PEIKHIETNA 27
27
Meihal Biehna Maitam
(Pei 38:1-7)
1Adung tong nga, avai tong nga a pha maitam khat na bawl ding hi; tua maitam in a kikim ning li nei-in, tong thum sang ding hi. 2Tua maitam ning li teng tungah a ki na bawl ding hi; a kite maitam tawh kicimatin sumngo tawh na zut ding hi. 3Vut khol nading beelte le kawbia-te, kuongte, siakate le vutluona pehte na bawl ding hi; a vanzah zosie sumngo tawh na bawl ding hi. 4Tuami-a zah dingin sumngo sialen khat zong na phan ding hi; tua sia-len tunga a ning li tengah sumngo kuol li na vaw ding hi. 5Sialen in maitam kimcieng a batsuh thei nadingin maitam zawl nei-ah na bul ding hi. 6Maitam dingin gising zawlte na bawl ding a, sumngo tawh tuate na zut ding hi; 7a kipuoh ciengin maitam pang nite tungah a zawlte a op thei nadingin a kuol vangte sungah a zawlte kikhum ding hi. 8Siapehte tawh maitam a lai pen na hawmsah ding hi. Muol tung nangma kunga ang kilahsa bang lienin tuate kibawl ding hi.
Biehbuh Tuol le A Khainate
(Pei 38:9-20)
9Biehbuh tuol na bawl ding hi. Leitaw lampang in tong zakhat a sau, a kop-a kihiaton vau hoi tawh a kigan a kikhaisuh dalna puonte nei ding hi; 10a khuompi sawmni le a tunna sawmni pen sumngo tawh kibawl hi ding a, ahi vangin khuomte tunga vankhainate le a gaanate ngun tawh kibawl hi ding hi. 11Leilu lampang zong a sauna tua za ma hi ding a, a kikhaisuh dalna puon tong zakhat hi-in, a khuom sawmni le a tunna sawmnite sumngo tawh kibawl ding a, ahi vangin khuompite tunga vankhainate le a gaanate ngun tawh kibawl hi ding hi. 12Nitumna lampangah buhtuol a vailam adingin khuom sawm le a tunna sawm tawh tong sawmnga a sau a kikhaisuh dalna puon om ding hi. 13Buhtuol nisuona mailam zong avai tong sawmnga hi ding hi. 14Pang khatah a kikhaisuh dalna puon tong sawm le nga hi ding a, khuom thum le a tunna thum tawh hi ding hi. 15A pang langkhatah a kikhaisuh dalna puon pen tong sawm le nga hi ding a, khuom thum le a tunna thum tawh hi ding hi. 16Buhtuol kotpi dingin tong sawmni a sau, a dum, a dupsan, a ausan, a kop-a kihiation vau hoite tawh a kigan, hieu tawh kikhui-in a kizem kot puonkhai khat om ding hi; tua in khuom li le a tunna li nei ding hi. 17Buhtuol kimvela khuom zosie ngun tawh kigah ding hi; a vankhainate ngun hi-in a tunnate sumngo hi ding hi. 18Buhtuol adung tong zakhat, avai tong sawmnga, a sanna tong nga hi ding a, a kop-a kihiaton vau hoi tawh a kigan a kikhaisuh dalna puon le sumngo tawh kibawl a tunnate tawh hi ding hi. 19Biehbuh sunga vanzah ding poma, a khetphim zosie le buhtuol-a khetphim zosie sumngo tawh kibawl hi ding hi.
Meivah Ading Sathau
(Siem 24:1-4)
20Meivah a kuon zing thei nadingin, mei-a vah ding a kigawtguoi olive ga, sathau siengtho, Israel-te in nangma kungah ang tawi nadingin thu na pie lai ding hi. 21Tua meivah a kuon zing thei nadingin Aaron le a tapate in kikhopna puonbuh sung, thuciemna singkuong#27:21 Ahi sihle “thukimna”, ahi sihle “thuciemna”; Heb “eduth” mai-a dalna puon pulamah, nitah pan zingmawng dongin Topa mai-ah vil ding uhi. Tua khu a khantan vua Israel-te in a zui ding uh ngaina kip khat hi ding hi.
اکنون انتخاب شده:
PEIKHIETNA 27: ZBOTF01
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Zo Bible © Bible Society of Myanmar, 2018.