Amatiyu 25
25
Egŋe eshri moanwyeshe okʼpo
1Onda mi lo, Oreŋ Ongyeŋ ó dzu eka moanwyeshe okʼpo la a bli émgbuovo mo la awargi, nga a kso a gre okyku o tsa anwyealom ozhẽ. 2Moanwyeshe atno eshki mo a wo la eda ma, moanwyeshe atno ahwõ a wo la eda mbo. 3Moanwyeshe la a wo la eda ma mbo, a sko émgbuovo mo, ambo moa a shri émgbu awargi mbo. 4Ambo moanwyeshe la a wo la eda ma a shri émgbu awargi la e bli slu, ta la émgbuovo. 5Anwyealom a ba shoshoŋ mbo nga omba o mbla nzenze. Okyku eka he moanwyeshe lo pyeŋ a ndze enu.
6La ekpatspe okyukyku moa a gno enzi e lu mi le, E ka anwyealom lo a ba oba a mo, agimi e ba e yi e tsa ŋa ozhẽ!
7Moanwyeshe okʼpo lo a kso nga a ta ovo émgbuovo mo. 8Moanwyeshe la a wo la eda mbo, moa a nyuŋ moa la a wo la eda ma a lu mi le, agimi e bmi le, e kpo e ghwo la gi la awargi bimi ple, okyku eshi awargi bi a khwo nga émgbuovo bi é rum. 9Moa la a wo la eda a tno ma a lu mi le, Agi e tla. A bi a mbo á tse gi, ka la gimi mbo. Okyku eka he, agimi e yi ekyku nga e gbmo ma. 10Moanwyeshe la a wo eda mbo a gre o yi o gbmo awargi. Omba he lo angyiŋ anwyealom lo a gbu. Moanwyeshe atno la a nyuŋ a kpo a kʼpu okyku oba-ba ba anwyealom á ba, moa a gre okro o ri abgo ka la ŋa, nga moa a klu ayizhẽ.
11Ambla fi nga moanwyeshe atno ahwõ a gbu. Moa a lu mi le, Andakʼpo, o hwile gi ayizhẽ o da gi e ba. 12Anwyealom a tno mo ma a lu mi le, Ame e yi gimi mbo ku-ku. 13Eyesu a ta egŋe lo a khwo nga, a nyuŋ moanwyeotum baŋ a lu mi le, Agimi e kʼpu okyku eshi agimi e yi onda, ta la omba mbo.
Egŋe eshri moanwye-odne atra
14Oreŋ Ongyeŋ o dzu eka ba arekyeŋ la a yi odzi nga baŋ a bzi moanwye-odne baŋ, nga a shri otum a da mo. 15A gʼba mo otum eka ekplo ba areyaŋ a mbo eshki mo a kpo a gbu. A shri Enaira etno a da anwye-odne ba ori okyku o daŋ a ta ekyku la alo. A shri Enaira eha a da a ba oha okyku o daŋ a ta ekyku la alo. Nga a shri Enaira ekyeŋ a da a ba otra okyku o daŋ a ta ekyku la alo. Ambla he nga a gre odzi. 16Are la a yga Enaira etno a gre a yi a ta ekyku ta la alo nga a hwiŋ Enaira etno a ta ma. 17Are la a yga Enaira eha, a yi a ta ekyku la alo nga a hwiŋ Enaira eha a ta ma. 18Are la a yga Enaira ekyeŋ nga a yi a kʼpa enzhe a shri lo a ghre ma. 19Ambla fi nga Adimo-odne a zgi odzi a ba okyku o ka ekplo ba moa a ta ekyku a hwiŋ. 20Anwye-odne la a yga amgbaŋ Enaira etno a shri Enaira okʼpo a ba a shki obiŋ nga a lu mi le, Aŋo o shri Enaira etno o shri o da me, ame e kpo e gbmo la alo nga, e hwiŋ etno e ta ma. 21Adaŋ-odne a lu mi le, Ame e vye la ŋo, aŋo o wo anwye-odne adzadzi. Aŋo o tsa me adlidzi ekplo etsitsi, okyku eka he, ame é shri ekplo la é gre eka he é shri é doŋ. O ba nga o dzu o gno oraŋ pa la me otsotse. 22Anwye-odne la a yga Enaira eha a shri Enaira enyi a shri a ba a shki obiŋ, nga a lu mi le, Aŋo a shri Enaira eha o shri o da me, ame e kpo e gbmo la alo nga e hwiŋ eha e ta ma. 23Adaŋ-odne lo a lu mi le, Ame e vye la ŋo, o wo anwye-odne adzadzi. Aŋo o tsa me adlidzi ekplo etsitsi, okyku eka he ame é shri ekplo la é gre eka he é shri é doŋ. O ba nga o dzu o gno oraŋ pa la me otsotse. 24Anwye-odne la a yga Enaira ekyeŋ a ba a lu mi le, Ame e yi boŋ o wo are la a wo eda edzi mbo, nga aŋo o la o yla algo okro boŋ o fu mbo. 25Ame e kpo eyli boŋ. Okyku eka he, ame e gre e yi e kʼpa enzhe nga e shri lo e ghre ma. O yga amgbaŋ boŋ. 26Adaŋ-odne lo a kpo olom ka la ŋa nga a lu mi le, Aŋo o wo ototno o gre eshri. Aŋo o yi ba ame e la e yla algo okro ba ame e fu mbo? 27E mbi aŋo o shri amgbaŋ lo o zga abanki, okyku o da me e hwiŋ otama. 28Adaŋ-odne a lu mi le, E ngʼga amgbaŋ lo nga e shri e da anwye-odne la a hwiŋ Enaira okʼpo. 29Areyaŋ a mbo la a wo emakyeŋ ma, moa á shri á ta ŋa ma. Ambo are la a wo emakyeŋ ma mbo, ofi baŋ a wo alo ma a mbo, moa á yga lo á sku ŋa abgo. 30E shri anwye-odne la a wo ototno hi, e shri ŋa e ta evbu edzi. A mi lo nga, aŋa á wu okũ nga á taŋ azhga anyu.
Ombgu moa á ba a sõ moa-obiŋ hi
31Omba ba Anwye Arehwĩ á ba a ba eka Anyuŋ-areŋ, pa la moanwyeadga ba Ahogbrẽ, á dzu emgbakyiŋ ba oreŋ baŋ. 32Moarehwĩ obiŋ hi pyeŋ nga, moa á shki á ta ŋa á kpaŋ. Nga aŋa á gʼba mo aha eka ba are la a kpaŋ a la á gʼba ékylu ta la ebme. 33Á shri ékylu á zga obgori baŋ, nga á shri ebme á zga obgoehre baŋ. 34Anyuŋ-areŋ nga á nyuŋ moare la a wo obgori baŋ á lu mi le, Agimi moarehwĩ owlama ba Adugu, e ba! Agimi e ba e yga oreŋ ba moa a kpo okyku gimi ombamba ba moa a zga esĩ a kpo obiŋ hi. 35Omba ba embyle e kpo me, agimi e shri algo e da me e ri. Omba ba oŋo o kpo me, agimi e shri ami e da me e wa. Nga omba ba ame e wo okro o tum ma mbo, agimi e yga me odne bimi. 36Omba ba ame e dzi oso, agimi e shri aknye e da me. Omba ba ame e no, agimi e kpo e ghwo la me. Omba ba moa a vu me a ta aku, agimi e gre e yi e kpre me e ka. 37Moa la a bmi ba adlidzi he lo á tno ŋa ma á lu mi le, Adigi-odne, ombayaŋ agi e ka ŋo o kpu embyle nga, agi e shri algo e doŋ? Ombayaŋ agi e ka ŋo o kpu oŋo agi e shri ami e doŋ o wa? 38Ombayaŋ agi e ka ŋo boŋ o wo azhẽ nga, agi e yga ŋo odne bi abgo ahaha? Ombayaŋ agi e ka ŋo ososo agi e shri aknye e doŋ? 39Ombayaŋ aŋo o no agi e gre e yi e kpo e ghwo la ŋo? Ombayaŋ agi e ka moa a vu ŋo a ta aku nga, agi e gre e yi e ka ŋo? 40Areŋ á tno mo ma á lu mi le, Omba bimi e la e kpo e ghwo la moanime la a wo ekplokyeŋ mbo, o dzu eka bimi e kpo e ghwo la me angyiŋ!
41Areŋ á nyuŋ moa la a wo obgoehre baŋ a lu mi le, Agimi e kyoŋ e sku me. Ahogbrẽ a sheŋ a ta anyuabi a ygi gimi bgu. Moa á shri gimi á ygi ovo ba gbagbu-amo moa a kpo a zga Eshitaŋ, pa la moanwyeadga baŋ. 42Omba ba ame e kpu embyle, agimi e shri algo e da me e ri mbo. Omba ba ame e kpu oŋo agimi e shri ami e da me e wa mbo. 43Omba ba ame e wo azhẽ okro bimi, agimi e yga me adne bimi mbo. Omba ba ame e dzi oso, agimi e shri aknye e da me mbo. Omba ba ame e no olo, agimi e kpo e ghwo la me mbo. Omba ba moa a vu me a ta aku, agimi e gre e yi e kpre me e ka mbo. 44Moare odlobi he lo á zhĩ Areŋ lo á lu mi le, Ombayaŋ agi e ka ŋo o kpu embyle, nga o kpu oŋo, nga o wo azhẽ, nga boŋ o dzi oso, nga boŋ o no olo, nga moa a vu ŋo a ta aku, agi e tla e kpo e ghwo la ŋo? 45Areŋ á tno mo ma á lu mi le, Ame e lu e da gimi, omba bimi e tla e kpo e ghwo la moa la a wo ekplokyeŋ mbo, o dzu eka bimi e tla e kpo e ghwo la me angyiŋ. 46Moahi lo, moa á shri mo á gre ewu la e vu olo gbagbuamo. Moa la a bmi ba adlidzi, moa á hwiŋ esõ ba gbagbuamo.
اکنون انتخاب شده:
Amatiyu 25: EGONT74
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
