Māteo 22
22
He ꞌaꞌamu haꞌaauraꞌa o te ŋoŋoro hāipo-ipo
(Ruka 14.15-24)
1He haꞌamata haka ꞌou a Ietū he vānaŋa hai ꞌaꞌamu haꞌaauraꞌa ꞌe he kī:
2«Te meꞌe topa ꞌi te ⌊haka tere iŋa ꞌāpī o te ꞌAtua⌋ pa he meꞌe topa ki te ꞌariki e tahi aŋa i te ŋoŋoro hāipo-ipo mo tāꞌana poki tane. 3He uŋa ki tōꞌona tāvini hāꞌaki ki te nuꞌu era mo oho ki rā ŋoŋoro mo oho o rāua, ꞌe ꞌina rā ŋā nuꞌu kai haŋa. 4He uŋa haka ꞌou ki tētahi tāvini he kī: “Ka kī ki te nuꞌu era mo oho mai: ko oti ꞌā te haka riva-riva o te kai, ko haka tiŋaꞌi ꞌana a au i te puaꞌa ꞌe i te tētahi ꞌanimare porio, ꞌe ko oti tahi ꞌana te aŋa; ka oho mai a rāua ki te ŋoŋoro”.
5»ꞌIna kai tapa atu e rā nuꞌu. E tahi o rāua i oho ki ꞌuta ki tōꞌona kona ꞌoka kai, te rua i oho ki tāꞌana aŋa he hoꞌo meꞌe, 6ꞌe tētahi atu he ꞌa-ꞌaru i tū ŋā tāvini era he tōtōā ꞌātā ka mate rō.
7»He riri rō atu ꞌai tū ꞌariki era, ꞌe he kī ki tāꞌana vaꞌehau mo tiŋaꞌi mo haka mate i rā nuꞌu taparahi-taꞌata era, ꞌe, takoꞌa, mo tutu i te kona noho o rā nuꞌu. 8I oti era he kī ki tōꞌona tāvini: “Ko oti ꞌana te kai te aŋa, ꞌe te nuꞌu hāꞌaki era e au mo oho mai, he nuꞌu taꞌe tano mau ꞌā mo te ŋoŋoro nei. 9Ka oho kōrua ki te ara, ka kī ki te nuꞌu taꞌatoꞌa nō era o kōrua mo takeꞌa mo oho mai ki te ŋoŋoro”.
10»He eꞌa ia tū nuꞌu tāvini era ki te ara he haka taka-taka i te nuꞌu taꞌatoꞌa nō era i takeꞌa, ꞌe he ꞌī rō atu ꞌai rā hare e te taŋata.
11»I uru era te ꞌariki uꞌi i te nuꞌu tuꞌu, he takeꞌa i te taŋata e tahi ꞌina he uru i te kahu tano mo te ŋoŋoro hāipo-ipo. 12He kī: “E hoa, ¿pē hē koe i uru mai ai ki roto nei ꞌina he uru i te kahu tano mo te ŋoŋoro hāipo-ipo?”.
»I mou nō tū kope era. 13He kī ia e te ꞌariki ki te nuꞌu maꞌu kai: “Ka here-here a te vaꞌe a te rima, ꞌe ꞌai ka hoa rō ki haho ki roto i te pōhāhā, kona ꞌi ira te taŋi ꞌe te ꞌau-ꞌau raꞌa niho”.
14»Nuꞌu rahi, paꞌi, te nuꞌu kī e te ꞌAtua mo oꞌo ki roto i te haka tere iŋa ꞌāpī ōꞌona, ꞌe nuꞌu taꞌe rahi te nuꞌu i haꞌataꞌa e ia mo oꞌo».
He kimi iŋa i te ꞌōtohe mo ꞌa-ꞌaru i a Ietū
(Marko 12.13-17; Ruka 20.20-26)
15I oti era te meꞌe nei, he oho te ⌊fariseo⌋ he haꞌaꞌau mo uꞌi i te rāveꞌa mo kī o Ietū i te meꞌe taꞌe tano ki te rāua haka tere iŋa mo ravaꞌa ꞌōtohe mo tuhi iŋa ai i te hape. 16He uŋa ki a Ietū i te rāua nuꞌu hāpī ananake ko te nuꞌu peꞌe ki a ⌊ꞌErore⌋ kī:
—E te Maꞌori, ko ꞌite ꞌana a mātou: taꞌa meꞌe vānaŋa he parautiꞌa, e hāpī rō ꞌana koe i te ara parautiꞌa o te ꞌAtua, ꞌe ꞌina koe he haka tano i taꞌa vānaŋa ki te manaꞌu o te taŋata; taꞌe, paꞌi, mo haka koa i a rāua koe e vānaŋa ena. 17Ki tuꞌu manaꞌu, ¿e tano mau rō ꞌā a tātou e ꞌauhau nei i te moni kī mo ꞌauhau ki te ꞌariki o te rōmano?
18ꞌI te aŋi-aŋi e Ietū i te manaꞌu rake-rake o rā nuꞌu, he kī:
—E te nuꞌu riva a te haho ē, ¿he aha kōrua e kimi ena i te rāveꞌa mo pāhono hape atu ōꞌoku? 19Ka haka takeꞌa mai rā te tara ꞌaurī ena e ꞌauhau ena ki te rōmano.
He maꞌu he vaꞌai e tahi ⌊renario⌋ 20ꞌe he ꞌui e Ietū:
—¿O ꞌai te ꞌāriŋa nei ꞌe te ꞌīŋoa pāpaꞌi o ruŋa?
21He pāhono e rā nuꞌu:
—O te ꞌariki o te rōmano.
He kī e Ietū:
—Ka vaꞌai ia ki te ꞌariki te meꞌe o te ꞌariki, ꞌe ki te ꞌAtua te meꞌe o te ꞌAtua.
22I ŋaroꞌa era i rā meꞌe, he māere rō atu ꞌai tū nuꞌu era. He haka rē ia i a Ietū ꞌe he eꞌa he oho rō ꞌai.
¿E ora haka ꞌou rō te nuꞌu mate?
(Marko 12.18-27; Ruka 20.27-40)
23ꞌI rā mahana mau ꞌana, he oho tētahi nuꞌu ⌊saruseo⌋ uꞌi i a Ietū. Ki te rāua kī ꞌina he taŋata he ora haka ꞌou mai te mate. I tuꞌu era he kī:
24—E te Maꞌori, pē nei a ⌊Mōtē⌋ i kī ai: mo mate o te kope e tahi ꞌina kai ai te poki ararua ko tāꞌana viꞌe, e hāipo-ipo tōꞌona taina ki te hove o rā kope mo ai o te poki mo maꞌu i te ꞌīŋoa o rā taina mate era ꞌe mo ai o tōꞌona hakaara.
25»ꞌI muꞌa ꞌā i ai rō e hitu taina. He hāipo-ipo te kope raꞌe, ꞌe i oho era he mate kai ai hia te poki. He hāipo-ipo ia te rua taina ki rā hove 26ꞌe kai ai takoꞌa te poki i mate rō ai. Ko tū meꞌe ꞌā te meꞌe i topa ki te toru, ꞌe ꞌātā ki te taꞌatoꞌa o rā ŋā taina. 27I oho era he mate takoꞌa rā viꞌe.
28»Iā. ꞌI te hora o te taŋata mo ora mai te mate, ana topa tāꞌue rā meꞌe, o tū ŋā taina era hoko hitu ¿ꞌa ꞌai mau rā viꞌe? Taꞌatoꞌa nō, paꞌi, i hāipo-ipo ai ki a ia.
29He pāhono e Ietū:
—¡Ko te hape i te kōrua manaꞌu pē nei ē: ꞌina he taŋata mate he ora haka ꞌou, he taꞌe ꞌite o kōrua i te meꞌe hāꞌaki o ruŋa i te ⌊Pāpaꞌi Moꞌa⌋ ꞌe i te roa o te pūai o te ꞌAtua! 30Ka ora ena te taŋata mai te mate, he noho pa he merahi o te raŋi, ꞌina he hāipo-ipo. 31ꞌE te ora o te taŋata mai te mate, ¿taꞌe ꞌō ko taiꞌo ꞌā e kōrua te kona kī e te ꞌAtua: 32“A au he ꞌAtua, kope ki a ia e haꞌamuri ena e te kōrua tupuna ko ⌊ꞌAparahama⌋, ko Itaꞌata ꞌe ko Hākovo”? I kī ai i te vānaŋa nei ko mate era ꞌā rā nuꞌu. ¡Te ꞌAtua he ꞌAtua o te nuꞌu ora!
33I ŋaroꞌa era e te nuꞌu i te meꞌe nei, he māere rō atu ꞌai ꞌi te vānaŋa ꞌa Ietū.
Te roŋo hopeꞌa o te nui-nui
(Marko 12.28-34)
34I ꞌite era e te fariseo ko ꞌapi ꞌana te haha o te saruseo i a Ietū, he haka taka-taka ꞌe he oho he uꞌi. 35E tahi o rā nuꞌu, ⌊maꞌori o te haka tere hūrio⌋, ꞌi te haŋa mo haka ꞌatu i a Ietū, he ꞌui:
36—E te Maꞌori, ¿ko roŋo hē te roŋo hopeꞌa o te nui-nui o te haka tere iŋa o te ꞌAtua pāpaꞌi e Mōtē?
37He kī e Ietū:
—«E haŋa koe ki te ꞌAtua hai haŋu taꞌatoꞌa o tuꞌu māhatu, o tuꞌu vārua ꞌe o tuꞌu manaꞌu». 38He roŋo nei te roŋo hopeꞌa o te nui-nui. 39ꞌE e ai takoꞌa rō ꞌana te rua, pa he roŋo nei ꞌā te nui-nui: «E haŋa koe ki te rua pa he haŋa iŋa ena ꞌā ōꞌou ki a koe». 40Te roŋo taꞌatoꞌa era ꞌa Mōtē ꞌe te meꞌe pāpaꞌi e te perofeta e tano tahi nō mo haꞌatura ki te roŋo nō nei e rua.
¿Mai i a ai ka haka ara mai ena te ⌊Kiritō⌋?
(Marko 12.35-37; Ruka 20.41-44)
41E taka-taka nō ꞌana te fariseo, 42he ꞌui e Ietū:
—¿Pē hē te kōrua manaꞌu o ruŋa o te Kiritō? ¿Mai i a ai ana haka ara?
He pāhono e rā nuꞌu:
—Mai i a ⌊Tāvita⌋.
43He kī e Ietū:
—¿He aha ia a Tāvita i kī ai te Kiritō he Pūꞌoko Haka Tere ōꞌona ꞌi te hora haka vānaŋa era e te ⌊Vārua Maitai⌋? Pē nei, paꞌi, i kī ai:
44“ꞌA Iehoha te ꞌAtua i kī rō ki tōꞌoku Pūꞌoko Haka Tere:
‘Ka noho koe ꞌi tōꞌoku pāꞌiŋa mataꞌu
ꞌātā ka haka rē rō e au i te nuꞌu taꞌe haŋa atu ki a koe ꞌi raro o tuꞌu vaꞌe’”.
45»Hai kī o Tāvita i te vānaŋa nei mo te Kiritō, e ꞌite nei e tātou: te Kiritō taꞌe nō he hakaara o Tāvita.
46ꞌIna e tahi o rā nuꞌu i ai o te vānaŋa mo pāhono, ꞌe mai rā mahana he riꞌa-riꞌa rō ꞌai ananake mo ꞌui haka ꞌou e tahi meꞌe.
اکنون انتخاب شده:
Māteo 22: rap
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.
