Amarku 12
12
Egŋe ba agbi
1Ambla he nga Eyesu a lu odlo pa la moandakʼpo olu ba Ahogbrẽ, pa la moa la a nye odaŋ, pa la moandakʼpo, pa la moare nzenze la egŋe, a lu mi le, Aloma-kyeŋ a fu algo agbi baŋ nga a hwom lo oso, nga a kpo ohwĩ esheshyẽ agbi lo, nga a ta atandla moa a dzu ma a kʼpu agbi. Alom lo a shri agbi lo a ghwo moarekyeŋ abgo nga a gre oskukyeŋ. 2Omba moa a kpo algo agbi nga, are agbi a hom awaghrẽ baŋ otum okyku o da mo a shri ogʼba algo baŋ a daŋ. 3Moa la a kpaŋ agbi a vu awaghrẽ a taŋ ŋa andzu nga a kyu ŋa abgo a daŋ a gre ababgo. 4Areagbi lo a sa a hom awaghrẽ-akyeŋ otum nganga, moa la a kpaŋ agbi a sheŋ awaghrẽ he lo api eshri, nga moa a ka ayiekŋe baŋ mbo. 5Areagbi a sa a hom awaghrẽ-akyeŋ otum nganga, moa la a kpaŋ agbi a vu ŋa a bga a ta okom. Moa a kpo pa la moa-wagbrẽ ahwõ ekakahelo. Moa a taŋ moakyeŋ andzu nga moa a bga moakyeŋ a ta okom. 6Areagbi a wo la are ahwõ ma mbo baŋ á hom ŋa otum mbo, o wo le anwye esõ baŋ akyakyeŋ sha. Okpyemgbyeŋ a mo nga, a hom anwye baŋ otum okro moa la a kpaŋ agbi lo. Areagbi a lu esõ baŋ a lu mi le, Ame e bmi ba adlidzi, moa la a kpaŋ agbi me, á ka anwye me la olbi. 7Omba ba moa la a kpaŋ agbi a ka anwye esõ areagbi a ba nga, moa a lu mi le, E ka anwye esõ ba areagbi lo a ba a mi. E da gi e bga ŋa e ta okom okyku o da ogu lo o dzu o bi. 8Moa a vu ŋa a bga a ta okom nga a shri okom baŋ a ta agbi lo la edzi.
9Eyesu a zhĩ mo a lu mi le, Eka ekplo bimi e gno hi, eka bimi e ka, areagbi lo á kpo moa la a kpaŋ agbi eshi? Eyesu a tno ma a lu mi le, Areagbi lo á ba a bga moa la a kpaŋ agbi lo nga á shri agbi á ghwo moahwõ abgo. 10Eyesu a zhĩ moare la a wo ka la ŋa a lu mi le, Agimi e tsi Akpa ba Ahogbrẽ e ka mbo?
Ezhim moa la a mbdzi aku a tla lo a ta eka ba alo e wo la ekplokyeŋ mbo,
E zhiŋ e dzu ezhim la e wo la owlama e gre pyeŋ.
11Ohe lo Adigi-odne angyiŋ a kpo.
O wo ekplo egbregbre angyiŋ egi eyayi bi.
12Moandakʼpo ba Eyahuda a zga ngre okyku o vu Eyesu, okyku eshi moa a yi baŋ a ta egŋe he lo eshri mo angyiŋ. Moa a kpo eyli eshki okyku eka he moa a dzu ŋa a zga nga a gre emo.
Ozhioshĩ eshri ewaŋ
13Moa a da moaEfarisi, pa la moa la a lu Ehirudu ma a gre okro Eyesu la ozhiozhĩ okyku o kpyi ŋa. 14Moa a ba okro baŋ a khwo nga, moa a zhĩ ŋa a lu mi le, Andakʼpo, agi e yi aŋo o wo are la a lu adlidzi angyiŋ. Aŋo o kpo eyli arekyeŋ mbo, nga aŋo o la o nye odlo Ahogbrẽ ba adlidzi baŋ a shri a ba okyku moare. O lu o da gi, ozhẽ Odaŋ bi o wo odzi moa a hre ewaŋ a da Ekeza Anyuŋ-areŋ le, o wo odzi mbo? 15Eyesu a ka a tspi moa a klo o kpyi ŋa nga a zhĩ mo a lu mi le, Agimi e klo e kpyi me okyku eshi? E shri eyiamgbaŋ e ba e da me e ka. 16Moa a shri eyiamgbaŋ a ba. Eyesu a yga lo nga a zhĩ mo a lu mi le, Eshri ayi, ta la eshko ayi e wo ma? Moa a tno ma a lu mi le, Eshri ta la eshko ba Ekeza angyiŋ. 17Eyesu a nyuŋ mo a lu mi le, O ba alo o wo he, o shri ekplo la e wo e ba Ekeza e shri e daŋ, nga e shri ekplo la e wo e ba Ahogbrẽ e da Ahogbrẽ. Moare a ka egbregbre ta la odlo baŋ.
Ozhiozhĩ eshri oksoeku
18MoaEsaduki a ba okro Eyesu. Moahi lo a bmi ta la oksoeku mbo. 19Moa a ba nga moa a nyuŋ Eyesu a lu mi le, Andakʼpo, Omusa a ta odaŋ a da gi a lu mi le, O wo ba anáŋ arekyeŋ a kpu a dzu ashe a zga nga moa a wo anwye ma mbo le, anáŋ are lo a sko ashe lo a kyu, okyku o da mo a mbre anwye okyku o da eshko are la a kpu mi lo e kpu e dga mbo. 20Moa a lu a da Eyesu a lu mi le, Moanáŋ afoha a wo ma. Andakʼpo ekpyemgbyeŋ a kyu ashe nga, a hwiŋ anwye mbo, nga a kpu a dzu ashe lo a zga ashe-eshaku. 21Anáŋ la a ta a ka, a sko ashe-eshaku lo a kyu, nga alom lo a kpu a dzu ashe lo a zga ashe-eshaku. Anáŋ ba otra a sko ashe-eshaku lo a kyu. Ekakahelo o kpo ka la ŋa. 22Ekakahelo o kpo pa la moahwõ. Moafoha a kyu ashe lo, moa a kpu nga moa a mbre moanwye mbo. Ashe a mbo a ka a kpu. 23MoaEsaduki a zhĩ a lu mi le, Moafoha a kyu ashe he lo, okyku eka he onda moa á ba a kso eku, ashe lo á dzu a ba ayi? O ka, moafoha angyiŋ a kyu ŋa.
24Eyesu a nyuŋ mo a lu mi le, Agimi e ta akpu angyiŋ. Agimi e yi ekplo la e da gimi e lu eka he lo? Okyku bimi e yi Akpa ba Ahogbrẽ ta la ekʼpo ba Ahogbrẽ mbo angyiŋ. 25Omba moa la a kpu á ba a kso eku, moa á dzu eka moanwyeadga ba Ahogbrẽ angyiŋ, nga moarealom pa la moashe á kyu eble mbo. 26Eshri moa la á ba a kso eku, agimi e tsi akpa ba Omusa a ta eshri akla la a ri ovo mbo? Moa a ta akpa a lu mi ma Ahogbrẽ a nyuŋ Omusa a lu mi le, Ame e wo Ahogbrẽ ba Ebrahim pa la ba Eshaku, pa la ba Eyakubu. 27O dzu, aŋa a wo Ahogbrẽ moare la a kpu angyiŋ mbo, ambo a wo a moare la a wo esõ ma. Okyku eka he agimi e ta akpu e gre eshri.
Anyuŋ odaŋ
28Arekyeŋ la a nye odaŋ a wo okro he lo a gno eka ba Eyesu a tno moaEsaduki ma adzadzi. Are he lo a ba nga a zhĩ Eyesu a lu mi le, Odaŋyaŋ angyiŋ o wo anyuanyuŋ o gre mvye? 29Eyesu a tno ma a lu mi le, Odaŋ he angyiŋ o wo anyuanyuŋ o gre mvye. Agimi arehwĩ ba Esrayila e gno, Adigi Ahogbrẽ sha a wo Ahogbrẽ. 30O dzu omgbybi boŋ o klo Adigi Ahogbrẽ boŋ la esõ boŋ mvye, la ayaŋ esõ boŋ mvye, la aga boŋ mvye, la oshye boŋ mvye. 31Odaŋ ba oha ba anyuanyaŋ o lu mi le, Aŋo o klo a ba ekpazhi boŋ eka eshri boŋ. Odaŋ-okyeŋ o gre odaŋ aha he lo mbo. 32Are la a nye odaŋ a nyuŋ Eyesu a lu mi le, A gba Andakʼpo, ekplo boŋ o lu e wo adlidzi angyiŋ. Adigi sha a wo Ahogbrẽ, nga Ahogbrẽ-akyeŋ a wo ma mbo, o wo le aŋa sha. 33Okyku eka he o dzu omgbybi ba are a klo Ahogbrẽ la esõ baŋ mvye, la aga baŋ mvye, la oshye baŋ mvye, nga baŋ a klo a ba ekpazhi baŋ eka eshri baŋ. O wo odzi o gre moa a kpaŋ odaŋ aha he o sku moa a shri oshriondba ba abyi a shri a da Ahogbrẽ. 34Eyesu a ka okaobmye ba alom he lo nga a nyuŋ ŋa a lu mi le, Aŋo o wo osusku ta la Oreŋ ba Ahogbrẽ. Ambla he nga arekyeŋ a zhĩ Eyesu akplokyeŋ nga mbo.
Ozhiozhĩ eshri ba Emisiya
35Omba ba Eyesu a nye moare Anyuŋ-akulu, a zhĩ mo a lu mi le, Okyku eshi moa la a nye odaŋ a la a lu mi ma Emisiya á ba ogu ba Adawuda? 36E ka, Ogbgaodzi o tsa Adawuda o daŋ a lu mi le,
Ahogbrẽ a nyuŋ Adime-odne a lu mi le,
O dzu obgori me,
O tsa ba ame e da moafpu ŋo a tsu a gbu egi ayi boŋ.
37Eyesu a lu mi le, E ka, Adawuda a mbo a bzi Emisiya Adaŋ. Emisiya a kpo anyu a dzu a ba ogu ba Adawuda?
Eyesu a shĩ la moare a nyuŋ a kpo-kpo pa la moa la a nye odaŋ
Moare nzenze a ngli a gno onyenye Eyesu la ovyevye. 38A nye mo a lu mi le, E nyuŋ e kpo-kpo pa la moa la a nye odaŋ, moa la a klo o ygi ariga agre, o dzi o yi ekyku nga a klo moare a ka mo la anyuanyuŋ. 39Moa a la a sla ekro moandakʼpo a dzu ma anwyeakulu, ta la okro moa a kpo abgo ma, okyku o da mo a ka mo la anyuanyuŋ. 40Moa a la a ngʼga moashe-eshaku anzho adne mo. Ambla he nga moa a fa olu la o dzõ odzõ egi ayi moarehwi. Okyku eka he egbre mo é vu olo ngre é gre!
Ofaodi ba ashe-eshaku
41Eyesu a dzu osusku ta la angongo moa a shri ofaodi a ygi ma, nga a ka moare omba moa a shri ofaodi mo a ygi angongo. Moangyiŋ a shri amgbaŋ nzenze a ygi ma. 42Ashe-eshaku la a wo ekŋeo totno a shri okobo okyekyeŋ baŋ a wo alo ma a shri a ba a ta angongo lo. 43Eyesu a bzi moanwyeotum baŋ a lu mi le, Adlidzi, ashe-eshaku la a shri amgbaŋ a ta angongo hi a gre areyaŋ a mbo ahe. 44Moahwõ a fa ofa angyiŋ ekplo moa a wo alo ma, ambo ashe-eshaku he lo la a wo ekŋe a gre eshri a shri ekplo baŋ a wo alo ma ekpyemgbyeŋ a shri a ba a ta angongo.
اکنون انتخاب شده:
Amarku 12: EGONT74
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
