu nuaa keǒ ɔ mɔ̀. Nyopòǒ ü wɔ̌na nii ì kaenʼa u le wlò.
Jaelɔ̀ɔ Nynejuju Klee Nynɔ tɔ̀ɔ Nymɔ Kwɛ̌ Niaa
Mt 9.18-26; Lk 8.40-56
21È Jùsu beea kɛn bo Ɔ̌ bɛ̌a jbǒǒ tìe de. Jbǒǒ wien keǒ Ɔ kɛ̀nʼaǒ bo, è diblɛ̌ fòfoa wɛ̀a de ǔ tbɛɛa Ɔ dǐ. 22È Jùwɛ nyoo Nyesoa koǔu nyefòɛ tɔ̀ɔ ɔ̈ kɔn nynɛ̌ moo Jaelɔ̀ nɔ̀ dia lě Ɔ mɔ̀. Tà ɔ jěaa Jùsu, ɔ kɔaǒ Ɔ kwne jemǒ bo 23ɔ̌ bɛ̀tea Ɔ le chɔɔ ɔ je, “Ně nynejuju chěnchaě neǒ kokǒ snǔ mɔ̀, Ě bɛ̀teè le, diě Mìǒ ɔ Nè son jleě mǒ bo po ɛ̈ di ɛɛ numa ɔɔ kwɛ̌ mǐ dɛ bɔ̌ ɔ mǐ kmɔ̌ ne!” 24Ii tè kě Jùsu nua ɔ de nena ǔ mia, è tà u keaa mi, nyopò fòfoa nù nɛna Ɔ de ü jejɛ̌ɛaě Ɔ jǐ měne.
25Ɛ kɔna nynɔ tɔ̀ɔ neaě uu slè ɔ̈ blěaa nymɔ kwɛ̌ ɛ̈ niaa chɔɔ klě jlěe pù tùo sɔ̌n wlòmo. 26Kwɛ̌ǒ ɛ tùa ɔ sònwɛ klě tǐ pɛ̀ti wlòmo. Ɔɔ wlě wùɛ ɔ kɔnaa ɔ ploa i le klě dɛjǐɔpò mɔ̀, kɛɛ ɛɛ̌ poaǒ dɛ, kwɛ̌ǒ ɛ̌ pònpaea le klě ɔ mǒ. 27Tà ɔ wɔ̌naa dɛ Jùsu wɔ̀le je Bɔ nuaa, è nɔ̀ǒ bublǔa nyopòǒ ɔ̌ diiaě Ɔ demǒ ɔ̌ tǒa Ɔɔ wlawlǒ le. 28È dɛ nynɔǒ ɔ chlàlaa klě ɔɔ chɛ̀ wlò jleě nɛ̀ moo, “Bɛ̌ nu boǒ tǒ Ɔɔ wlawlǒ le sosǒ, è ně kwɛ̌ kɔn bɛ bɔ̌ dɛ.” 29Tà ɔ toǒa bòo Jùsuu wlawlǒ le, ɔ̀ɔ nymɔ kwɛ̌ nɛ̀ǒ kǎla je ɔ̌ jia lɛ ɛ̈ moo ɔɔ sònwɛ jejeɛ̌ǒ ɛ bɔ̌a dɛ. 30Tǐi doo tǐ jleě è Jùsu jěa ɛle ɛ̈ moo kpě sɔnaě Ɔ mǒ, ii tè Ɔ chèa diblɛ̌ǒ ja Ɔ̌ gbɛ̀a u wan Ɔ je, “Mɔ toǒ kɛ Ně dalo le?” 31È Ɔɔ mɔ̀ cheěn nyo gbɛ̀a Ɔ wan u je, “Keà diblɛ̌à u tìn kɛɛ ǔ tbɛɛ Mòo dǐ kě gbɛ̀ kɛ i wan nyu tae tǒ Mòo lee?” 32Kɛɛ Jùsu tɛnaě u slè le kaǒ nyu tae bɔ̈ nua ɛmo dɛǒ. 33È nynɔǒ ɔ jia dɛ kpalaa tùɔn klě ɔ mǒ, ii tè ɔɔ fě sènʼa le ɔ̌ pea fano. È nɔ̀ǒ diaě Jùsu mɔ̀ ɔ̈ kɔa kwne bo keǒ Ɔ jemǒ ɔ̌ tmɔɔ̌a Lɔ dɛ klɛɛkpɛ kpalaa tùɔn klě ɔ mǒ. 34È Jùsu tùa lɔ kɛ̀ɛn Ɔ je, “Ně nynejuju, nè tè wlò popoɛǒ kɔ̀nʼɔ klěě mǒ nɛ̀ǒ pean mò, ii tè mu, kpa plɔɔ bloblɛ, nè sònwɛ jejeɛ̌ wùɛ ɛ wɛ̀ le.”
35Tà winʼǒ i kɛ̀na lě Ɔɔ wan bo, è nyopòǒ u dboaa ü sɔna lěe Jaelɔ̀ɔ koǔ bo mǒ è nùǒ nynia, kě u dɛ̌a Jaelɔ̀ je u je, “Nè nynejujuǒ ɔ kǒ lo. Mɛ kɔɔ̌n tè tùiǐ jè kɛ Tee Nyuà feanfeǒ?” 36Dɛǒ u boɛaa Jùsu sea ɛ dɛ da, kɛɛ kě Ɔ dɛ̌a Jaelɔ̀ je Ɔ je, “Bɔ̌ fano pepeɛ, kpae leě wlò sosǒ.” 37Jùsu sea nyu tɔ̀ɔ kpa ɛ̀ sìnʼǒ Pitɛ̌ klee Jìmǐse klee Jɔ̀ɔ̌n ɔ̈ moo Jìmǐsee mamǔ. 38Tà u nynia lěe nyefòɛǒ ɔɔ koǔ bo, è jale jejǎea nɛ̀ u jɛɛa lě, nyopò fìnʼa wɔle fǐɛn ǔ pea tùe le.
39Tà Jùsu palaěe koǔǒ bo, è kě Ɔ dɛ̌a nyopòǒ je Ɔ je, “Mɛ kɔɔ̌n tè a niǐ kɛ wɔle le a fìǐn? Nynejuà ɔ se kǒ, ɔ mɛ ne sosǒ.” 40Tà u wɔ̌na nii, è Nɔ̀ǒ u cheɛ̌a mɔ̀. È Ɔ piěaǒ uu wùɛǒ plomǒ Ɔ̌ dǔa jǔǒ ɔɔ gbeǐ klee naǎ klee Ɔɔ mɔ̀ cheěn nyoo tanʼǒ mǒ ǔ palaě blòǒ ɛ̈ kɔn wlòmo jǔǒ ɔ nea lěe. 41È Ɔ kmea jǔǒ son, kě Ɔ dɛ̌a Ɔ je, “Talatà Kumà!” Klě Ɔɔ blětà win wlòmo ɛ sɛ̀n nynɛ̌, “Nyneju gbeàò, Ě tmɛɛ̌ neè ne dǔ jemǒ!” 42È tǐi doo tǐ jleě è nyneju nɔ̀ǒ sɔna mǒ ɔ̈ nɛa le. Ɔ kɔna jlěe pù tùo sɔ̌n. È nyopò wùɛǒ ü neaa tùɔn kɛn ì kàea u bo wan. 43È Ɔ maěaě nyopòǒ chìjoɛɛ nɔkǔ mǒ bo Ɔ je, “Sɛjesɛ nyu wùɛ nɔ̀ baǎ tmɛɛ̌ ne keǒ dɛà ɛɛ tè mɔ̀. A pɔ̀n didi dɛ le a mǐ nynejuà nye ɔ mǐ di.”
اکنون انتخاب شده:
Mǎkè 5: NKWJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Grebo New Testament © Bible Society in Liberia, 1989, reprint 2004.
