Juɛl a pwɔdɛn tɛ Mak 1
1
1JUƐL a pwɔdɛn tɛ Kacɛ Juɔŋ a Tolɛn, Yecu Kitho jɔnɛn ɔŋ.
2Ballɛ ba juɛl kienɛn nebi Ajaya:
Gwɔlɛ, Ya cwondɛ minɛ cwunɛn Ya i nyamɔ ti,
Minɛ yɔŋɛ pɔy i;
3Pwɔnu minɛ yaadɛn wuwɛ jidɛn,
Naŋdɛ pɔy Ciagɔn Tolɛn,
Noŋdɛ pɔy a tɛlgɛ.
4Jɔn bɛnɛ, eke a minɛ noŋɛ baptaijɛ tɛ wuwɛ jidɛn ɔci mitkɛ ma tɛ juɛl baptaijɛ tɛ makɛ wiagɛ tɛ nɔjɛ ɔci nyingɛ yalɛn aŋkɛ nɔjɛ badɛ. 5Ma ɔcɛn Jɔn ti wakɛnda, ɔcɛn ta ban Judaya, ɔcɛn ta ban Jerucalem. Jɔn noŋɛn baptaijɛ tɛ makɛ lɛrtɛ nɔjɛ eken da, noŋɛn baptaijɛ thul ji, thul Jordan. 6Jɔn yhɛŋyɛ buruŋ naŋɛn tɛ ji koloŋa, ɔci bwɔrɛn eke degdɛ tɛyɛ ti; eke omdɛ tooŋgɛ ɔci cinyɛ. 7Jɔn gɔkjɛn: Minɛ ballɛ botɛ ya ŋwoyɛ ti, Eke a minɛ tolcɛn ta ya, ya bwɔnɛ minɛ cwɔkɛn bɛ. 8Ya baptaijɛ ɣɛke piak jidɛn; Eke baptaijɛn tɛ Boŋ a Bɔwɛn jitɛn.
9Aŋkɛ tɛ ɣoŋkɛ a nɛnɛ Yecu bɛnɛ ta Nadaret Galili, ɔci Jɔn noŋdɛ Eke baptaijɛ tɛ Jordan ji. 10Aca nɛntɛ Yecu ballɛ bɛyɛn ta piatɛn Eke gɔrcɛn puɔlɛ nyalɔ jɛnyɛn jidɛn, ɔci Boŋ a Bɔwɛn ba bom cocɛn Eke ti: 11ɔci pwɔnu bɛnɛn ta nyalɔ, gɔkjɛn: I Kacɛ Ya, Ya anɛ I nɛ tolɛn, yum Ya pwɔn a pwɔn I ti.
12Aca nɛntɛ Yecu enyɛ Boŋ a Bɔwɛn tɛ wuwɛ jidɛn. 13Yecu ballɛ wuwɛ jidɛn ninkɛ maban aŋɛ ayo ɔci Cetan bɛnɛ Eke ti aŋkɛ Yecu maaldɛ eke tɛ nɔjɛ; Yecu ciyɛ tɛ wuwɛ yakɛn liy; ɔci makɛ enjel nyotɛ Eke.
14Tɛ nɛnɛ badɛn Jɔn uljɛn ma cigɛn ji, ɔci Yecu bɛnɛ Galili, mitkɛn ma tɛ juɛl a pwɔdɛn Juɔŋ a Tolɛn ti. 15Eke gɔkjɛn: Ɣoŋ a bɛnɛ dokɛ, ɔci Kɛn Juɔŋ a Tolɛn ballɛ cwɔlcɛn: wiagɛ ta nɔjɛ, nyingɛ yalɛn; jithɛ juɛl a pwɔdɛn.
16Yecu atɛn a wun pɔy thul Galili, Eke gɔrcɛn Caimon ɔci mod Caimon Andru wiwɛn ɣuŋ thul ji: eken a makɛ muwɛ yak. 17Yecu gɔkjɛn eken ti: Bɛdɛ, botɛ Yɛ ti, ɔci Ya lotɛ ɣɛke ti akɛ ɣɛke muwɛ maban. 18Aŋkɛ aca nɛntɛ ɣuŋgɛ dulɛn, eken atɛn botɛ Yecu ti. 19Eken atɛ lakɛn diɛrɛn tɔlɛ, Yecu gɔrcɛn Jakob kacɛ Yebedi, yakɛn mod eke Jɔn, ballɛ bumɛ ji, yɔŋɛn ɣuŋgɛ. 20Aca nɛntɛ Yecu borcɛn eken: ɔci Jakob ɔci Jɔn, wegen Yebedi dulɛn bumɛ ji yakɛn makɛ kɛngɔn eken, ɔci eken atɛ botɛn Yecu ti.
21Eken atɛn Kapernaum ji; ɔci tɛ ɣoŋ a wuwɛn Yecu atɛ cinagog ti, kacɛn ɣora ɔci ma laldɛn tɛ juɛl. 22Yecu ma laldɛn nɛ pwɔdɛn, ba makɛ kijɛ wɛragɛ budan bɛ; Yecu ma laldɛn ba minɛ juɛl nhijɛn kan. 23Minɛ mwuŋɛn juɔŋ a yayɛn ballɛ cinagog ji; eke yaadɛ, gɔkjɛn: 24I Yecu Nadaret, ɔn noŋdɔn wakɛ I ti; I bɛnɛ ɔn nhugdɛn? I nhijɛn ya dokɛ, I a Minɛ Bɔwɛn Juɔŋ a Tolɛn ti. 25Ɔci Yecu ɣitɛ eke ti, gɔkjɛn: Ciyɛ liedɛ, kacɛ burɛ ta minɛ. 26Juɔŋ a yayɛn nɛnɛ minɛ jɛmɛn, yaadɛ nɛ peny, ɔci kacɛn burɛ, minɛ dulɛn dokɛ. 27Ma punɛn wakɛnda, ɔci ma tocɛ a tatɛn pokɛn, gɔkjɛn: Nɛnɛ a wakɛ? juɛl a wonɛ! Minɛ ɣitɛ jɔkɛn yayɛn ɔci jɔkɛn jithɛ. 28Juɛl wakɛ naŋɛn Yecu piyɛn nɛ peny non warɛda ban Galili.
29Tɛ wun koyɛn burɛ tɛ cinagog Yecu ɔci Jakob ɔci Jɔn, ma a dokɛn, kacɛn ɣora ɣon Caimon ɔci Andru. 30Ɔci eŋ Caimon megen ballɛ ninɛ tɛ inyu warɛ yayɛ. Yecu myitkɛ ma nɛ peny: 31aŋkɛ Eke bɛnɛ ɔci minɛ warɛ yayɛn mwugdɛ tɛ biŋɛ, luldɛn nyalɔ; warɛ pwɔnɛ dokɛ, eke atɛ nhɔrthɛ ma am.
32Nɛ tenɔ tɛ ɣoŋ ɣocen ma ɛŋnɛ makɛ wakɛn yɛyɛn Yecu ti, yakɛn ma mwuŋɛ jɔkɛn. 33Ɔci ma ban ji ɔcɛn wakɛnda tɛ ɣon Caimon. 34Ma mwuŋɛn wajɛ a coŋɛn pwɔŋnɛn Yecu, ɔci jɔkɛn a coŋɛn yɛmnɛn Eke ɔntɔ; ɔci Yecu yuokɛn tɛ jɔkɛn gɔkjɛn jig, Eke nhijɛn jɔkɛn.
35Nɛ lidɔ ɣoŋ min bawɛ Yecu jɔŋɛn nyalɔ, atɛn burɛ, muortɛn Juɔŋ a Tolɛn ti. 36Caimon ɔci ma ballɛ tɛ Yecu atɛ botɛ pɔy Eke; 37tɛ Yecu yowɛrnɛn, ma gɔkjɛn: Ma lirtɛ I wakɛnda. 38Yecu gɔkjɛn eken ti: Dalɛ, ikin otin ban aŋan ti, aŋkɛ makɛ nɛnɛ laldɛn daŋkɛn; Ya bɛnɛ aŋkɛ noŋgɛ ɔŋ. 39Yecu botɛ ban Galili warɛda, kacɛn cinagog ji, lotɛn ma tɛ juɛl ɔci pɔktɛ ma ta jɔkɛn.
40Minɛ mwuŋɛ ceecɛ bɛnɛ Yecu ti, nyiwɛn Eke ti, ɔci dwinjɛn inyu Eke ti, gɔkjɛn: Kan I bwɔgɛ, I yakɛ ti, warɛ ya da pɔkɛ. 41Yecu yum Eke pɔŋnɛ, atɛ minɛ tabdɛ tɛ biŋɛ, ɔci gɔkjɛn eke ti: Ya bwɔgɛ; warɛ i pɔkɛ. 42Ɔci aca nɛntɛ ceecɛ atɛ ɔntɔ, minɛ warɛ pwɔnɛ dokɛ. 43Yecu ɣitɛ eke ti, gɔkjɛn: 44Ɔgdɛ otɛ; na gɔkjɛ minɛ ti bɛ: ɔgdɛ otɛ minɛ Juɔŋ a Tolɛn ti, eke gɔrtɛ i ɔci wakɛ gwɔŋɛ Mojet ɣondɛ tɛ eke, aŋkɛ i warɛ luɔgdɛ, ɔci ma gɔrcɛ aginɛ naŋɛn Ya. 45Minɛ ceecɛ nɛnɛ atɛ, gɔkjɛn juɛl nɛ peny, aŋkɛ ma yuokɛn tɛ Yecu, ban cienɛ tɛ Eke, ɔci Eke atɛ non a wuwɛ. Ma bɛnɛ Eke ti ta ban warɛda.
اکنون انتخاب شده:
Juɛl a pwɔdɛn tɛ Mak 1: MFZ1947
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
First published by British and Foreign Bible Society in 1947.