Iƹibraniyen 9
9
Lƹibada ṯamezwarut ḏeg Uqiḍun Ameqqran
1Ȓƹaheḏ nni amezwaru tuɣa ɣares can n lqawanin n lƹibada u ḏ ijjen n umcan amqeddes ḏi ddunect-a. 2Iƹni sewjaḏen ijjen n Uqiḍun Ameqqran ḏayes ṯnayen n ixammen. Ḏeg uxxam amezwaru ggin ḏayes ȓqendiȓ ḏ ṭṭabȓa mani srusan aɣrum nni itqeddamen ḏ ṣṣeḏqeṯ i Arebbi. Axxam nni qqaren-as <Axxam Amqeddes.> 3Ṯumma ḏinni ijjen n arrwaq,#9.3 Arrwaq-a netta ḏ arrwaq wis ṯnayen. ɣar ḏeffar nnes ḏinni ijjen n uxxam wis ṯnayen qqaren-as <Axxam Amqeddes Aṭṭas.> 4Ḏayes ȓmejmar n tbaxur icellel s ddheb, u ḏ tabut n ȓƹaheḏ marra iɣezḏisen nnes u ḏ ṯisi nnes celllen s ddheb. Ḏi tabut-a ḏayes aqnuc itwaṣenneƹ s ddheb, aqnuc nni ḏayes aɣrum umi qqaren lmanna. Tabut-a ƹaweḏ ḏayes ṯaɣȓiṯ n Harun ṯnewwar, ḏ ṯeȓwiḥin n ƹecra n ȓuṣiyaṯ. 5Ṯaqebbarṯ n tabut-a xas ṯnayen n lmexluqaṯ n lƹaḍama ggin am munikuṯ ɣarsen afriwen. Ṯiȓi n wafriwen nsen ṯɣeṭṭa ṯaqebbarṯ-a ṯanita n arraḥmeṯ. Walakin neccin ḏi ȓweqṯ-a war nzemmar a nweṣṣef ṯimesȓayin-a ṯa s ṯa.
6Wami swejḏen marra ṯimesȓayin-a ammu, tuɣa taḏfen ȓfuqaha ɣar uxxam amezwaru kuȓ nhar ḏi lʼawqat nnes, teggen ccɣeȓ nsen. 7Walakin axxam nni wis ṯnayen itraḥ ḏinni ɣir ȓefqi ameqqran, ijjen n ṯwaȓa ḏi lƹam u ṣafi. Wa labud akiḏes yawi ca n iḏammen bac aṯen iqeddem x yixef nnes u x ddnub iy ggin ccaƹb bȓa ma ṯent ssnen. 8Min ḏaneɣ d isbiyyen Arruḥ iqeddsen ḏi manaya? Isbiyyen-aneɣ-d meȓa ƹaḏ iqqim Uqiḍun nni Ameqqran, ataf war innurzem ca ubriḏ ɣar min iǧan ḏ amqeddes aṭṭas. 9Marra manaya iticc ijjen lmiṯal i ȓweqṯ-a iy ḏi neǧa ȓexxu. Ccɣeȓ nni iy tuɣa teggen ḏinni xmi tqeddamen ṣṣeḏqeṯ ḏ dbiḥaṯ war izemmar ca aḏ issiṣfa ḍḍamir n wenni iƹebbḏen. 10Manaya ɣir ḏayes can n lqawanin n ccariƹa x lmakla ḏ ṯsessi ḏ ȓuḍu. Lqawanin-a war ǧin ca x wuȓawen n bnaḏem, xeddmen ḥetta ȓweqṯ n ȓƹaheḏ ḏ jḏiḏ u ṣafi.
11Fa Lmasiḥ wami d iḥḍar ḏ ȓefqi ameqqran n ṯmesȓayin-a iy d yusin, iƹni yuḏef aqiḍun nni iǧan ƹaḍim war ḏas inqis walu war ṯ bnin ca ifassen n bnaḏem, war iǧi ca zi min d itwaxeȓqen ḏi ddunect-a. 12Yuḏef ijjen n ṯwaȓa u ṣafi ɣar Uxxam Amqeddes Aṭṭas. Netta war yuḏif ca s iḏammen n iɣayḏen niɣ ḏ iyenduzen; Lla, yuḏef s iḏammen nnes nniṯ ixeǧes xaneɣ lfidya bac a nenjem i ȓebda. 13Cuf, iḏammen n iɣayḏen ḏ iyenduzen ḏ yiɣɣeḏ#9.13 Iɣeḏ netta ḏ ṯnifesṯ. n ṯfunast truccan zzaysen yinni ixenzen issiṣfa-ṯen bac aḏ ḏewȓen ḏ imenqawiyen. 14Meȓa amenni, mecḥaȓ iy ḏaneɣ ɣa ssiṣfan iḏammen n Lmasiḥ ktar! Netta iruḥ s Arruḥ nni itduman i ȓebda iqeddem ixef nnes bȓa ȓƹib i Arebbi, iḏammen nnes aḏaneɣ ssiṣfan ḍḍamir nneɣ zi ssayiʼaṯ bac a neƹbeḏ Arebbi iddaren.
15Falihaḏa netta Lmasiḥ itcafaƹ jaraneɣ ḏ Arebbi s yijjen n ȓƹaheḏ ḏ jḏiḏ bac yinni umi d iȓaɣa Arebbi ataf aḏ awin lwareṯ iy zi ṯen iwƹeḏ itduman i ȓebda. Liʼanna Lmasiḥ immuṯ ḏ lfidya ḥima aḏasen iḍȓeq aḏ iȓin ḥurr zi ȓmuƹṣiyaṯ iy ggin swadday i ȓƹaheḏ nni amezwaru.
16Cuf, ƹlaḥsab lwaṣiya labud aḏ d awin chada n lwafat n wenni iggin lwaṣiya. 17Liʼanna lwaṣiya war ṯṣeǧeḥ ca illa meȓa immuṯ bab nnes. Meȓa ƹaḏ iddar bab nnes iƹni wenni iy t yurin ataf war ṯṣeǧeḥ ca. 18X manaya tuɣa waxxa ḏ ȓƹaheḏ amezwaru war iṣeǧeḥ ca ḥetta wami uzzȓen iḏammen. 19Aqa nnabi Musa wami iɣra kuȓ ȓuṣiyeṯ i marra ccaƹb, ṯumma iysi iḏammen n iyenduzen ḏ iɣayḏen ixelleṭ-iṯen ak waman, ṯumma irucc zzaysen Lkitab s yixef nnes ḏ marra ccaƹb s ṯaḍufṯ ṯazeggwaɣṯ ḏ uzuy.#9.19 Zuy netta ḏ ijjen n arbiƹ. Ɣeṭṭsen-ṯ ḏeg iḏammen truccan zzayes. 20Inna-asen qa yina ḏ iḏammen n ȓƹaheḏ iy ḏawem yumar Arebbi aḏ teggem. 21Amenni ƹaweḏ irucc Aqiḍun Ameqqran s iḏammen-a ḏ marra ȓeqcuƹ iy ḏayes staƹmaȓen ḏi lƹibada. 22U ḏ ṣṣaḥ ƹlaḥsab Ccariƹa n Musa ƹȓayen marra ṯimesȓayin aḏ twassiṣfant s iḏammen. U bȓa ma aḏ azzȓen iḏammen ataf ȓmuƹṣiyaṯ war twaɣfirent ca.
23Iḏen, ṯimesȓayin-a itcabbahen ḏi ṯmesȓayin nni n ujenna tuɣa twassiṣfant s dbiḥaṯ. Walakin ṯimesȓayin nni s yixef nsent n ujenna lla; Twassiṣfant niṯenti s yijjen n nnuƹ n dbiḥaṯ ḥsen zi ṯinni nneɣni. 24Cuf, Lmasiḥ war yuḏif ca Axxam nni Amqeddes Aṭṭas iy ibnan s ifassen n bnaḏem itcabbahen waha ḏeg wenni n ṣṣaḥ; Lla, netta yuḏef ḏeg ujenna nniṯ aḏ iḥḍar zzaṯ i Arebbi ƹlaḥsab neccin. 25War yuḏif ca ḏeg ujenna bac aḏ itqeddam ixef nnes aṭṭas n ṯwaȓaṯin amecnaw mamc itegg ȓefqi nni ameqqran xmi itaḏef kuȓ lƹam ɣar Uxxam Amqeddes Aṭṭas s iḏammen maci nnes. 26Maƹlik amenni tuɣa ataf labud Lmasiḥ itwaƹeddab aṭṭas n ṯwaȓaṯin zeg wami twaxȓeq ddunect-a. Walakin lla, ihwa-d netta ijjen n ṯwaȓa aȓ uneggaru n zmanaṯ bac aḏ isbeṭṭeȓ ȓmuƹṣiyeṯ wami iqeddem ixef nnes ḏ dbiḥeṯ. 27Ȓmewṯ itmetta-t bnaḏem ijjen n ṯwaȓa, ṯumma iḏeffar-it Lḥisab ḏ Lƹiqab. 28Ammu Lmasiḥ, itwaqeddem ḏ dbiḥeṯ ijjen n ṯwaȓa bac aḏ yarbu ȓmuƹṣiyaṯ n waṭṭas n yiwḏan. Ṯumma aḏ d ihwa wis marrṯayen.#9.28 Siḏiṯneɣ Ƹisa aḏ d ihwa wis marrṯayen ɣar ddunect-a ḏi Nhar Aneggaru. Mayemmi? Maci ƹlaḥsab ȓmuƹṣiyeṯ n yiwḏan ƹaweḏ; Lla, aḏ d ihwa bac aḏ isenjem yinni iy ṯ itrajan.
اکنون انتخاب شده:
Iƹibraniyen 9: RIF
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید