Mɑɑtieo 16

B luon bɑktnɔunŋ nyinn

(Mɑɑlk 8.11-13; Luk 12.54-56)

1L puolpo k Fɑɑliisiɑnnbɑ nɑn *Sɑɑdiuseɑnbɑ bɑɑl Yiesu buol ni. Bɑɑ luon k bin jɑnm’ɔ nɑ pɑɑk, k b yet’ɔ ɑ wun tien bɑktnɔunŋ *nyinn k lin wɑnn nɑn u yiikuo set nyii Yennu buol ni e. 2K u jiin ɑ: «Dɑɑjomɑɑsl, l i tie k sɑnpɑgbɑnt mɔn kpein, i tuu yet ɑ: ‹Wonn ŋɑnin, dɑɑl won sii yien.› 3Ŋɑɑn l i tie k sɑnpɑgbɑnt mɔn ŋɑɑn tɑn bɔnt sɑn-nyiɑɔk ni, i tuu yet ɑ: ‹Dinnɑ ŋɑnin, sɑɑk sɑɑ bɑɑ wɑɑ.› I fit buktl sɑnpɑgbɑnt nyinɑ, ŋɑɑn kɑn fit bukt mɔtɑɑnɑ yuo nɑ. 4Mɔtɑɑnɑ niib, biitdɑnm nbɑ k wɑɑ Yennu nɑ luon k bin lɑ bɑktnɔunŋ nyinɑ, ŋɑɑn b kɑn lɑ nyinsiɑl l i kii tie Suonɑ nyinbuolu nɑ kuukuɑ i kɑɑ.» L puolpo k u siet k nyik’b ŋɑɑn yɑɑt.

Dɑtinŋ lɑbɑɑl

(Mɑɑlk 8.14-21)

5Tɔn, Yiesu nɑn u *puolpoweitieb nbɑ din sɑɑ mɔkgbenŋl puotl nɑ, k u puolpoweitieb nɑ ji tiɑl nɑn b k jii pɑɑnu. 6Ŋɑnn e k u yet’b ɑ: «Ii mi mɑn Fɑɑliisiɑnnbɑ nɑn Sɑɑdiuseɑnbɑ * dɑtinŋ po.»

7K b ji piin k yien b lieb ɑ: «Tɑɑ k bɑɑl nɑn pɑɑnu nɑ pɑɑk e te k u yien nnɑ mɑnŋ.»

8K Yiesu bɑnn bɑɑ yien lin nbɑ mɑnŋ, k u boi’b ɑ: «Yinm yɑdɑ-kɑnpuɑnɑ dɑnm nɑ, bee k i yien i lieb nɑn yɑɑ k bɑɑl nɑn pɑɑnu nɑ pɑɑk e? 9I biɑ lek dɑɑ k bɑnn l pɑɑk ii? I k tiɑn mɑɑ dɑɑn jii pɑɑni ŋɑnŋmu k dinn jɑb tusɑ ŋɑnŋmu nɑ ɑɑ? Kpɑncubt ŋɑnŋɑ e k i dɑɑn lɑkn jiet nbɑ tenn nɑ? 10K i biɑ k tiɑn jɑb tusɑ ŋɑnnɑ nbɑ k n dɑɑn jii pɑɑni ŋɑnlole dinn’b nɑ po oo? I dɑɑn lɑkn jiet nbɑ tenn nɑ k gbien cubt ŋɑnŋɑ e? 11Bee k i k bɑnn nɑn l k tie pɑɑnu po kɑɑ k n piɑk i? Ii mi mɑn Fɑɑliisiɑnnbɑ nɑn Sɑɑdiuseɑnbɑ dɑtinŋ nɑ po.»

12Ŋɑnn e k u puolpoweitieb ji bɑnn nɑn l k tie dɑtinmɔnŋ po kɑɑ k u piɑk ɑ bii guu b mɔnŋ, ŋɑɑn l tie Fɑɑliisiɑnnbɑ nɑn Sɑɑdiuseɑnbɑ wɑnnu nɑ e k u piɑk l po.

Piɑl pɑk bɑljɑɑnn k jiin Yiesu po

(Mɑɑlk 8.27-30; Luk 9.18-21)

13K Yiesu nbɑ din tɑn bɑɑl duo nbɑ k b yi Fiiliip Seesɑɑle nɑ ni yuo nbɑ, k u boi u puolpoweitieb ɑ: «Niib yɑɑ ɑ *Nisɑɑlk Bijɑ tie ŋmee?»

14Ŋɑnn e k b jiin ɑ: «Siɑb yɑɑ ɑ, ɑ tie Sɑn wun nbɑ dɑɑn wuul niib Yennu nyunwulu nɑ e, k siɑb yɑɑ ɑ, ɑ tie Elii e, k siɑb yɑɑ ɑ, ɑ tie Selemi e ɑmi *Yennu sɔkniisuɑ.»

15K u ji boi’b ɑ: «K yinm mun, i yɑɑ ɑ n tie ŋmee?»

16Ŋɑnn e k Siimɔn Piɑl jiin yet’ɔ ɑ: «Fin e tie mɑnfodɑɑnɔ Yennu Bijɑ *Klistu.»

17K Yiesu yet’ɔ ɑ: «Fin Siimɔn, Suonɑ bijɑ nɑ, pɑlpienn be ɑ pɑɑk, k mɑɑn nisɑɑlk kɑɑ fiit mɑɑn nɑ wɑnn’ɑ ni, ŋɑɑn n Bɑɑ nbɑ be sɑnpɑɑpo nɑ e fiit k wɑnn’ɑ. 18Fin Piɑl, min ŋɑnin yien’ɑ e, ɑ tie tɑnn e, k tɑnpiiuk nɑ pɑɑk e k n sɑɑ jii n jɑɑnti#Nɑ buol nɑ, jɑɑnti tie bɑlmɔni Klistuweilɑ nbɑ tien yɑdɑ e. k senn, k kuun kɑn fit nyɑnn’l. 19N sɑɑ tul’ɑ Yennu nɑɑn tɑnmɔb gɑnn pieni. L pɑɑk, lin nbɑ k ɑ tɑn lol tingbounŋ nɑ ni, ŋɑnn e k n Bɑɑ mun biɑ sɑɑ lol *Yendɔunŋ ni, k lin nbɑ k ɑ biɑ lot, ŋɑnn e k n Bɑɑ mun biɑ sɑɑ lot Yendɔunŋ ni.»

20Ŋɑnn e k Yiesu yet u puolpoweitieb nɑ nɑn ninmɔnn ɑ bii mi k bin yet suɑ nɑn ŋuɑ e tie Klistu nɑ.

Yiesu pɑk u kuun nɑn u kuun fiilu po

(Mɑɑlk 8.31—9.1)

21Lɑɑ din nyii l yuo mɑnŋ k jii sɑɑ, k Yiesu piin k yien u puolpoweitieb ɑ: «Sie k n fɑbl k sɑɑn Selusɑɑlenm, ŋɑɑn t tinŋ ni sɑɑkɑb, nɑn Yennu mɑnntieb yudɑnm, nɑn *senniwɑntieb sɑɑ din’n fɑlɑ bonciɑnn, k biɑ tɑn sɑɑ kpi’n ɑ, ŋɑɑn dɑɑ ŋɑntɑ dɑɑl k n sɑɑ fiil kuun ni.»

22K Piɑl yiin’ɔ kpinŋ po k sɑɑ kpil’ɔ ɑ: «Yonmdɑɑnɔ, Yennu n bɔl bonbiil nɑ k l dɑɑ bɑɑt ɑ pɑɑk.»

23Ŋɑnn e k Yiesu jiɑnt yet Piɑl ɑ: «*Sɑɑtɑn nɑ, sietl nnɑ nɑ. A tie tɑngbiɑtkɑl e n sɔnu ni, k mɑɑn ɑ k duki lin nbɑ tie Yennu yɑl po, ŋɑɑn duki lin nbɑ tie nisɑɑli yɑl po,» 24ŋɑɑn yet u puolpoweitieb ɑ: «Wun nbɑ i luon wun wei’n, sie k u yit u mɔnŋ sɑlk k jii u kuun dɑpunpunn kii wɑɑ’n, 25k mɑɑn wun nbɑ k sɑk wun jii u mɑnfuol k tul’n, ŋuɑ e tɑn sɑɑ kɔnŋ’l, ŋɑɑn wun nbɑ yit u mɑnfuol sɑlk n pɑɑk, ŋuɑ e tɑn sɑɑ lɑ’l nɑn bɑlmɔni. 26L i tie k nilɔ yen tingbounŋ nɑ mɔktuk kul ɑ, ŋɑɑn tɑn kɔnŋ u mɑnfuol, nyɔlɑnt po e k u sɑɑ lɑ? Suɑ sɑɑ fit jii siɑl k dɑɑ u mɑnfuol ii? 27K mɑɑn Nisɑɑlk Bijɑ tɑn sɑɑ jen nɑn u Bɑɑ yiikuo, nɑn u *mɑlɑkɑɑnbɑ, k l yuo mɑnŋ u tɑn sɑɑ pɑ suɑ kul nɑn u tuonɑ nbɑ tie biɑnŋ nbɑ. 28Bɑlmɔni e k n yien’i nɑ, siɑb be nnɑ, k dɑɑ kɑn kpo sie k b tɑn lɑ Nisɑɑlk Bijɑ nɑɑn dinu bɑɑlu.»

اکنون انتخاب شده:

Mɑɑtieo 16: MOBANT07

های‌لایت

به اشتراک گذاشتن

مقایسه

کپی