Mɑɑlk 15
15
*Suifnbɑ yɑɑ bin kpɑɑ Yiesu
(Mɑɑtieo 27.1-2, 11-14; Luk 23.1-5; Sɑn 18.28-38)
1K Yennu jɑɑnti yudɑnm, nɑn tinŋ nɑ ni sɑɑkɑb, nɑn *senniwɑntieb, nɑn *Suifnbɑ sɑɑkɑb kul lɑkn sɑn-nyɑpob ni, k lol lolɑ, k bɑɑn Yiesu bɑnt k jii’u sɑɑn nɑn’ɔ tinŋ yudɑɑnɔ nbɑ k b yi’u *Piilɑɑt nɑ buol. 2K Piilɑɑt boi’ɔ ɑ: «Fin e set tie Suifnbɑ Kpɑnbɑl nɑ ɑɑ?»
K Yiesu jiin ɑ: «Fin yɑɑ.»
3K Yennu jɑɑnti yudɑnm mɑnŋ tɑɑl Yiesu bonɑ bonciɑnn pɑɑk. 4K Piilɑɑt biɑ boi’ɔ ɑ: «A kɑn jiin siɑl ii? Gbiintl bɑɑ wɑɑ’ɑ biɑnŋ nbɑ.»
5Ŋɑɑn k Yiesu k jiin siɑl, k l ji bɑkt Piilɑɑt.
Piilɑɑt cɑb ɑ bin kpi Yiesu
(Mɑɑtieo 27.15-26; Luk 23.13-25; Sɑn 18.39—19.16)
6Tɔn, *yuktgɑltiɑlu jɑɑnm dinu yuo kul, Piilɑɑt tuu nyinn niyenɔ kuɑ e dɑnsɑlk ni, wun nbɑ k niib luon bin ŋɑɑ’u. 7L yuo mɑnŋ k jɑsuɑ din be dɑnsɑlk, k u sɑnn yi Bɑɑlɑɑbɑɑs. Ŋuɑ nɑn nisiɑb din be dɑnsɑlk k mɑɑn b kpikpiluk nbɑ k b dɑɑn tie duo nɑ ni k kpii nilɔ nɑ pɑɑk. 8Ŋɑnn e k nibul mɑnŋ din lɑkn k mei Piilɑɑt ɑ wun tun wɑɑ din tuu tuun bɑnnu nbɑ yɑɑnn. 9K u boi’b ɑ: «I luon k n nyinn Suifnbɑ Kpɑnbɑl nɑ ee?» 10K mɑɑn u din mi fɑnu nɑn jɑɑnti yudɑnm *funfunn pɑɑk e te k b jii Yiesu k tien u nuu ni.
11Ŋɑɑn k Yennu jɑɑnti yudɑnm mɑnŋ din wɑɑ tik nibul nɑ ɑ bin yet’ɔ k wun nyinn Bɑɑlɑɑbɑɑs e k tul’b. 12K Piilɑɑt biɑ ŋɑnm boi’b ɑ: «K wun nbɑ k i yi’u Suifnbɑ Kpɑnbɑl nɑ, i luon k n tien’ɔ nlee?»
13K b tiɑn jiin sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.»
14K Piilɑɑt boi’b ɑ: «Bee pɑɑk i? U biit mɑntk tie lɑnn po e?»
K b biɑ ŋɑnm tiɑn sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.»
15K Piilɑɑt luon wun penn nibul mɑnŋ pɑlɑ, l pɑɑk k u nyinn Bɑɑlɑɑbɑɑs tul’b, ŋɑɑn te k b buo Yiesu, k jii’u tul’b ɑ bin kpɑɑ’u dɑpunpunn pɑɑk.
Sejenm suki Yiesu
(Mɑɑtieo 27.27-31; Sɑn 19.2-3)
16K sejenm jii Yiesu k kuɑ nɑn’ɔ tinŋ nɑ yudɑɑnɔ Piilɑɑt ŋɑɑdundounŋ ni, k yiin b tɔk-nɑn-lieb kul. 17K b jii bɑɑnmunŋ nnɑ k lɑnn’ɔ, ŋɑɑn jii kunkoni k luu nɑɑn foklk k yiln’mɔ, 18ŋɑɑn ji fuont’ɔ ɑ: «Suifnbɑ Kpɑnbɑl, fuontu wɑɑ.» 19ŋɑɑn jii lɑnbɑnbik k fɑɑ u yul pɑɑk, k siin mɔsɑnt u pɑɑk, k gbɑɑ b dunɑ pɑɑk u tuɑnn ni. 20Bɑɑ dɑɑn’ɔ nyɑtuk k gbenn yuo nbɑ, k b liɑt bɑɑnmunŋ nɑ, ŋɑɑn jii u mɔnŋ mɔnŋ tiɑt nɑ k lɑnn’ɔ, k jii’u k nyii nɑn’ɔ ɑ bin sɑɑn kpɑɑ’u dɑpunpunn pɑɑk.
B kpɑɑ Yiesu k tɑbn’ɔ dɑpunpunn pɑɑk
(Mɑɑtieo 27.32-44; Luk 23.26-43; Sɑn 19.17-27)
21L yuo k Siilenn jɑsuɑ din be, k u sɑnn yi Siimɔn, wun nbɑ tie Aleksɑndl nɑn Lufus bɑɑ nɑ, k u nyii kpɑɑnt ni k gɑɑl lenŋ. K sejenm miɑ’u ɑ wun gɑɑl Yiesu kuun dɑpunpunn nɑ k jii. 22K b jii Yiesu k sɑɑ nɑn’ɔ siɑn nbɑ k b yi’l Golgotɑ, k l pɑɑk tie: «Yukpɑbuk buol nɑ.» 23Lenŋ e k nisiɑb din tul’ɔ dɑmunŋ nbɑ ŋmɑt nɑn nyɔksɑu nbɑ k b yi’l miil nɑ, ŋɑɑn k u yet l nyunu. 24K sejenm kpɑɑ’u dɑpunpunn nɑ pɑɑk, ŋɑɑn tol b lieb u tiɑt nɑ, ŋɑɑn tɔ tiɑtiɑ k cent u tiɑt mɑnŋ. 25B din kpɑɑ’u sɑn-nyiɑɔk ni e, kut mun-yiɑ yuo. 26K b din diɑn lin nbɑ pɑɑk te k b kpɑɑ’u k tɑbn u dɑpunpunn nɑ pɑɑk, k l yɑɑ ɑ: «Suifnbɑ Kpɑnbɑl mɑnŋ e nɑ.» 27B biɑ din kpɑɑ fɑt-tieb bɑnle dɑpunpunɑ pɑɑk k pukn u po, k yenɔ din be u niidiitu po, k luɑ nɑ mun din be u niigɑnŋ po. 28(K l gbien lin nbɑ diɑn Yennu lolkpel kɑdɑɑɔk ni ɑ: «B jii’u tien biitdɑnm sinsuuk ni.»)
29Tɔn, k bin nbɑ sonm gɑɑl lenŋ nɑ gumi yulɑ ŋɑɑn suki’ɔ, k yien ɑ: «Fin. A tuu yɑɑ ɑ sɑɑ fit bet Yennu jɑɑnti ŋɑsɑɑkɑk nɑ ŋɑɑn biɑ mɑɑ’l dɑɑ ŋɑntɑ sinsuuk ni. 30Tɔn, fɑn nyi dɑpunpunn nɑ pɑɑk k sik k fɑt ɑ mɔnŋ.»
31Nnɑ e k Yennu jɑɑnti yudɑnm nɑn senniwɑntieb mun biɑ lɑɑ’u, ŋɑɑn yien tien b lieb ɑ: «U tuu fɑɑl lieb, ŋɑɑn tɑn kɑn fit k fɑt u mɔnŋ. 32Ŋɑɑnt k Suifnbɑ Kpɑnbɑl, *Klistu nɑ, n nyi dɑpunpunn nɑ pɑɑk k sik nnɑ mɔtɑɑnɑ, k tin lɑ k tien’ɔ yɑdɑ.»
K bin nbɑ k b pukn u po k kpɑɑ’b nɑ mun suki’ɔ.
Yiesu kuun lɑbɑɑl
(Mɑɑtieo 27.45-56; Luk 23.44-49; Sɑn 19.28-30)
33Lɑɑ din tɑn bɑɑl yensuuk ni yuo nbɑ, k duo nɑ kul ji din bɔnn k sɑɑ bɑɑl kut muntɑ. 34Kut muntɑ yuo e, k Yiesu yikn sɑnpɑɑpo wɑɑ nɑn kunkɔsɑɑkɑl, k yet ɑ: «Eloi, Eloi, lemɑ sɑɑbɑɑktɑɑni?» k l pɑɑk tie ɑ: «N Yennu n Yennu, bee k ɑ lu’n i?»
35K bin nbɑ sie lenŋ nɑ nbɑ gbɑt u yiini mɑnŋ, k b siɑb yet ɑ: «Gbiintl mɑn. U yi Elii e.» 36Ŋɑnn e k b ni yenɔ tin k sɑɑ jii sɑɑpo k suunt dɑmiituk nnɑ ni, k jii sɑkn dɑɑɔk pɑɑk, ŋɑɑn donn k tul’ɔ ɑ wun nyu, k biɑ yet ɑ: «I ŋɑɑn k tii guu k lɑɑn Elii bɑɑt ɑ wun sikn’ɔ dɑpunpunn nɑ pɑɑk.»
37K Yiesu ŋɑnm yikn nɑn kunkɔsɑɑkɑl, ŋɑɑn nɑk l yuo.
38L yuo nɑ k cincenn nbɑ tuu juɑn k puun Yennu jɑɑnti ŋɑsɑɑkɑk ni nɑ ji bɔkt l yul pɑɑk k tɑn sik tinŋ ni. 39K sejenm yudɑɑnɔ nbɑ din sie dɑpunpunn mɑnŋ buol nɑ, wɑɑ lɑ biɑnŋ nbɑ k Yiesu kpo nɑ, k u ji yet ɑ: «Bɑlmɔni e, juɑ nɑ set tie Yennu Bijɑ e.»
40Tɔn, Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑn Sɑɑk bik nɑɑ nɑ, nɑn Sɑɑlome din be, k b din pukn puosiɑb po k sie bɑnfɔkl ɑ ŋɑɑn goli. 41B ponŋ din wɑɑ Yiesu yuo nbɑ k u din be Gɑɑliile ni e wɑɑ k sonmt’ɔ. Puolieb bonciɑnn nbɑ wei Yiesu k bɑɑl Selusɑɑlenm nɑ mun biɑ din be lenŋ.
Yiesu gbɑnɑnt piinu lɑbɑɑl
(Mɑɑtieo 27.57-61; Luk 23.50-56; Sɑn 19.38-42)
42-43L dɑɑl dɑɑjuouk k Aliimɑɑte duo ni juɑ nbɑ sɑnn din yi Suosiɑf nɑ din bɑɑl. U din tie Suifnbɑ tintɑɑnkɑɑnu ni sɑɑkɑyenɔ e, k din tie bulcimɔ nɑn bɑlmɔni, k din tuu guu Yennu nɑɑn bɑɑlu. K l dɑɑl din tie dɑɑl nbɑ k Suifnbɑ tuu tie b mɔnŋ siil nɑn *Fuondɑɑl. L pɑɑk, k u din sɑɑn yet Piilɑɑt ɑ wun cɑb’ɔ Yiesu gbɑnɑnt, ŋɑɑn u din k tiin jɑŋmɑɑni. 44Piilɑɑt nbɑ din gbɑt ɑ Yiesu ponŋ kpo wɑɑ nɑ, k l ji yɑɑl ŋɑɑn lit’ɔ, k u yiin sejenm yudɑɑnɔ nɑ k tɑn boi’ɔ ɑ wun lɑɑn Yiesu nbɑ kpo l wei wɑɑ? 45Yuo nbɑ k u gbɑt yudɑɑnɔ mɑnŋ mɔb ni nɑ, k u yiin Suosiɑf mɑnŋ k tɑn cɑb’ɔ ɑ wun jii Yiesu gbɑnɑnt nɑ. 46K Suosiɑf din dɑɑ kɑtinŋ, k kpɑɑt Yiesu gbɑnɑnt dɑpunpunn nɑ pɑɑk, k pɔbn’ɔ lenŋ, k jii’u k pii kɑɑɔk nbɑ k b ponŋ din jiɑl tɑnpiiuk, k bikt kɑtɑnu, k biin l mɔb nɑ. 47K Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑɑ nɑ din lɑ siɑn nbɑ k b pii Yiesu gbɑnɑnt mɑnŋ ɑ.
اکنون انتخاب شده:
Mɑɑlk 15: MOBANT07
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Moba-Lok New Testament © Bible Society of Togo, 2007.
