Ēfeto 4
4
E tahi mau nō manaꞌu
1A au, a Pauro, e puru atu ena ꞌo te haka ꞌite i te ⌊roŋo riva-riva o ruŋa i a Ietū Kiritō⌋, he ani atu: ꞌo te ai o kōrua he nuꞌu haꞌataꞌa e te ꞌAtua māꞌana, e ai te kōrua noho iŋa, noho iŋa tano o te nuꞌu ꞌāꞌana. 2ꞌIna ko manaꞌu i hau rō atu kōrua ki te rua, ꞌina ko ꞌōhumu, ꞌina ko riri tahaŋa, ꞌe e ꞌite kōrua mo haꞌaoromaꞌi hai haŋa i te rua. 3A kōrua, paꞌi, e tahi nō manaꞌu hai ⌊Vārua Maitai⌋; ꞌo ira, e ai te haumārū ꞌi roto i a kōrua ꞌo topa kē-kē rō kōrua. 4A tātou, te nuꞌu ꞌa Ietū Kiritō, pa he ŋā kona ena ꞌā o te hakari mau nō e tahi, ꞌe e tahi mau nō vārua haka tika i a tātou, he Vārua Maitai. ꞌE te meꞌe tiaki e tātou taꞌatoꞌa ko tū meꞌe ꞌā, he haꞌamaitai hōrea e te ꞌAtua mo te nuꞌu taꞌatoꞌa haꞌataꞌa e ia māꞌana. 5E tahi mau nō Pūꞌoko Haka Tere o tātou ko Ietū Kiritō, e tahi mau nō hāpī parautiꞌa o ruŋa i a ia, ꞌe e tahi mau nō ⌊papatito⌋. 6E tahi mau nō ꞌAtua, he Matuꞌa o tātou taꞌatoꞌa. A ia e noho ena ꞌi roto i a tātou hai Vārua Maitai, e haka tere mai ena, ꞌe e aŋa ena i tāꞌana meꞌe haŋa hai tātou.
7Ki te taꞌatoꞌa nō o tātou i vaꞌai mai ai e Ietū huru kē huru kē te meꞌe mo aŋa i te aŋa o te ꞌAtua, he meꞌe i haŋa e ia mo vaꞌai mai. 8ꞌO ira e kī ena ꞌi ruŋa i te Pāpaꞌi Moꞌa:
«Ko iri ꞌana ki te kona ruŋa nui e maꞌu rō ꞌā i te nuꞌu ꞌa-ꞌaru mai te tamaꞌi,
ꞌe ki tōꞌona taŋata i vaꞌai ai huru kē huru kē te meꞌe».
9¿He aha te haꞌaauraꞌa o te vānaŋa ena: «ko iri ꞌana»? Te haꞌaauraꞌa: mo iri i topa raꞌe mai ki ruŋa i te henua. 10Te kope topa mai era ko Ietū, ꞌe te kope iri era ki te kona ruŋa nui ko ia ꞌā, mo Pūꞌoko Haka Tere o te kona taꞌatoꞌa o te ao. 11ꞌE ꞌāꞌana mau ꞌā i haꞌataꞌa, mai roto i te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū, i te nuꞌu ki a rāua i vaꞌai ai i tōꞌona pūai mo aŋa i te aŋa o te ꞌAtua, kē pa he ⌊ꞌāpōtoro⌋, kē pa he taŋata vānaŋa i te meꞌe haka ꞌite e te ꞌAtua ki a ia, kē pa he maꞌori haka ꞌite oho i te ⌊roŋo riva-riva o te ꞌAtua⌋, ꞌe kē pa he taŋata hāpaꞌo ꞌe hāpī i te taina. 12I aŋa ai a Ietū i te meꞌe nei mo hāpī ꞌe mo haka riva-riva o te nuꞌu nei i a tātou i te nuꞌu taꞌatoꞌa haꞌataꞌa e te ꞌAtua māꞌana, ki tano tahi ai a tātou mo aŋa takoꞌa ki a ia. Pē ira ka hio-hio ka oho ena a tātou te nuꞌu taꞌatoꞌa ꞌāꞌana, 13ꞌātā ka ai rō e tahi mau nō manaꞌu ꞌo te māhani ꞌe ꞌo te haka moe i te manaꞌu ꞌi ruŋa i te Poki o te ꞌAtua. ꞌE pē ira takoꞌa ka paꞌari ka oho ena te tātou manaꞌu o ruŋa i te meꞌe o te ꞌAtua, ꞌātā ka ai rō te tātou huru, huru riva, pa he huru riva o Ietū Kiritō, ꞌina e tahi hape. 14E ko ai haka ꞌou ia a tātou pa he ŋā poki e ko roa he huri te manaꞌu ꞌi te haka roŋo ki te hāpī taꞌe he parautiꞌa haka ꞌite e te nuꞌu mārama-rama ꞌite i te reo-reo. 15E ai rō tātou pa he nuꞌu paꞌari maꞌu hio-hio ꞌe haka ꞌite hai haŋa ki te nuꞌu i te hāpī parautiꞌa o te ꞌAtua, ꞌe te tātou huru e hāhine e oho rō ki te huru riva o Ietū Kiritō, Pūꞌoko o tātou. 16ꞌE, ꞌo te ai ōꞌona he Pūꞌoko o tātou ꞌe a tātou he hakari ōꞌona, māꞌana e haka tika e papa e haka riva-riva ꞌi tōꞌona kona i a tātou, he kona o tōꞌona hakari. ꞌE mo aŋa tahi o te ŋā kona nei i te rāua aŋa hai haŋa, he nui-nui ꞌe he pūai he oho te hakari.
Te noho iŋa ꞌāpī hai Ietū Kiritō
17Te meꞌe haŋa ꞌa Ietū Kiritō mo kī atu e au ko te meꞌe nei: ꞌina kōrua ko noho haka ꞌou pa he nuꞌu taꞌe ꞌite ko ai te ꞌAtua parautiꞌa. Te noho iŋa, paꞌi, o rā nuꞌu e haka tano ena ki te manaꞌu taꞌe hauhaꞌa ꞌe taꞌe hāꞌūꞌū i a rāua. 18ꞌE, ꞌi te pūꞌoko hio-hio, ꞌina he haŋa mo ꞌite ꞌe mo aŋi-aŋi o ruŋa i te meꞌe o te ꞌAtua. E pōhāhā nō ꞌā te manaꞌu, ꞌe ꞌina i a rāua te ora ꞌāpī ꞌina he hopeꞌa raꞌa vaꞌai e te ꞌAtua. 19ꞌIna he haꞌamā haka ꞌou ꞌi te meꞌe taꞌe tano aŋa e rāua; ko vaꞌai mau ꞌana i a rāua ki te rauhuru nō atu meꞌe taꞌe tano pohe e te hakari.
20ꞌE taꞌe he meꞌe ena te meꞌe i hāpī atu, e te taina ē, hora haka ꞌite atu era o ruŋa i a Ietū Kiritō. 21ꞌI te ꞌite ōꞌoku e haka moe rō ꞌana kōrua i te manaꞌu ꞌi ruŋa i a Ietū, e ꞌite takoꞌa nei a au ko hāpī atu ꞌana i te parautiꞌa o ruŋa i a ia ꞌe o ruŋa i te noho iŋa tano haŋa e ia mo kōrua. 22ꞌO ira, e haka rē te kōrua huru ꞌe te kōrua noho iŋa taꞌe tano o muꞌa ꞌā haka tere e te meꞌe taꞌe tano pohe e te hakari. O te meꞌe ena te reo-reo ꞌe te maꞌu i te taŋata a te ara taꞌe tano. 23E haka rē mo te Vārua Maitai e haka ꞌāpī atu i te kōrua manaꞌu. 24Te meꞌe mo takeꞌa ꞌi ruŋa i a kōrua he huru ꞌe he noho iŋa ꞌāpī tano ki te huru ꞌāpī vaꞌai atu e te ꞌAtua, pa he huru mau era ꞌā ōꞌona. Te noho iŋa nei he noho iŋa tī-tika, tano ki te mata o te ꞌAtua, ꞌina e tahi hape.
Te meꞌe mau mo aŋa
25ꞌO ira, ꞌina ko reo-reo haka ꞌou; e kī te parautiꞌa ki te rua. Taꞌatoꞌa nō, paꞌi, a tātou o tū hakari ꞌā. 26Mo riri, e uꞌi kōrua ꞌo hara; ꞌe ꞌina ko maꞌu te riri ki te rua mahana, 27ꞌo ravaꞌa rō i a kōrua e Rukifero mo haka hara.
28Te toke-toke, ꞌina ko toke haka ꞌou. E aŋa mo ravaꞌa o tāꞌana meꞌe ꞌe mo hāꞌūꞌū ki te nuꞌu veve.
29ꞌIna ko parauꞌino ꞌe ꞌina ko kī i te vānaŋa mo taꞌe au o te rua. Te meꞌe mau nō o kōrua mo vānaŋa he meꞌe riva-riva mo hāꞌūꞌū i te rua.
30ꞌIna ko haka māui-ui te māhatu o te Vārua Maitai hai aŋa i te meꞌe taꞌe tano; hai ia, paꞌi, te ꞌAtua i tāpaꞌo ai i a kōrua pa he taŋata ꞌāꞌana mo te mahana pe muꞌa ka oho ena ka haka oti ena e te ꞌAtua i tāꞌana meꞌe haꞌamata aŋa: he haka eꞌa mau rō ꞌāvai i a kōrua mai roto i te hara.
31E haka kore mai i a kōrua te ŋā meꞌe nei: he manaꞌu he oho o ruŋa i te meꞌe taꞌe tano aŋa atu e te rua, he hū he riri mo te rua, he tātake, he vā-vā, ꞌe he taꞌatoꞌa nō huru o te meꞌe taꞌe tano aŋa ki te rua. 32E ai kōrua he nuꞌu riva, māhatu ꞌaroha, ꞌite i te haka rehu i te meꞌe taꞌe tano aŋa atu e te rua, pa he haka rehu iŋa era e te ꞌAtua i te kōrua hara hai Ietū Kiritō.
اکنون انتخاب شده:
Ēfeto 4: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.