Ēfeto 5
5
1Pa he ŋā poki haŋa rahi kōrua o te ꞌAtua, e tuꞌu kōrua pē ia. 2E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.
3E ai te kōrua noho iŋa noho iŋa tano o te nuꞌu haꞌataꞌa e te ꞌAtua māꞌana. ꞌIna kōrua ko moe i te viꞌe ꞌe i te taŋata taꞌe he kenu ꞌe he viꞌe o kōrua, ꞌina kōrua ko aŋa i te tētahi haka ꞌou atu meꞌe taꞌe tano tuꞌu pē ira ꞌe, takoꞌa, ꞌina ko nou-nou. E hāpaꞌo te kōrua noho iŋa, ꞌo manaꞌu tāꞌue te nuꞌu pē nei ē: e aŋa rō ꞌana kōrua i te ŋā meꞌe nei.
4ꞌIna kōrua ko vānaŋa i te meꞌe hano-hano, ꞌina ko kī i te vānaŋa maꞌa-maꞌa ꞌe i te vānaŋa ꞌi-ꞌino. Te meꞌe o kōrua mo aŋa he haꞌahana-hana i te ꞌAtua.
5E ꞌite kōrua: te kope aŋa i te meꞌe taꞌe tano pohe e te hakari, te kope aŋa i te meꞌe hano-hano, ꞌe te kope haka rē i a ia ki te nou-nou, e ko oꞌo ki roto o te nūnaꞌa taŋata haka tere e Ietū ꞌe e te ꞌAtua. Te nou-nou, paꞌi, e tuꞌu rō ꞌā pa he meꞌe ena: e haꞌamuri ꞌana kōrua ki te ꞌītoro, ꞌe rā ꞌītoro he taoꞌa.
6E uꞌi kōrua ꞌo haka roŋo ki te reo-reo ana kī atu: te nuꞌu aŋa i te ŋā meꞌe ena ꞌina he hape. Te ꞌAtua e ko taꞌe haka ūtuꞌa i te nuꞌu taꞌe haꞌatura ki a ia aŋa i te ŋā meꞌe nei. 7ꞌO ira, e uꞌi ꞌo aŋa takoꞌa rō kōrua i te meꞌe taꞌe tano aŋa e tū nuꞌu era.
He noho iŋa ꞌi roto i te māꞌeha
8ꞌI muꞌa ꞌā e noho era kōrua ꞌi roto i te pōhāhā. ꞌE hora nei, ꞌi te ai o kōrua ꞌa Ietū Kiritō, ꞌi roto i te māꞌeha kōrua. ꞌO ira, e haka tere kōrua pa he nuꞌu noho ꞌi roto i te māꞌeha. 9ꞌE te meꞌe poreko mai te nuꞌu noho ꞌi roto i te māꞌeha he meꞌe riva-riva, tī-tika ꞌe parautiꞌa. 10Te auraꞌa: e ꞌite kōrua he aha te meꞌe mo koa o te tātou Pūꞌoko Haka Tere ko Ietū Kiritō, ꞌe ꞌai ka aŋa rō.
11ꞌIna ko aŋa i te meꞌe taꞌe hauhaꞌa aŋa e te nuꞌu noho o roto i te pōhāhā. Te meꞌe o kōrua mo aŋa he hāꞌūꞌū ki a rāua mo aŋi-aŋi pē nei ē: te meꞌe aŋa o rāua meꞌe taꞌe tano. 12Te meꞌe aŋa e te nuꞌu era e naꞌa rō ꞌā ꞌo takeꞌa e te taŋata he meꞌe haꞌamā ꞌātā mo vānaŋa o ruŋa. 13ꞌE mo haka māꞌeha e te mōrī i te ŋā meꞌe nei, he takeꞌa e te taꞌatoꞌa i te rake-rake o nei ŋā meꞌe. 14O te mōrī, paꞌi, te haka takeꞌa i te huru parautiꞌa o te meꞌe. Pa he meꞌe kī ꞌi ruŋa i te ⌊Pāpaꞌi Moꞌa⌋:
«Ka ꞌara koe, e haꞌuru mai ena;
ka eꞌa mai roto i te nuꞌu mate,
ꞌe mā Ietū Kiritō e haka māꞌeha atu i a koe».
15ꞌO ira, e uꞌi te kōrua noho iŋa. ꞌIna ko ai pa he noho iŋa o te nuꞌu taꞌe ꞌite mo haka topa i te manaꞌu. 16Mo ai o te meꞌe riva-riva mo aŋa e kōrua, e aŋa; hora nei, paꞌi, nuꞌu rahi te nuꞌu aŋa i te meꞌe taꞌe tano. 17ꞌIna kōrua ko aŋa i te meꞌe ꞌina kai manaꞌu riva-riva hia; e noho e haka topa he aha te meꞌe haŋa mau o te ꞌAtua.
18ꞌIna ko unu ka taꞌero rō, ꞌo taꞌe tano te kōrua noho iŋa; e haka rē mo te ⌊Vārua Maitai⌋ e vaꞌai atu i tōꞌona pūai ꞌe e haka tere atu i a kōrua. 19Pē ira he hīmene kōrua i te vānaŋa o te ꞌAtua aŋa mo hīmene, i te hīmene kati-kati mo te ꞌAtua, ꞌe i te meꞌe haka hīmene e te Vārua Maitai koia ko haꞌahana-hana hai māhatu ki te ꞌAtua. 20ꞌO te ai o kōrua ꞌa Ietū Kiritō, Pūꞌoko Haka Tere o tātou, e māuru-uru e oho ki te ꞌAtua Matuꞌa mo te meꞌe taꞌatoꞌa.
21E te taina, e moꞌa kōrua ꞌi roto i a kōrua ꞌana, ki takeꞌa ai e moꞌa rō ꞌana kōrua i a Ietū Kiritō.
He kenu ꞌe he viꞌe ⌊kiritiano⌋
22Pa he haka rē iŋa o te viꞌe mo haka tere i a ia e Ietū, pē ira takoꞌa ana haka rē i a ia mo haka tere e tāꞌana kenu. 23Te kenu, paꞌi, he pūꞌoko o te viꞌe, pē Ietū he pūꞌoko o te nūnaꞌa taŋata ⌊haka moe i te manaꞌu⌋ ꞌi ruŋa i a ia, hakari ōꞌona. A Ietū takoꞌa he kope haka eꞌa i a rāua mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa. 24Pa he haka rē iŋa o tātou o te nuꞌu haka moe i te manaꞌu ꞌi ruŋa i a Ietū mo haka tere mai e ia, pē ira takoꞌa ꞌana te ŋā viꞌe ana haka rē i a rāua mo haka tere e te rāua kenu ꞌi te meꞌe taꞌatoꞌa.
25E te kenu, e haŋa ki te kōrua ŋā viꞌe, pa he haŋa iŋa ena ꞌā o Ietū ki a tātou, ki te nuꞌu taꞌatoꞌa haka moe i te manaꞌu ꞌi ruŋa i a ia, haka takeꞌa hai vaꞌai iŋa era i a ia ki te mate mo tātou. 26I aŋa ai a Ietū i te meꞌe nei mo haka riro i a tātou i te nuꞌu taꞌatoꞌa haka moe i te manaꞌu ꞌi ruŋa i a ia he nuꞌu ꞌina e tahi hape ki te mata o te ꞌAtua hai ⌊papatito⌋ ꞌe hai vānaŋa era ꞌāꞌana, 27mo riro tahi o tātou pa he viꞌe hāipo-ipo nehe-nehe māꞌana, ꞌina e tahi meꞌe taꞌe tano ꞌe ꞌina e tahi hape ꞌi te hora ka toꞌo ena i a tātou mo noho ꞌi muri i a ia. 28Pē ira a kōrua te kenu ana haŋa ki te kōrua viꞌe, pa he haŋa iŋa mau ena ꞌā ki te kōrua hakari. Te kope haŋa ki tāꞌana viꞌe e haŋa ꞌā ki a ia mau ꞌā. 29ꞌIna, paꞌi, e tahi taŋata taꞌe haŋa ki tōꞌona hakari. Te meꞌe aŋa he hāŋai ꞌe he hāpaꞌo, pa he hāpaꞌo iŋa o Ietū Kiritō i a tātou i te nūnaꞌa taŋata haka moe i te manaꞌu ꞌi ruŋa i a ia. 30A tātou taꞌatoꞌa, paꞌi, he hakari ōꞌona; e tahi e tahi o tātou he kona o rā hakari. 31E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē: «Te taŋata e hāipo-ipo ena, he haka rē i tōꞌona matuꞌa tane ꞌe i tōꞌona matuꞌa vahine mo noho ꞌi muri i tāꞌana viꞌe ꞌe ararua he riro he hakari mau nō e tahi». 32Hai ŋā vānaŋa nei e takeꞌa ena i te nui-nui o te parautiꞌa taꞌe haka ꞌite mai era e te ꞌAtua ꞌi muꞌa ꞌā pē nei ē: a Ietū ꞌe te nūnaꞌa taŋata haka moe i te manaꞌu ꞌi ruŋa i a ia e tahi mau nō. 33ꞌE mo kōrua takoꞌa te vānaŋa nei: e haŋa te kenu ki tāꞌana viꞌe, pa he haŋa iŋa mau era ꞌā ōꞌona ki a ia, ꞌe te viꞌe, e ꞌite mo moꞌa i tāꞌana kenu.
اکنون انتخاب شده:
Ēfeto 5: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.