Matius 14

Si Yohanes Mabaptis pinaté

(Mrk. 6:14-29; Luk. 9:7-9)

1Asi témpo itu, en abar andumoro' i Yesus kinalingaano i Herodes, kolano an sangkum ing Galilea. 2Wo icuana a sé atana, “Si anioo si Yohanes Mabaptis si matéo, sia itumouo sumawel! Ampa'paan in ituo sia awéan kawasa i mengéma' sé kakaya'kaan.” 3#Mrk. 6:17-18; Luk. 3:19-20 Icua i Herodes in taniitu ampa'paan indior siao e rumu'du' tumangka' si Yohanes, ipapawa'kesna wo ipapauntepna am bui ampa'paan si Herodias penanaan i Filipus tuarina niindo i Herodes mamuali penanaanna. 4#Im. 18:16, 20:21; Luk. 3:19-20 Ampa'paan asi témpo itu si Herodes peroma-romaan i Yohanes in tana'i, “Ra'ica loor ko mindo si Herodias!” 5Mandé ka'i casalé' i Herodes e maté si Yohanes, taan caindé'na sé tou keli ampa'paan weroten é tou si Yohanes itu nabi.

6Taan asi endo tuma'néi ing ketou i Herodes, si toyaang wéwéné i Herodias maéngké an dior é sakéi wo mengaarui in até i Herodes, 7akar si Herodes sumumpa wéanna oka sapake' em pangileken i toyaang wéwéné itu.

8Ampa'paan e nunuwu' léwo' i inangna, si toyaang wéwéné itu kumua, “Wééo mai a yaku en do'kos i Yohanes Mabaptis am bawo im baki!”

9Kelinga in itu, en até i Herodes mawendu, taan ampa'paan in sumpana an dior é sakéina, niénanna em pinangilek i toyaang itu. 10Iru'du'na mangé mokol in do'kos i Yohanes am bui. 11Wo en do'kos i Yohanes itu paalin éra mai aitulir am bawo im baki, wo iwéé a si mangala'un itu, wo iwééna a si inangna. 12Kekawus in itu mayo sé murit i Yohanes Mabaptis mindo i mayatna wo icubur éra. Wo mangé icua éra a si Yesus.

Si Yesus méé kanen a sé lima ngariwu tou

(Mrk. 6:30-44; Luk. 9:10-17; Yoh. 6:1-14)

13Kelinga i Yesus en abar i Yohanes Mabaptis imatéo, wo Sia sumingkir angé tumela'u in tampa itu. Wo Sia sumaké an londéi mangé an tampa lulu in tou. Taan an tutuw kinailekan é tou keli, wo séra kumesot ang kota-kota éra wo maya' ing kécéi kumiit in lalan katanaan. 14Icateka' mangé en londéi pakasakéan i Yesus, sérén-Na keli en tou wo mai eng kaupusan-Na ai séra wo sé tou sumakit sinama'-Na.

15Matawio im bengi, mai sé murit-Na wo kumua, “Guru, en tampa anio' lulu in tou wo mawengio. Iru'du'o mangé sé tou keli itu wosama' séra ro'na tumeles kakanen an doo-roong tawi am bia'i.” 16Taan icua i Yesus, “Séra ra'io sangali maréng. Séra musti wéan iow kanen.” 17Isowat éra, “Guru, eng kakanen ai cami wayake' in lima roti wo rua sera'.” 18Icua i Yesus, “Paalino mai a Yaku.” 19Wo iru'du'-Na sé tou keli lumukut an dukut. Kekawus in itu indon-Na sé lima roti wo sé rua sera' itu wo Sia kumanat angé an langit kumua i makapulu'sama'. Te'bi-te'biin-Na e roti itu wo yéké-éké a sé murit-Na. Wo yéké é murit-Na a sé tou keli. 20Séra im baya icuman akar i mawesu. Wo umungen éra eng kakanen sé imatela'u, eng kakelina sangapulu' rua wantang tiruw. 21Sé icumiit icuman a si témpo itu awéan wona' lima ngariwu tuama, ra'ica icauntep sé wéwéné wo sé toyaang.

Si Yesus mawaya' am bawo in dano

(Mrk. 6:45-56; Yoh. 6:16-21)

22Kekawus in itu, iru'du' i Yesus sé murit-Na sumaké an londéi rumior angé an lewet in lour Galilea. Ang karoro'an in itu iru'du'-Na sé tou keli itu maréng. 23Kekawus é tou keli itu ru'du' i Yesus maréng, wo Sia sumosor angé a si esa tolaina en sumombayang Sia in esa. Matawi im bengi, Siake' in esa am bitu. 24An tutuw itu, en londéi pakasakéan é murit-Na piraano mil eng katayang, an unero in lour en londéi itu pemolé-moléi oka in sempa', wo masu'suk in deges repet. 25Wona' jam tiga matawio i mando, si Yesus mai ai séra mawaya' am bawo in dano. 26An tutuw paileken é murit-Na Sia mawaya' am bawo in dano, séra mangaya'ka' wo mangko', “Mu'kur léwo'”, wo séra mengangko-ngangko' ampa'paan in indé'. 27Taan makala'us icua i Yesus ai séra, “Meneso! Si anioo Aku, tioo maindé'.” 28Wo icua i Petrus, “Tuang, sa Ico itu, iru'du'o aku maai a si Tuang maya' am bawo in dano.” 29Icua i Yesus, “Mayoo!” Wo si Petrus si an londéi, tumumpa wo maya' am bawo in dano maangé a si Yesus. 30An tutuw kapendamanna en deges repet, maindé'o sia wo metine-tinepo, wo sia mangko', “Tuang, tawangenai aku!” 31Wo makala'us yulur i Yesus eng kama-Na wo timboien-Na si Petrus, wo icua-Na, “Éi, tou ra'ipé' talos maéman, kéitu réén ko marua-rua wasa?” 32Wo séra sumaké an londéi wo en deges ka'i menteng. 33Sé tou an londéi itu kumuru en sumiri' Sia wo kumua, “En ulitna si Tuang Toyaang i Amang Kasuruan.”

Si Yesus sumama' sé tou sumakit ang Genesaret

(Mrk. 6:53-56)

34An tutuw éra icateka'o mangé an lewet in lour, séra sumuwa' ang Genesaret. 35Sé tou an tampa itu makatuus si Yesus, wo pengua-ngua éra andumoro' Sia am pakasa in sangkum itu. Wo pakasa sé tou sumakit iwali éra mai a si Yesus. 36Wo séra mekiupus a si Yesus wosama' énan-Na mandé asaloke' misu' in tempok in juba-Na. Wo pakasa sé tou sumakit sé misu' ai Sia imasama'.

اکنون انتخاب شده:

Matius 14: TNT

های‌لایت

به اشتراک گذاشتن

کپی