1 Ayṯ-Kurinṯ 3
3
Lxilaf ḏi Jmaƹeṯ n ȓmuminin
1Ay ayṯma, nec tuɣa war zemmareɣ ca akiḏwem ssiwȓeɣ am yiwḏan iteggen array i Arruḥ n Arebbi. Lla, ssiwȓeɣ akiḏwem am yiwḏan ig iteggen array i nnefs nsen, am iseyman waha iy d ixeȓqen ḏi Lmasiḥ. 2Uciɣ-awem aḏ tḥeȓwem aɣi#3.2 Aɣi netta ḏ aceffay ḏi ȓebƹaḍ n imucan ḏi Arrif. waha maci lmakla ḏ ṣṣaḥ, lmakla ḏ ṣṣaḥ tuɣa war ḏas ṯzemmarem ca. Aqa ƹaḏ ȓexxu war ḏas ṯzemmarem ca, 3kenniw ƹaḏ teggem array i ṭṭabiƹa ṯaƹeffant nwem. Meȓa itiȓi ȓeḥseḏ jarawem ḏ umenɣi, ataf teggem array i ṭṭabiƹa ṯaƹeffant nwem ataf tƹicem am yiwḏan n ddunect-a waha, niɣ lla? 4Cuf, meȓa ijjen iqqar nec ḏeffareɣ Bulus ijjen iqqar nec ḏeffareɣ Apullus, ataf kenniw tƹicem am yiwḏan n ddunect-a, niɣ lla?
5Iwa min iƹna Apullus? Min iƹna Bulus? Neccin ḏ ixeddamen waha, ṯumnem x ufus nneɣ mammec ḏaneɣ d yuca Siḏi Arebbi a nexḏem. 6Nec ẓẓuɣ, Apullus isessew, u ḏ Arebbi iy kenniw iseɣmayen. 7Wenni iteẓẓun ḏ wenni isessawen niṯni war ǧin ḏ walu. Wenni iǧan netta ḏ Arebbi iƹni netta iseɣmayen.
8Fa wenni iteẓẓun ḏ wenni isessawen ȓxeḏmeṯ nsen ḏ ijjen, kuȓ ijjen aṯ ijaza ƹlaḥsab ȓxeḏmeṯ nnes. 9Liʼanna neccin ncarrec ak Arebbi ḏi ȓxeḏmeṯ-a. Kenniw ḏ amarjeƹ nnes ḏ ȓebni nnes. 10Nec ƹlaḥsab arḍa iy ḏayi yuca Arebbi ggiɣ ijjen n dsas am yijjen n lemƹallem ifsus netta. Yusa-d ijjen nneɣni ibenna x dsas-a. Walakin u labud kuȓ ijjen aḏ yarr ȓbaȓ mammec ɣa ibna x dsas-a. 11War ḏinni ḥadd izemmar aḏ igg ijjen n dsas nneɣni x wenni ḏinni itwaggen, u ḏsas-a wanita ḏ Ƹisa Lmasiḥ. 12-13Ijjen, meȓa ibna x dsas-a s ddheb niɣ s nnuqarṯ niɣ s ṯizra ṯiṣebḥanin niɣ s ukeccuḍ niɣ s arbiƹ niɣ s urum, ataf ȓxeḏmeṯ nnes aḏ d tban, iƹni Yum Lḥisab ḏ Lƹiqab iy d ɣa ismeḍhar manaya. U ƹaweḏ manaya aṯid ṯesmeḍhar ijjen n ṯmessi u ṯimessi-ya aḏ tṣaḥḥeḥ man nnuƹ n ȓxeḏmet iy igga mkuȓ ijjen. 14Wenni ibnan x dsas-a ȓxeḏmeṯ nnes nican war t tett ca ṯmessi, ataf aṯ ijaza. 15Wenni umi ɣar ṯeḥreq ȓxeḏmeṯ nnes, ataf aḏ ixsar ljaʼiza nni. Netta s yixef nnes aḏ injem walakin am wenni yallah d yarewȓen zi ṯmessi.
16Ma war ṯessinem ca belli ḏ kenniw iy iǧan ḏ ṯamziḏa n Arebbi, izeddeɣ ḏaywem Arruḥ n Arebbi? 17Wenni ɣa iheḏmen ṯamziḏa-ya n Arebbi, aṯ ihḏem Arebbi. Liʼanna ṯamziḏa-ya n Arebbi nettaṯ muqeddes u ḏ kenniw ig iǧan ḏ ṯamziḏa nni.
18Itxeṣṣa war ḏinni itiȓi ḥadd ixeddeƹ ixef nnes. Meȓa ḏinni can yijjen jarawem iḥesseb ixef nnes ḏ amiɣis ḏi zman-a, itxeṣṣa aḏ iḏweȓ ḏ abuhaȓi zaƹma bac aḏ yiȓi ḏ amiɣis. 19Cuf, ȓefhameṯ n ddunect-a nettaṯ ḏ ṯubbuhȓiya waha ɣar Arebbi. Liʼanna iqqar Lkitab: <Netta iṭṭef imiɣisen ḏeg ixarwiḍen nsen.> 20Iqqar ƹaweḏ: <Siḏi Arebbi issen lʼafkar n imiɣisen war neffƹent ca.>
21-22Iwa ṣafi, maci aḏ teftaxarem s iryazen. Cuf, kuȓci nwem: waxxa ḏ Bulus niɣ ḏ Apullus niɣ ḏ Buṭrus, niɣ ḏ ddunect-a niɣ ḏ ṯuḏarṯ niɣ ḏ ȓmewṯ, niɣ ḏ min iǧan ȓexxu niɣ ḏ min ɣa yiȓin menbaƹd, iƹni kuȓci nwem. 23Kenniw n Lmasiḥ, u Lmasiḥ netta n Arebbi.
اکنون انتخاب شده:
1 Ayṯ-Kurinṯ 3: RIF
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید